ކުރިއަށް އޮތް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބުގައި ރައީސްގެ މަގާމަށް ވާދަކުރައްވާ ދެ ކެންޑިޑޭޓުންވެސް ކުލަބު ވެލެންސިއާގެ ތާއީދު އޮތް ސިޓީއެއް ހުށަހަޅުއްވާފައިވާކަން ހާމަވެއްޖެއެވެ.
އެފްއޭއެމުގެ އިންތިޚާބަށް ކުރިމަތިލުމުގެ ފުރުސަތު އިއްޔެ މެންދުރުފަހު 14:00 އަށް ހަމަވިއިރު، ރައީސްގެ މަގާމަށް ކުރިމަތިލައްވާފައިވަނީ ގައުމީ ޓީމުގެ ކުރީގެ ފޯވާޑް އަޙްމަދު ތޯރިގު (ޓޮމް) އާއި މިހާރުގެ ރައީސް ބައްސާމް އަދީލް ޖަލީލުގެ ހިންގާ ކޮމިޓީގެ މެންބަރު މުފާވިޒު ހާޝިމު (މުފާ) އެވެ.
އެފްއޭއެމުގެ ރައީސްގެ މަގާމަށް ކުރިމަތިލައްވާ ކޮންމެ ކެންޑިޑޭޓަކުވެސް، ފުރަތަމަ ޑިވިޝަނުގެ ތިން ކުލަބެއްގެ ތާއީދު އޮތްކަމުގެ ލިޔުމެއް ހުށަހަޅަން ޖެހެއެވެ. މައުލޫމާތު ލިބޭ ގޮތުގައި ޓޮމް އާއި މުފާވެސް ހުށަހެޅި ލިޔެކިޔުންތަކުގައި ވެލެންސިއާގެ ތާއީދު އޮތްކަމުގެ ލިޔުމެއް ހިމެނެއެވެ. އެކަމަކު ދާދިފަހުން އިންތިޚާބުވި ވެލެންސިއާގެ އައު ޗެއާމަން، ރާއްހޭގެ ތަޖުރިބާކާރު ކުޅިވަރު ނޫސްވެރިޔާ އަބްދުﷲ އަޒްމީން ވަނީ ޓޮމްގެ ކެންޑިޑެސީ ފޯމު ހުށަހަޅަން އޭނާއާއެކު، އެފްއޭއެމް ހައުސްއަށް ވަޑައިގެންފައެވެ.
"ޕީއެސްއެމް ސްޕޯޓްސް" ސްޕޯޓްސްއަށް މައުލޫމާތުދެއްވަމުން އެފްއޭއެމުގެ ޖެނެރަލް ސެކްރެޓަރީ މުޙައްމަދު ޖައުޝަން ޝަރީފް ވިދާޅުވީ ޓޮމް އާއި މުފާވެސް ވެލެންސިއާގެ ތާއީދު އޮތް ސިޓީއެއް ހުށަހަޅާފައިވާ ކަމަށް ޚަބަރު ލިބުނު ކަމަށާއި، އެކަމަކު އެ މައްސަލައިގައި ގޮތެއް ނިންމާނީ އިލެކްޓޯރިއަލް ކޮމިޓީން ކަމަށެވެ.
އެފްއޭއެމުގެ ރައީސްކަމަށް ކުރިމަތިލެއްވި ޓޮމްގެ ޓީމުގައި ނައިބު ރައީސުންގެ ގޮތުގައި ހުށަހެޅުއްވީ ރާއްޖޭގެ ކުރީގެ އެއްވަނަ ގޯލްކީޕަރު އިމްރާން މުޙައްމަދާއި، މާޒިޔާ ސްޕޯޓްސް އެންޑް ރެކްރިއޭޝަނުގެ ސީއީއޯ ހުސެއިން ޝާފިއުއެވެ. އަދި ހިންގާ ކޮމިޓީއަށް ހުށަހެޅުއްވި ނަންތަކަކީ އެފްއޭއެމުގެ ކުރީގެ ޖެނެރަލް ސެކްރެޓަރީ އަބްދުލްހަމީދު އަބްދުލްޣަފޫރު (އައްޑޯ) އާއި އެފްއޭއެމުގެ ކުރީގެ އިންޓަރިމް ރައީސް އަޙްމަދު ޝާހިރުގެ އިތުރުން މަހިބަދޫގެ އުލާ އިބްރާހީމާއި، ޓީސީގެ މުޙައްމަދު މިފްތާޙު އާއި، އަލީ ރިޒްވާން އަދި އަބްދުﷲ ނާސިޙެވެ.
