އަންނަ ޖެނުއަރީ މަހުގެ 31 ވަނަ ދުވަހު ބޭއްވުމަށް ތައްޔާރުވާ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބުގެ ކަންކަން ކުރިއަށް ނުގެންގޮސް ހުއްޓާލުމަށް ކޮމިޝަނަރ އޮފް ސްޕޯޓްސް މުޙައްމަދު ޠަލާލް އަންގަވައިފިއެވެ.
މިކަމާ ގުޅޭގޮތުން ސްޕޯޓްސް ކޮމިޝަނުން ވަނީ ނޫސް ބަޔާނެއް ނެރެފައެވެ. މި ބަޔާނުގައިވާ ގޮތުން އިންތިޚާބު ފަސްކުރަން ސްޕޯޓްސް ކޮމިޝަނަރ އެންގެވީ ސުވާލު އުފެދޭ ކަންތައްތަކެއް ހުރުމުން ކަމަށެވެ. އެފްއޭއެމްގެ ރައީސް ބައްސާމް އަދީލް ޖަލީލްގެ ދައުރު ހަމަވާން ހަ މަސް ދުވަސް ބާކީ އޮއްވައި، އިންތިޚާބު 45 ދުވަހުގެ ތެރޭގައި ބާއްވަން އެ އިދާރާގެ ހިންގާ ކޮމިޓީން ނިންމިއިރު، އެ ކޮމިޓީގެ ގާނޫނީ ސައްހަކަން ގެއްލިފައިވާ ކަމަށް ކޮމިޝަނަރުގެ ބަޔާނުގައި ވަނީ ބުނެފައެވެ.
އެފްއޭއެމުގެ އައު އިންތިޚާބު ބޭއްވުމުގެ މަސައްކަތް މިވަގުތު އެ އިދާރާއިން ކުރަމުން އަންނައިރު، އެ އިދާރާގެ ހިންގާ ކޮމިޓީގެ ފަސް މެންބަރަކު އިސްތިއުފާދީ، ކޯރަމް ގެއްލިފައިވާ ދަނޑިވަޅުގައި، އެކަންކަމާ ގުޅޭ މައުލޫމާތު އޮޅުންފިލުވުމަށް ސްޕޯޓްސް ކޮމިޝަނުން އެދިފައިވީ ނަމަވެސް، މައުލޫމާތުތައް އެދިފައިވާ މުއްދަތުގައި ނުފޮނުވާ ކަމަށް އެ ކޮމިޝަނުން ވަނީ ބުނެފައެވެ. އަދި އެ މެންބަރުން އިސްތިއުފާ ދެއްވައި ފޮނުވާފައިވާ ސިޓީތަކުގެ ކޮޕީ ސްޕޯޓްސް ކޮމިޝަނަށް ލިބިފައިވާކަންވެސް ވަނީ ފާހަގަކޮށްފައެވެ.
އޭގެ ތެރެއިން ތިން މެމްބަރުން އިސްތިއުފާ ދެއްވާފައިވަނީ މި މަހުގެ 15 ގައި ކަމަށް ސްޕޯޓްސް ކޮމިޝަނުގެ ބަޔާނުގައި ވަނީ ފާހަގަކޮށްފައެވެ. އަދި އަނެއް ދެ މެންބަރުންގެ ތެރެއިން އެއް މެންބަރަކު އިސްތިއުފާ ދެއްވާފައިވަނީ ސެޕްޓެމްބަރު 16 ގައި ކަމަށާއި، އަދި އޮކްޓޯބަރު މަހުގެ 5 ވަނަ ދުވަހުވެސް މެންބަރަކު އިސްތިއުފާދެއްވާފައިވާ ކަމަށްވެސް ވަނީ ބުނެފައެވެ. މީގެ އިތުރުން އެ އެސޯސިއޭޝަނުގެ ޖެނެރަލް ސެކްރެޓަރީގެ މަގާމުން ހުސެއިން ޖަވާޒް (ޖަވާ) ނޮވެމްބަރު މަހުގެ 24 ވަނަ ދުވަހު އިސްތިއުފާދެއްވިއިރު، އެ މަގާމަށް މެންބަރަކު އައްޔަނުކޮށްފައި ނުވާކަމަށް ސްޕޯޓްސް ކޮމިޝަނުން ވަނީ ބުނެފައެވެ.
ސްޕޯޓްސް ކޮމިޝަނުން ބުނީ އެފްއޭއެމުގެ ހިންގާ ކޮމިޓީގެ އިންތިޚާބު އިއުލާން ކޮށްފައިވާ ތާރީޚާއި، މެންބަރުން އިސްތިއުފާ ދެއްވާފައިވާ ތާޜީޚުތަކުގައި ސުވާލު އުފެދޭ ކަންތައްތަކެއް ހުރުމާއެކުވެސް، އެ މައުލޫމާތުތައް ކޮމިޝަނުގެ އޮފީހަށް ފޮނުވާފައި ނުވާ ކަމަށެވެ. އަދި އެ އެސޯސިއޭޝަނުގެ ހިންގާ ކޮމިޓީގެ ކޯރަމް ގެއްލިފައިވާތީއާވެސްއެކު، އެސޯސިއޭޝަނުން ކަންކަން ކުރިއަށްގެންދަނީ ހިންގާ ގަވާއިދާ ޚިލާފަށް ކަމަށް ސްޕޯޓްސް ކޮމިޝަނުން ވަނީ ބުނެފައެވެ.
އެހެންކަމުން އެފްއޭއެމުގައި ޖެނެރަލް ސެކްރެޓަރީއެއް މިވަގުތު ނެތުމާއި، އެސޯސިއޭޝަނުގެ ހިންގާ ކޮމިޓީގެ ކޯރަމުވެސް ގެއްލިފައިވާތީ، އެސޯސިއޭޝަނުގެ ކަންކަން އިތުރަށް ކުރިއަށް ގެންދިއުމުގައި، ފީފާ އާއި އޭއެފްސީ އަދި މޯލްޑިވްސް އޮލިމްޕިކް ކޮމިޓީ (އެމްއޯސީ) އާއެކު އިތުރަށް މަޝްވަރާކޮށް، ގޮތެއް ނިމެންދެން އިންތިޚާބުގެ ކަންކަން ހުއްޓާލުމަށް ސްޕޯޓްސް ކޮމިޝަނުން ވަނީ އަންގާފައެވެ.
އެފްއޭއެމުގެ އިންތިޚާބުގެ ކަންކަން ހުއްޓާލުމަށް ސްޕޯޓްސް ކޮމިޝަނުން އެންގިއިރު، އެ އިންތިޚާބުގައި ވާދަކުރެއްވުމަށް ދެ ކެންޑިޑޭޓަކު ވަނީ ލިޔެކިޔުންތައް ހުށަހަޅާފައެވެ. އެއީ ގައުމީ ޓީމުގެ ކުރީގެ ފޯވާޑް އަޙްމަދު ތޯރިގު (ޓޮމް) އާއި މިހާރުގެ ރައީސް ބައްސާމް އަދީލް ޖަލީލުގެ ހިންގާ ކޮމިޓީގެ މެންބަރު މުފާވިޒު ހާޝިމު (މުފާ) އެވެ.