ތައިލެންޑުގެ ދެކުނުގެ ސަރަޙައްދުތަކުގައި ފެންބޮޑުވެ އެތައް ހާސް ބަޔަކު ހާލުގައި ޖެހިއްޖެއެވެ. ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ މެލޭޝިޔާގެ ސަރަޙައްދީ ރޮނގު ކައިރީގައި އޮންނަ ތައިލެންޑުގެ ނަރާތިވާތު ޕުރޮވިންސަށެވެ. އެ ސަރަޙައްދުގެ ބައެއް ރަށްތަކާއި އަވަށްތައް މިހާރު އޮތީ ފެނު އަޑީގައެވެ.
ފެންބޮޑުވުމާ ގުޅިގެން ނަރާތިވާތުގައި ސްކޫލްތައް ވަނީ ބަންދު ކޮށްފައެވެ. އަދި، މަގުތަކުގައި ފެންބޮޑުވެ ރޭލު ދަތުރުފަތުރަށް ވެސް ވަނީ ހުރަސް އެޅިފައެވެ. ފެންބޮޑުވުމާ ގުޅިގެން ގެދޮރުގެ ފުރާޅުތަކުގައި ގިނަ ޢަދަދެއްގެ ބަޔަކު ތާށިވެފައިވާ ކަމަށާއި، އެ މީހުން ސަލާމަތް ކުރަން މަސައްކަތް ދަނީ ކުރަމުންނެވެ.
ނަރާތިވާތުގެ އިތުރުން އެ ޕުރޮވިންސާ އިންވެގެން އޮންނަ ޔައްލާ ޕްރޮވިންސުގެ ބޮޑު ސަރަޙައްދެއްގައި ވެސް ވަނީ ފެންބޮޑުވެފައެވެ. އެ ޕުރޮވިންސުގެ ސްކޫލްތައް ވެސް މިހާރު ވަނީ ބަންދު ކޮށްފައެވެ. މެދުކެނޑުމެއް ނެތި ވާރޭވެހުމާ ގުޅިގެން ތައިލެންޑުގައި ކަނޑުމަތީގެ ހާދިސާތަކެއް ވެސް ވަނީ ހިނގާފައެވެ. ބޯކޮށް ވާރޭވެހުމާއި ކަނޑުތައް ގަދަވުމާ ގުޅިގެން ހަތް އުޅަނދެއް ބަންޑުންޖަހައިލާފައެވެ. މި ހާދިސާތައް ހިނގާފައި ވަނީ ގަލްފް އޮފް ތައިލެންޑާއި އަންދަމާން ކަނޑުގެ ސަރަޙައްދުގައެވެ.
ފެންބޮޑުވުމާ ގުޅިގެން އެއްވެސް މީހެއްގެ ފުރާނަ ގެއްލިފައި ނުވި ނަމަވެސް، ބޮޑެތި އުމުރާނީ ގެއްލުންތަކެއް ލިބިފައިވެއެވެ. ފެންބޮޑުވެފައިވާ ސަރަޙައްދުތަކުގައި ދިރިއުޅޭ ރައްޔިތުންނަށް ރައްކާތެރި ހިސާބުތަކަށް ބަދަލުވުމަށް އިރުޝާދު ދީފައިވާއިރު، ތައިލެންޑުގެ ރޭލު ދަތުރުފަތުރުގެ ޚިދުމަތްދޭ ކުންފުނިން ބުނީ ޔައްލާއިން ދެކުނަށް ދަތުރުކުރާ ހުރިހާ ދަތުރެއް މިހާރު މެދުކަނޑައިލާފައިވާ ކަމުގައެވެ. ހުސްވި އަހަރު ތައިލެންޑުގެ ދެކުނުގެ ސަރަޙައްދުތަކުގައި ހިނގި ފެންބޮޑުވުމުގެ ހާދިސާތަކުގައި ތިން މީހަކު މަރުވިއެވެ.