ރައްޔިތުންގެ މަޖިލީހުގެ އދ. މަހިބަދޫ ދާއިރާގެ މެންބަރުކަންވެސް ކުރައްވަމުން އަންނަ ޓޮމް ވަނީ މީގެ ކުރިންވެސް އެފްއޭއެމުގެ ރައީސްގެ މަގާމު ފުރުއްވާފައެވެ. އެގޮތުން އެފްއޭއެމުގެ ރައީސްގެ މަގާމުގައި އޭނާ މަސައްކަތްކުރެއްވީ 2016 ވަނަ އަހަރުގެ މެއި މަހު ބޭއްވި އިންތިޚާބު ކާމިޔާބުކުރައްވައިގެންނެވެ. އެކަމަކު އެ މަގާމުގައި ޓޮމް މަސައްކަތްކުރައްވާފައިވަނީ ހަތަރު މަހަށްވުރެ ކުރު މުއްދަތަކަށެވެ.
އެގޮތުން އެ އަހަރުގެ ސެޕްޓެމްބަރު މަހު ތެރޭގައި ޓޮމް އާއެކު އިންތިޚާބުވި ހިންގާ ކޮމިޓީގެ ފަސް މެންބަރުން އިސްތިއުފާދެއްވުމާ ގުޅިގެން، އެ އެސޯސިއޭޝަނުގެ އަސާސީ ގަވާއިދާ އެއްގޮތަށް އައު އިންތިޚާބެއް ވަނީ ބާއްވާފައެވެ. އެ އިންތިޚާބުގައި ޓޮމްއާ ވާދަކުރައްވައި ކާމިޔާބު ހޯއްދެވީ މިހާރު އެ އިދާރާގެ ރައީސް ބައްސާމް އަދީލް ޖަލީލެވެ.
މީގެ އިތުރުން ޓޮމް އާއެކު ރައީސްކަމަށް ކުރިމަތިލެއްވި މުފާގެ ޓީމުގައި ނައިބު ރައީސުންގެ ގޮތުގައި ހުށަހެޅުއްވީ ބައްސާމުގެ ހިންގާ ކޮމިޓީން އިސްތިއުފާދެއްވި ކުލަބު ގްރީން ސްޓްރީޓްސްގެ ރައީސް މުއާވިޔަތު ޚަލީލާއި، ބުރު ސްޕޯޓްސްގެ މުޙައްމަދު އަހުސަނެވެ.
އަދި ހިންގާ ކޮމިޓީއަށް ހުށަހެޅުއްވި ނަންތަކަކީ މިހާރުވެސް އެ މަގާމު ފުރުއްވަމުން އަންނަ އަޙްމަދު ޝަކީބު (ޑޮކް) އާއި، ބުރު ސްޕޯޓްސްގެ މެނޭޖަރު އަރުޝަދު އަޝްރަފާއި، ކުޑަހެންވޭރު ޓީމުގެ ފަރާތުން ކުރީގެ ގައުމީ ޓީމުގެ ފޯވާޑް ހަސަން އަދުހަމް (ސަޑޭ) އާއި، ޔުނައިޓެޑް ވިކްޓަރީގެ ރައީސް އިސްމާޢީލް ޝަފީއު (އިއްސެ) އަދި ބުރު ސްޕޯޓްސްގެ މުޙައްމަދު ހަސަން އެވެ. އަންހެން މެންބަރުގެ މަގާމަށް ހިމަނާފައިވަނީ ގައުމީ އަންހެން ފުޓްބޯޅަ ޓީމުގެ ކުރީގެ ކުޅުންތެރިޔާ މަރްޔަމް މިރުފަތެވެ.
ކުރިއަށް އޮތް އިންތިޚާބުގައި އެފްއޭއެމުގެ ރައީސަކަށް ބައްސާމް ކުރިމަތިނުލައްވާނެކަން އިއުލާން ކުރައްވާފައިވާއިރު، މުފާ ކުރިމަތިލެއްވީ ބައްސާމުގެ ތާއިދާއެކު ކަމަށް މައުލޫމާތު ލިބެއެވެ. މުފާ އަންނަވަނީ ބައްސާމުގެ ފުރަތަމަ ދައުރުގެ ފަހު ކޮޅުން ފެށިގެން އޭނާގެ ހިންގާ ކޮމިޓީގެ މެންބަރުކަން ކުރައްވަމުންނެވެ.
ދާދި ފަހުން އެފްއޭއެމުން ވަނީ އެ އިދާރާގެ ހިންގާ ކޮމިޓީގެ 20 ވަނަ ބައްދަލުވުމުގައި އަސާސީ ގަވާއިދާ އެއްގޮތްވާ ގޮތުގެ މަތިން އަންނަ ޖެނުއަރީ މަހުގެ 31 ވަނަ ދުވަހު އައު އިންތިޚާބެއް ބޭއްވުމަށް ނިންމާފައިވާކަން ހާމަކޮށްފައެވެ. އެކަމަކު އެފްއޭއެމުގެ އިންތިޚާބާ ބެހޭ ކަންތައްތަކެއް ސާފުކޮށްދިނުމަށް އެދި، ކޮމިޝަނާ އޮފް ސްޕޯޓްސް މުޙައްމަދު ތޮލާލް ވަނީ އެފްއޭއެމަށް ސިޓީއެއް ފޮނުއްވާފައެވެ.