ފީފާ އާއި އޭއެފްސީން ދިން އިރުޝާދާ އެއްގޮތަށް، އިންތިޚާބުގެ ކަންކަން ކެންސަލްކުރުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ހިންގާ ކޮމިޓީގެ ބައްދަލުވުމުން ފާސްކޮށްފިއެވެ.
މި މަހުގެ 31 ވަނަ ދުވަހު ބާއްވަން ތާވަލްކުރި އިންތިޚާބުގެ ކަންކަން ހުއްޓާލަން ފީފާ އަދި އޭއެފްސީ އެފްއޭއެމަށް އެންގީ އިންތިހާބުގައި ރައީސް ކަމަށް ވާދަކުރަން ހުށަހެޅި، އެ އެސޯސިއޭޝަންގެ ކުރީގެ ރައީސް، އަޙްމަދު ޠާރިޤު (ޓޮމް) ގެ ކެންޑިޑެސީ ބާތިލްކުރަން، އެފްއޭއެމް އިލެކްޓޯރަލް ކޮމިޓީން ނިންމާފައިވަނިކޮށެވެ.
ފީފާއާއި އޭއެފްސީން މި އިންތިޚާބުގެ ކަންކަން ހުއްޓާލަން އެންގީ އިލެކްޓޯރަލް ކޮމިޓީ އެކުލަވާލައިފައިވާ ގޮތް ސައްހަ ނޫން ކަމަށް ބަޔާންކޮށެވެ. އެފްއޭއެމް އިންތިހާބު މައްސަލައިގައި ޠާރިޤު، އޭއެފްސީ އާއި ފީފާ އަށް މައްސަލަ ހުށަހަޅާފައިވާއިރު، އެފްއޭއެމް އިން ވެސް، އިލެކްޓޯރަލް އެޕީލް ކޮމިޓީއެއް ނެތުމުން މި ކަމުގައި އަމަލުކުރާނެ ނިންމަން، ފީފާ އާއި އޭއެފްސީގެ ލަފައަކަށް ވަނީ މީގެކުރިން އެދިފައެވެ.
ފީފާ އާއި އޭއެފްސީން ނިންމީ އެފްއޭއެމުން މިހާރު އިއުލާނުކޮށްފައިވާ އިންތިޚާބުގެ ކަންކަން ބާތިލުކުރުމަށް ފަހު އިލެކްޓޯރަލް އާއި އެޕީލް ކޮމިޓީ އައްޔަނުކުރުމަށް ފަހު އެކަން އަލުން ކުރިއަށްގެންދިއުމަށެވެ. އެފްއޭއެމުން ރަސްމީކޮށް އިންތިޚާބު ކެންސަލްކުރަން ނިންމީ ބުރާސްފަތި ދުވަހުގެ ރޭ ބޭއްވި އެ އެސޯސިއޭޝަނުގެ ހިންގާ ކޮމިޓީގެ 22 ވަނަ ބައްދަލުވުމުންނެވެ.
މީގެ އިތުރުން އެފްއޭއެމުން ވަނީ އޭއެފްސީ އާއި ފީފާގެ ފަރާތުން ދެއްވާފައިވާ އިރުޝާދާއި އެއްގޮތްވާގޮތުގެ މަތިން އެފްއޭއެމުގެ އަސާސީ ޤަވާއިދާއި އިލެކްޓޯރަލް ކޯޑުގައި ހިމެނޭ އެންމެހައި ކޮމެޓީތަށް އެކުލަވާލުމަށާއި އެސޯސިއޭޝަނުގެ ކޮންގްރެސްއަކުން އިންތިޚާބު ކުރަންޖެހޭ ކޮމެޓީތަށް އިންތިޚާބު ކުރުމަށް އެކްޓްސްރާ އޯޑިނަރީ ކޮންގްރެސްއެއް ބޭއްވުމަށް ނިންމާފައެވެ.
އެކްސްޓްރާ އޯޑިނަރީ ކޮންގްރެސް ބޭއްވުމަށް އިދާރީގޮތުން ކުރަންޖެހޭ ކަންކަން ތަރުތީބުކުރުމަށް ފަހު އެކްސްޓްރާ އޯޑިނަރީ ކޮންގްރެސްގެ އެޖެންޑާ އާއި ކޮންގްރެސް އޮންނާނެ ތާރީޚާއި، ތަނާއި ގަޑީ އެސޯސިއޭޝަނުގެ ޤަވާއިދުތަކާއި އުސޫލުތަކާއި އެއްގޮތްވާގޮތުގެ މަތިން އަންގާ އިއުލާނުކުރާނެ ކަމަށެވެ.
މީގެ އިތުރުން އެފްއޭއެމުން ވަނީ އެ އެސޯސިއޭޝަނުގެ އެއްވެސް މެމްބަރެއްގެ ހައްގަކަށް އުނިކަމެއް ލިބޭފަދަ އެއްވެސް ކަމެއް ނުކުރާނެ ކަމުގެ ޔަގީންކަން ދީފައެވެ. އަދި ހައްގުތައް ކަށަވަރުކުރުމަށްޓަކައި ކުރެވެންހުރި ހުރިހާ ކަމެއް ކުރާނެކަމުގެ ޔަގީންކަންދޭ ކަމަށްވެސް ބަޔާނުގައިވެއެވެ. އަދި ފުޓުބޯޅައިގެ މަސްލަހަތުގެ މައްޗަށް އެހެން އެއްވެސް ފަރާތެއްގެ މަސްލަހަތު އިސްނުކުރާނެކަމުގެ ޔަގީންކަން އަރުވާކަމަށް ވެސް އެފްއޭއެމުގެ ބަޔާނުގައިވެއެވެ.
ފީފާ އަދި އޭއެފްސީ އިން އެފްއޭއެމްގެ އިންތިހާބާ ގުޅޭ މި ހުރިހާ ހަރަކާތެއް ގާތުން ބަލަމުންގެންދާނެ ކަމަށް ވެސް ވަނީ އަންގައިފަ އެވެ. ޠާރިޤުގެ އިތުރުން އެފްއޭއެމް އިންތިހާބަށް ވާދަކުރަން ކެންޑިޑެސީ ހުށަހަޅާފައިވަނީ ކްލަބް އީގަލްސްގެ ވައިސް ޗެއާމަން، މުފާވިޒް ހާޝިމް (މުފާ) އެވެ.
ޤަވާއިދާ ހިލާފު ކޮމިޓީއަކުން އެފްއޭއެމް އިންތިހާބާ ބެހޭ އެއްވެސް ކަމެއް ކުރިއަށް ނުގެންދެވޭނެކަން ބަޔާންކޮށް، އެފްއޭއެމް އިލެކްޓޯރަލް ކޮމިޓީއާ ދެކޮޅަށް، ފީފާ އާއި އޭއެފްސީ އަށް މައްސަލަ ހުށައެޅުއްވީ ޠާރިޤުވެ. މައްސަލަ ހުށައެޅުއްވީ އިލެކްޓޯރަލް ކޮމިޓީން އޭނާގެ ކެންޑިޑެސީ ބާތިލްކުރުމުންނެވެ. އެ މައްސަލަ އެޕީލް ކުރަން ބެލިއިރު، އިޖުރާތާ އެއްގޮތަށް އެފްއޭއެމް އިން އިލެކްޓޯރަލް އެޕީލް ކޮމިޓީއެއް އެކުލަވާލައިފައި ނެތެވެ.