ގައުމީ ގްރޯން ޕްރީ 2023 ގައި ވާދަކޮށް ރާއްޖޭގެ ފިރިހެނުންގެ 1500 މީޓަރު ދުވުމުގެ ގައުމީ ޔޫތު ރިކޯޑު އަބްސަލް އަބްދުﷲ އާދަމް މުގުރާލައިފިއެވެ.
ނސީރު ސްޕޯޓްސްގެ ފަރާތުން ވާދަކުރަމުން އަންނަ އަބްސަލް ވަނީ މާލޭ އެކުވެނި ސިންތެޓިކް ޓްރެކުގައި އިއްޔެ ކުރިއަށްދިޔަ ގްރޯން ޕްރީގެ 1500 މީޓަރު ރޭސް ހަތަރު މިނެޓު 28.26 ސިކުންތުން ނިންމާފައެވެ. މި ރިކޯޑު މީގެ ކުރިން އޮތީ 2011 ވަނަ އަހަރުގެ ވޯލްޑް ޔޫތު ޗެމްޕިއަންޝިޕުގައި ގައުމީ ޓީމުގައި ހިމެނިގެން ދުވި އަޒްހަމް ވަހީދުގެ އަތުގައެވެ. އޭނާ އެ ފަހަރު ރޭސް ނިންމީ ހަތަރު މިނެޓު 29.12 ސިކުންތުންނެވެ.
ގައުމީ ގްރޯން ޕްރީގެ ފިރިހެނުންގެ 1500 މީޓަރު ރޭހުގައި ވާދަކޮށް އަބްސަލް ޔޫތު ރިކޯޑު މުގުރާލިއިރު، މި އިވެންޓުގެ އެއްވަނަ ހޯދީ ހުސެއިން ފަޒީލް ހާރޫނެވެ. އޭނާ ރޭސް ނިންމާފައިވަނީ 4 މިނެޓު 9.99 ސިކުންތުންނެވެ. މި އިވެންޓުގެ ގައުމީ ރިކޯޑު އޮތީވެސް ފަޒީލްގެ އަތުގައެވެ. އެއީ ތިން މިނެޓު 57.44 ސިކުންތުން ރޭސް ނިންމައިގެންނެވެ.
އިއްޔެ ކުރިއަށްދިޔަ އިވެންޓުގެ ދެވަނައަށް ދިޔައީ އައިލެންޑް ރަނާސް މޯލްޑިވްސްގެ ޔޫސުފް އިބްރާހީމެވެ. އޭނާ ރޭސް ނިންމާފައިވަނީ ހަތަރު މިނެޓު 14.82 ސިކުންތުންނެވެ.