ސާފިންގައި ދިމާވާ އެންމެ ބޮޑު ޗެލެންޖަކީ މުބާރާތްތައް ޖަޖުކޮށްލާނެ ޖަޖުން ރާއްޖޭގައި ނެތުން ކަމަށް މޯލްޑިވްސް ސާފިން އެސޯސިއޭޝަން (އެމްއެސްއޭ) ގެ ރައީސް މުޙައްމަދު ސޮބާހު (ޗޭ) ވިދާޅުވެއްޖެއެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ސާފިންގައި ދިމާވާ ދަތިތަކާ ގުޅޭގޮތުން ވާހަކަދައްކަވަމުން ސޮބާހު ވިދާޅުވީ ރާއްޖޭގައި ފުރަތަމަ މުބާރާތްތައް ބޭއްވިގެންދިޔައިރު މަސައްކަތްކުރީ ރާއްޖޭގެ ޖަޖުންނާއެކު ކަމަށާއި، އެއަށްފަހު ރާއްޖެއިން ބޭރު ޖަޖުން ބޭނުންކުރަން ފެށި ކަމަށެވެ. އެގޮތުން މިދިޔަ އަހަރުގެ ދިވެހި ސާފް ލީގުގައި ދުނިޔޭގެ އެންމެ މޮޅު ޖަޖުންގެ ތެރެއިން އެކަކު އިންސާފުކުރި ކަމަށާއި، މި އަހަރުގެ މުބާރާތްތައްވެސް ކުރިއަށްދާނީ އެ ޖަޖާއެކުގައި ކަމަށްވެސް ވިދާޅުވިއެވެ. އަދި އެ ފެންވަރުގެ ޖަޖެއް މުބާރާތްތަކުގައި އިންސާފުކުރުމަކީ އެތުލީޓުންނަށްވެސް ލިބިގެންދާ ބޮޑު ހިތްހަމަޖެހުމެއް ކަމަށްވެސް ވަނީ ވިދާޅުވެފައެވެ.
ސޮބާހު ވިދާޅުވީ މިހާރު ރާއްޖޭގައި ހަރަކާތްތެރިވާ ޖަޖުން އިތުރަށް ތަމްރީން ހޯދުމާއި، ޖަޖުންނަށް ޚާއްސަކޮށްގެން އިތުރު ޕްރޮގްރާމުތަކެއް ހިންގުން އެއީ ގެންގުޅުއްވާ އިތުރު ވިސްނުމެއް ކަމަށެވެ. އަދި އޭގެ އެންމެ ބޮޑު ބޭނުމަކީ ލީގުގެ ފެންވަރު ހިފެހެއްޓުމަށްޓަކައި މަސައްކަތްކުރުން ކަމަށްވެސް ވިދާޅުވިއެވެ. މީގެ އިތުރުން ރާއްޖޭގެ ޖޫނިއަރ އެތުލީޓުންނަށް އަމާޒުކޮށްގެން ހުނަރު ތަރައްގީކުރުމުގެ އިތުރު ޕްރޮގްރާމުތަކެއް ރޭވިފައިވާ ކަމަށާއި، މި އަހަރު އެންމެ ބޮޑު އަމާޒަކަށް ވެގެންދާނީ ރާއްޖޭގައި ހަރަކާތްތެރިވާ ކޯޗުންގެ ފެންވަރު މަތިކުރުން ކަމަށްވެސް ސޮބާހު ވިދާޅުވިއެވެ.
"އެންމެ ފުރަތަމަ ލީގު ފެށިއިރު އަޅުގަނޑުމެން އަތުގައި ނުހުންނާނެ ރިޕްލޭ ސިސްޓަމެއްވެސް، އެހެންނަމަވެސް މިހާރު މިދިޔަ އަހަރު ލީގު ނިންމާލީ ކޮންމެ ލޮކޭޝަނެއްގައި ޖަޖުން ސްކޯދިނުމުގެ ކުރިން ރިޕްލޭ ބެލޭނެ ގޮތަށް.މުޙައްމަދު ސޮބާހު - އެމްއެސްއޭގެ ރައީސް
މިދިޔަ އަހަރުގެ ސާފް ލީގަކީ ޖަޖިންގައި އެއްވެސް މައްސަލައެއް ދިމާނުވެ ނިންމާލެވުނު ލީގެއްކަން ފާހަގަކުރައްވަމުން ސޮބާހު ވިދާޅުވީ އެއީ ލިބިގެންދިޔަ ވަރަށް ބޮޑު ހިތްހަމަޖެހުމެއް ކަމަށެވެ.