ކުޅިވަރު އެސޯސިއޭޝަންތަކުގެ ހިންގުން ހަރުދަނާކޮށް ކުރިއަށްގެންދިޔުމަށް އިންސާނީ ވަސީލަތް ތަރައްގީކުރުމަކީ އެންމެ މުހިންމު ކަންތައް ކަމަށް ކުޅިވަރާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގުރާމުގައި ވާހަކަދައްކަވަމުން ވަޒީރު ވިދާޅުވީ ސްޕޯޓްސް މެނޭޖުމަންޓުގެ އިތުރުން ޚިދުމަތުގެ ދާއިރާއިން ތަމްރީނުވެފައި ތިބި ބަޔަކު އެސޯސިއޭޝަންތަކުގައި މަސައްކަތްކުރަން ޖެހޭ ކަމަށެވެ. އެންމެ ފުރަތަމަ ވުޒާރާއާ ހަވާލުވެ ހުރިހާ ކުޅިވަރު އެސޯސިއޭޝަންތަކާ ބައްދަލުކުރެއްވި ކަމަށާއި، ކުރުވުނު މަޝްވަރާތަކުގައި އެސޯސިއޭޝަންތަކުގެ ހުރި ދަތިތަކާއި، މުބާރާތްތައް ފުޅާކުރަން ކުރެވޭނެ ކަންތައްތަކާ ގުޅޭގޮތުން ވާހަކަ ދެކެވުނު ކަމަށްވެސް ވިދާޅުވިއެވެ.
ވަޒީރު ވިދާޅުވީ ކުރެވުނު މަޝްވަރާގެ އަލީގައި ތަމްރީނުވެފައި ތިބެންޖެހޭ މުވައްޒަފުން އެސޯސިއޭޝަންތަކަށް ބޭނުން ޖެހިފައިވާ ކަމަށެވެ. އަދި އެސޯސިއޭޝަންތަކުގެ ޝަކުވާ އަޑުއިވިއްޖެ ކަމަށާއި، މައްސަލަތައް ހުރި ދިމަދިމާތަކުން ހައްލު ހޯދުމަށް ޕެލޭން ކުރަމުންދާ ކަމަށްވެސް ވިދާޅުވިއެވެ. މީގެ އިތުރުން ބައެއް ތަމްރީން ޕްރޮގްރާމުތައް ހިންގުމަށް ބޭރު ގައުމުތަކުގެ އެހީތެރިކަމަށް އެދިފަވާނެ ކަމަށާއި، އޭގެތެރޭގައި ކޯޗިން އަދި ސްޕޯޓްސް އެޑްމިނިސްޓްރޭޝަން ހިމެނޭ ކަމަށްވެސް ވަނީ ވިދާޅުވެފައެވެ.
"އެކަންކަން ރަނގަޅުކުރުމަށްޓަކައި ހިއުމަން ރިސޯސް މެނޭޖުމަންޓަކީ ވަރަށް މުހިންމު ކަމެއް. ސްޕޯޓްސް މެނޭޖުމަންޓާއި، އަދި އެހެންނޫނަސް ސާވިސްގެ ދާއިރާއިން އިތުރަށް މީހުން ތަމްރީނުކޮށް، އެކަން ކުރެވޭނެ ގޮތަށް އިންތިޒާމުކުރުން.ޢަބްދުﷲ ރާފިޢު - ކުޅިވަރާ ބެހޭ ވުޒާރާގެ ވަޒީރު
ވަޒިރު ވިދާޅުވީ ބައެއް އެސޯސިއޭޝަންތައް ގާއިމުވެފައި ތިބި މާހައުލު ބަދަލުކުރަން ޖެހޭކަންވެސް ފާހަގަކުރެވިފައިވާ ކަމަށެވެ. އަދި ހިންގުން ހަރުދާނާކުރުމަށް މާލީ އެހީތެރިކަމުގެ އިތުރުން، މަސައްކަތްކުރާ މާހައުލު އެންމެ އެކަށޭނެ ތަނަކަށް ވާންޖެހޭ ކަމަށްވެސް ވިދާޅުވިއެވެ. އެހެންކަމުން ހުރިހާ ރޮނގަކުން ވިސްނައިގެން ނުނީ އެސޯސިއޭޝަންތައް ހަރުދާނާނުކުރެވޭނެ ކަމަށްވެސް ވަނީ ވިދާޅުވެފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކުޅިވަރުގެ ސިޔާސަތުގެ ދަށުން ގައުމީ އެތުލީޓުންގެ މުސާރަ ބޮޑުކުރުމާއެކު، އެ އެތުލީޓުންގެ ގައުމީ ޚިދުމަތުގެ އަގު ދެމެހެއްޓެނިވި ގޮތެއްގައި ވަޒަންކުރެވޭނެ ހަރުދަނާ އިންތިޒާމެއް ގާއިމުކުރުމުގެ މަހގުސަދުގައި ޚާއްސަ ސްކީމެއް ތައާރަފުކުރުމަށް މީގެ ކުރިން ވަނީ ނިންމާފައެވެ.