ކުޅިވަރާ ބެހޭ ވުޒާރާގެ ދަރަނި 160 މިލިޔަނުން 35 މިލިޔަނަށް ކުޑަކޮށްފި
-
ދަރަނީގެ ތެރެއިން 125 މިލިއަން ރުފިޔާ ވަނީ ދައްކާފައި
-
131 މަޝްރޫޢެއް ވަނީ ފަށާފައި
-
މުހިއްމު 2 ވައުދެއް އެއްކޮށް ފުރިހަމަކުރެވިފައި
މި ސަރުކާރު ވެރިކަމާއި ހަވާލުވިއިރު ކުޅިވަރާއި ހަށިހެޔޮކަމާބެހޭ ވުޒާރާގެ ދަރަނި 160 މިލިއަން ރުފިޔާއަށް އަރާފައިވާކަމަށާއި، ނަމަވެސް އޭގެތެރެއިން ބޮޑު ބައެއް މި ސަރުކާރުން ދައްކާ ހަލާސްކޮށްފައިވާކަމަށް ކުޅިވަރާއި ހަށިހެޔޮކަމާބެހޭ އަބްދުﷲ ރާފިއު ވިދާޅުވެއްޖެއެވެ.
ކުޅިވަރާއި ހަށިހެޔޮކަމާބެހޭ ވަޒީރު މިހެން ވިދާޅުވީ ސަރުކާރުގެ ވުޒާރާތަކުން ކުރަމުން އަންނަ މަސައްކަތްތަކާބެހޭ މައުލޫމާތު ހިއްސާކޮށް، ރައްޔިތުން ކުރަން ބޭނުންވާ ސުވާލުތަކަށް ޖަވާބުދެއްވުމަށް ކުރިއަށްގެންދާ ވަޒީރުންގެ ޕަބްލިކް ފޯރަމްގައި ވާހަކަދައްކަވަމުންނެވެ.
"އަހާ" ނަމުގައި ކުރިއަށްގެންދާ ވަޒީރުންގެ ޕަބްލިކް ފޯރަމްގެ ފުރަތަމަ ބައްދަލުވުމުގައި ވާހަކަފުޅުދައްކަވަމުން ކުޅިވަރާއި ހަށިހެޔޮކަމާބެހޭ ވަޒީރު ވިދާޅުވީ މި ސަރުކާރު ވެރިކަމާއި ހަވާލުވިއިރު އެ ވުޒާރާއާ 232 މަޝްރޫއެއް ހަވާލުކޮށްފައި އޮތްކަމަށެވެ. އަދި އެ މަޝްރޫޢުތަކުގެ އަގު 600 މިލިއަން ރުފިޔާއަށް އަރާކަމަށާއި، އެއީ މިނިސްޓްރީގެ 2 އަހަރެއްހާ ދުވަހުގެ ބަޖެޓްކަން ވަޒީރު ފާހަގަކުރެއްވިއެވެ.
ވަޒީރު ވިދާޅުވީ ގިނަ މަޝްރޫޢުތަކެއް އެ ވުޒާރާއާ ހަވާލުކޮށްފައި އޮތްއިރު، ވުޒާރާގެ ދަރަނި 160 މިލިއަން ރުފިޔާއަށްކަމަށެވެ. ނަމަވެސް މި ސަރުކާރު ވެރިކަމާއި ހަވާލުވިފަހުން މިވީ 2 މަސްދުވަހުގެ ތެރޭގައި 160 މިލިއަން ރުފިޔާގެ ތެރެއިން 125 މިލިއަން ރުފިޔާ ދައްކާ ހަލާސްކޮށްފައިވާކަމަށް ވަޒީރު ވިދާޅުވިއެވެ.
ކުޅިވަރާބެހޭ ވަޒީރު ވިދާޅުވީ މި ސަރުކާރު ވެރިކަމާއި ހަވާލުވުމަށްފަހު 131 މަޝްރޫޢެއް ފައްޓަވާފައިވާކަމަށެވެ. އަދި ހަފްތާ 14ގައި ހިމެނޭ މުހިއްމު ދެ ވައުދެއް އެއްކޮށް ފުރިހަމަކޮށް، އޭގެ ފަސޭހަ މިހާރު ކުޅިވަރު ކުޅުންތެރިންނަށް ލިބެމުންދާކަމަށެވެ. މީގެއިތުރުން އެ ވުޒާރާއިން ބޮޑު 4 ޕްރޮޖެކްޓެއް ފަށާފައިވާއިރު، ކުޅިވަރުތައް ކުރިއެރުވުމަށް ދިގު ރާސްތާގެ ޕްލޭނެއް ހަދަމުންދާކަމަށްވެސް ވަޒީރު ވިދާޅުވިއެވެ.