ގައުމީ ގްރޯން ޕްރީ 2023 ގައި ވާދަކޮށް ރާއްޖޭގެ އަންހެނުންގެ 1500 މީޓަރު ދުވުމުގެ ގައުމީ ރިކޯޑު ފަސޫހާ އަޙްމަދު މުގުރާލައިފިއެވެ.
ޓްރެކް އެންޑް ފީލްޑް އެސޯސިއޭޝަނުގެ ފަރާތުން ވާދަކުރަމުން އަންނަ ފަސޫހާ ވަނީ މާލޭ އެކުވެނި ސިންތެޓިކް ޓްރެކުގައި އިއްޔެ ކުރިއަށްދިޔަ ގްރޯން ޕްރީގެ 1500 މީޓަރު ރޭސް ފަސް މިނެޓު 4.02 ސިކުންތުން ނިންމާފައެވެ. މި ރިކޯޑު މީގެ ކުރިން އޮތީ ޓްރެކް އެންޑް ފީލްޑް އެސޯސިއޭޝަންގެ އައިޝަތު ޖާއިޝާ ޖުނީޒްގެ އަތުގައެވެ.
އެގޮތުން ޖާއިޝާ އެންމެ ފުރަތަމަ ރިކޯޑު ހެދީ 2020 ވަނަ އަހަރުގެ އޮކްޓޯބަރު މަހު ކުރިއަށްދިޔަ ގައުމީ ސްކޮޑުގެ ޓައިމް ޓްރަޔަލްގައި ވާދަކޮށް ފަސް މިނެޓު ހަ ސިކުންތުން ރޭސް ނިންމައިގެންނެވެ. އަދި އޭގެ ފަހުން 2021 ވަނަ އަހަރުގެ ގައުމީ ގްރޯން ޕްރީގައި ޖާއިޝާ ވަނީ ފަސް މިނެޓު 5.36 ސިކުންތުން ރޭސް ނިންމާފައެވެ.
ޖާއިޝާގެ ރިކޯޑު ފަސޫމާ މުގުރާލިއިރު، އޭނާ ވަނީ މި އަހަރު ހަަތަރު މަސް ދުވަހުގެ ތެރޭގައި ތިން ފަހަރަށް ރާއްޖޭގެ އަންހެނުންގެ 800 މީޓަރު ދުވުމުގެ ގައުމީ ރިކޯޑު އައުކޮށްފައެވެ.
ގައުމީ ގްރޯން ޕްރީގެ އަންހެނުންގެ 1500 މީޓަރު ރޭހުގައި ވާދަކޮށް ފަސޫހާ ރިކޯޑު މުގުރާލިއިރު، މި އިވެންޓުގެ ދެވަނައަށް ދިޔައީ އަހުމަދިއްޔާ އިންޓަނޭޝަނަލް ސްކޫލުގެ އައިޝަތު ބިންތި އަޙްމަދެވެ. އޭނާ ރޭސް ނިންމާފައިވަނީ ފަސް މިނެޓު 38.99 ސިކުންތުންނެވެ. އަދި ތިންވަނައަށް ދިޔަ ޓްރެކް އެންޑް ފީލްޑުގެ ޒީކް އަޝްރަފް ރަޝީދު ރޭސް ނިންމާފައިވަނީ ފަސް މިނެޓު 44.61 ސިކުންތުންނެވެ.