އަންނަ މަހު މެލޭޝިއާގައި ބާއްވާ އޭޝިއަން ކްރިކެޓް ކައުންސިލް (އޭސީސީ) ވިމެންސް ޓީ20 ޕްރިމިއަރ ކަޕުގައި ވާދަކުރާ ރާއްޖޭގެ އަންހެން ކްރިކެޓް ޓީމުގެ ފައިނަލް ސްކޮޑުގައި ލ. ކުނަހަންދޫ 8 ކުޅުންތެރިން ހިމެނިއްޖެއެވެ.
މުބާރާތް ކުރިއަށްދާނީ އަންނަ މަހުގެ ފެބްރުއަރީ 10 އިން 16 ގެ ނިޔަލަށެވެ. ޖުމްލަ 16 ޤައުމެއް ވާދަކުރާ މި މުބާރާތުގައި ވާދަކުރާ ރާއްޖޭގެ އަންހެން ކްރިކެޓު ޓީމުގެ ފައިނަލް ސްކޮޑުގައި ހިމެނެނީ ޖުމްލަ 14 ކުދިންނެވެ. އަދި ރިޒާވް ހަތަރު ކުޅުންތެރިންވެސް ހިމެނެއެވެ. ޕްރީލިމިނަރީ ސްކޮޑާއެކު އެންމެ ފުރަތަމަ ފަރިތަކުރުންތައް ފެށީ 20 ކުދިންނާއެކުއެވެ.
ޓީމުގެ ކެޕްޓަނަކަށް ހަމަޖައްސާފައިވަނީ ކުނަހަންދޫގެ ސުމައްޔާ ބިންތް އަބްދުލްހަމީދެވެ. ވައިސް ކެޕްޓަނަކަށް ހަމަޖައްސާފައިވަނީ ފުވައްމުލަކުގެ އައިޝަތު މީސާ ރަމީޒެވެ. ދެން މި ޓީމުގައި ހިމެނޭ ކުނަހަންދޫއަށް ނިސްބަތްވާ ކުޅުންތެރިންނަކީ ހައްވާ ޝާއިގާ އާއި ނަބާ ބިންތް ނަސީމްގެ އިތުރުން ހަލީމަތު ލައިޝާ އާއި ފާތިމަތު ސަޖާ އާއި ހައްވާ އިފާޝާ އަދި ޓީމުގެ އެންމެ ތަޖުރިބާކާރު ކުޅުންތެރިޔާ ހަފްސާ އަބްދުﷲ ގެ އިތުރުން ފާތިމަތު މަލްހާއެވެ.
ފުވައްމުލަކުން މި ސްކޮޑުގައި ތިން ކުޅުންތެރިއެއް ވަނީ ހިމަނާފައެވެ. އެއީ ވައިސް ކެޕްޓަން މީސާގެ އިތުރުން ފާތިމަތު އަނާ މުހައްމަދާއި ފާތިމަތު މާހާ ނަސީރެވެ. މާލެއިން ސްކޮޑުގައި ތިން ކުޅުންތެރިއަކު ހިމެނެއެވެ. އެއީ މަރްޔަމް ހަމްޒާ ނިޔާޒާއި މަރިޔަމް ލީން ލުތުފީ އާއި ޝަމްއާ އަލީއެވެ.
ކޮލިފައިންގައި ރާއްޖެ ލައްވާލީ ގްރޫޕް ޑީގައެވެ. މި ގްރޫޕުގައި ރާއްޖެއާއެކު ހިމެނެނީ ފާހަގަކޮށްލެވޭ ގައުމުތަކެކެވެ. އެރާއްޖެއާއި އެއް ގްރޫޕެއްގައި ހިމެނެނީ ބޫޓާނާއި ހޮންގްކޮންގް ގެ އިތުރުން ނޭޕާލެވެ.
ރާއްޖެ ކުޅޭ ފުރަތަމަ މެޗުގައި އަންނަ މަހުގެ 10 ވަނަ ދުވަހު ބައްދަލުކުރާނީ ބޫޓާނާއެވެ. ދެވަނަ މެޗުގައި 11 ވަނަ ދުވަހު ހޮންގްކޮންގް އާއި ބައްދަލުކުރާއިރު ތިންވަނަ މެޗުގައި 13 ވަނަ ދުވަހު ބައްދަލުކުރާނީ ނޭޕާލާއެވެ. ޓީމުގެ ކޯޗުގެ ގޮތުގައި ހަރަކާތްތެރިވާނީ އިމާދު އިސްމާއީލެވެ. އަދި އެސިސްޓަންޓް ކޯޗަކީ ލިރުގާމް ސައީދު (ލަރޭ) އެވެ.
މިއީ ބައިނަލްއަގުވާމީ ކްރިކެޓު މުބާރާތެއްގައި ރާއްޖެއިން ވާދަކުރާ ދެވަނަ ފަހަރެވެ. އެންމެ ފުރަތަމަ ވާދަކޮށްފައިވަނީ 2019 ވަނަ އަހަރު ނޭޕާލުގެ ކަތުމަންޑޫ އާއި ޕޮކަހާރާގައި ބޭއްވި ސައުތު އޭޝިއަން ގޭމްސްގައެވެ. އެ ފަހަރުގެ ޤައުމީ ސްކޮޑުގައި ވެސް ކުނަހަންދޫއަށް ނިސްބަތްވާ ގިނަ ކުޅުންތެރިންތަކެއް ހިމެނުނެވެ. މި ފަހަރު މެލޭޝިއާ އަށް ދާ ސްކޮޑުގައި ވެސް އެ މުބާރާތުގައި ކުޅުނު ގިނަ ކުޅުންތެރިން ހިމެނެއެވެ.