ސްރީ ލަންކާގެ ކެންޑީގައި މިހާރު ކުރިއަށްދާ އެ ގައުމުގެ ނެޝަނަލް އަދި ޖޫނިއަރ ޝޯޓްކޯސް މުބާރާތުގައި ވާދަކޮށް ރާއްޖޭގެ ކުރިއަރަމުން އަންނަ ފުރާވަރުގެ ފެތުންތެރިޔާ މިރާލް އައިން ލަތީފް ރަން މެޑަލް ހޯދައިފިއެވެ.
ލަންކާގެ ކެންޑީ ހިލްވުޑް ކޮލެޖް ސްވިމިން ޕޫލުގައި އިއްޔެ ފެށި މުބާރާތުން މެރާލް ފަޚުރުވެރި ރަން މެޑަލް ހޯދީ މެންދުރުކުރީ ދަންފަޅީގައި ކުރިއަށްދިޔަ 100 މީޓަރު ބަޓަފްލައި ރޭހުގައި ވާދަކުރި 14 ފެތުންތެރިންގެ ހީޓުން ކުރި ހޯދައި، ފައިނަލުގައި އަށް ފެތުންތެރިންނާ ވާދަކޮށް ބޮޑު ތަފާތަކުން އެއްވަނަ ހޯދައިގެންނެވެ. މެރާލް ރޭސް ނިންމާފައިވަނީ އެއް މިނެޓު 13.19 ސިކުންތުންނެވެ. މިއީ ދެވަނައަށް ރޭސް ނިންމި ފެތުންތެރިޔާ އަށްވުރެ އެއް ސިކުންތުގެ ތަފާތު ވަގުތެކެވެ.
މި މުބާރާތުގައި މެރާލް ހޯދި ކާމިޔާބީއާއެކު، ލަންކާގެ ކޮލެޖުތަކުންނާއި ޓީމުތަކުން ވަނީ ދިވެހި ފެތުންތެރިން މުބާރާތުގައި ހޯދަމުންދާ ކާމިޔާބީ ފާހަގަކޮށްފައެވެ. މެރާލް އަކީ ރާއްޖޭގައި ކުރިއަރަމުން އަންނަ އަދި އުމުރުން 14 އަހަރުގެ ފެތުންތެރިއެކެވެ. މިމުބާރާތުގައި ރިލޭ ނުހިމަނައި އިންޑިވިޖުއަލް ފަސް އިވެންޓެއްގައި މެރާލް ވާދަކުރާނެއެވެ.