އޭއެފްސީ އޭޝިއަން ކަޕް ފުޓްބޯޅަ މުބާރާތުގެ ދެވަނަ ބުރުގައި ޕެނަލްޓީ ޖަހައިގެން ސައުދީ އަރަބިއްޔާ ބަލިކޮށް، ކުއާޓާ ފައިނަލުގެ ޖާގައެއް ދެކުނު ކޮރެއާއިން ހޯދައިފިއެވެ.
ގަތަރުގެ އެޑިއުކޭޝަން ސިޓީ ސްޓޭޑިއަމުގައި ރޭ ކުޅުނު މެޗުގެ ފުރިހަމަ ވަގުތު ހަމަވިއިރު 1-1 ގެ ނަތީޖާއަކުން ދެ ޓީމު އެއްވަރުވުމުން، ނަތީޖާ ނެރުމަށް ޖެހި ޕެނަލްޓީގައި ދެކުނު ކޮރެއާ ކުރިހޯދީ 4-2 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން 36 ސިކުންތުގެ ތެރޭގައި ސައުދީން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ބަދަލަކަށް ކުޅެން އެރި އަބްދުﷲ ރަދީފެވެ. އެކަމަކު މެޗުގެ އިތުރު ވަގުތުގެ ނުވަވަނަ މިނެޓުގައި ދެކުނު ކޮރެއާއިން ވަނީ ލަނޑެއް ޖަހައި ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ޗޯ ގީ-ސުން ބޮލުންނެވެ.
ފުރިހަމަ ވަގުތު ހަމަވިއިރު ދެ ޓީމު އެއްވަރުވެފައި އޮތުމުން ނަތީޖާ ނެރެން ކުޅުނު އިތުރު ވަގުތުގެ ދެ ހާފުގައިވެސް ލަނޑެއް ފެނިފައެއް ނުވެއެވެ. އެއާއެކު ޕެނަލްޓީ ޖެހިއިރު، ޕެނަލްޓީ ޝޫޓްއައުޓުގައި ދެކުނު ކޮރެއާއިން ވަނީ އެ ޓީމުގެ ހަތަރު ޕެނަލްޓީވެސް ކާމިޔާބުކޮށްފައެވެ. ސައުދީގެ ފުރަތަމަ ދެ ޕެނަލްޓީ ކާމިޔާބުކުރި ނަމަވެސް، އެ ޓީމުގެ ސާމީ އަލް ޖަލީލް އާއި އަބްދުލްރަހްމާން ގަރީބް ފޮނުވާލި ޕެނަލްޓީތައް ކާމިޔާބުވެފައެއް ނުވެއެވެ.
މި މޮޅާއެކު މުބާރާތުގެ ކުއާޓާއަށް ދެކުނު ކޮރެއާ ދަތުރުކުރިއިރު، ކުއާޓާގައި އެ ޓީމު ކުޅެން ޖެހެނީ އޮސްޓްރޭލިއާއާއެވެ. މި މުބާރާތުގެ ދެވަނަ ބުރުގައި ރޭ ތައިލެންޑް އަތުން 2-1 ގެ ނަތީޖާއަކުން މޮޅުވެ، އުޒްބެކިސްތާންވެސް ވަނީ ކުއާޓާގެ ޖާގައެއް ހޯދާފައެވެ. ކުއާޓާ ފައިނަލުގައި އެ ޓީމު ކުޅެން ޖެހޭނީ މުބާރާތް ބާއްވާ ގައުމު ކަމަށްވާ ގަތަރާއެވެ.