ލޯންގްކޯސް ހަތަރެއް ގުނަ 100 މީޓަރު މެޑްލޭ މިކްސްޑް ރިލޭ އިވެންޓުގެ ގައުމީ ރިކޯޑު ދިވެހި ފެތުންތެރިން އައުކޮށްފިއެވެ.
ގަތަރުގެ ދޯހާގައި ކުރިއަށްދާ 21 ވަނަ ވޯލްޑް އެކުއަޓިކްސް ޗެމްޕިއަންޝިޕްސްގައި ދިވެހި ފެތުންތެރިން މި ރިކޯޑު އައުކޮށްފައިވަނީ ހަތަރު މިނެޓު 41.83 ސިކުންތުން ރޭސް ނިންމައިގެންނެވެ. މި ފަހަރު ރިކޯޑު އައުކުރި ޓީމުގައި ހިމެނެނީ ހަމްނާ އަޙްމަދާއި، މުބާލް ޢައްޒާމް އިބްރާޙީމާއި، މުޙައްމަދު ރިހާން ޝިހާމް އަދި އައިޝަތު އުލްޔާ ޝާއިޤެވެ.
މި އިވެންޓުގެ ގައުމީ ރިކޯޑު މީގެ ކުރިން އައުކޮށްފައިވަނީ މިދިޔަ އަހަރު ބޭއްވި 19 ވަނަ އޭޝިއަން ގޭމްސްގައެވެ. އެ ގޭމްސްގައި މި ރިކޯޑު ހަދާފައިވަނީ ހަތަރު މިނެޓު 48.51 ސިކުންތުން ރޭސް ނިންމައިގެންނެވެ. އެ ފަހަރު ރިކޯޑު ހެދި ޓީމުގައި ހިމެނުނީ މުބާލް އާއި، އިމްޢާން ޢަލީ އާއި، ހަމްނާ އަދި ހަނާން ޙުސައިން ޙަލީމެވެ.
މިއީ ވޯލްޑް އެކުއަޓިކްސް ޗެމްޕިއަންޝިޕްސްގައި ދިވެހި ފެތުންތެރިން އައުކުރި ފަސްވަނަ ގައުމީ ރިކޯޑެވެ.