އިނގިރޭސި ޕްރިމިއާ ލީގުގައި ރޭ ޝެފީލްޑް ޔުނައިޓެޑާ އެއްވަރުވެ، ތާވަލުގެ އެއްވަނައަށް އަރަން ލިބުނު ފުރުސަތު އެސްޓަން ވިލާއިން ނަގާލައިފިއެވެ.
ވިލާގެ ދަނޑުގައި ކުޅުނު މި މެޗު ނިމެނީ 1-1 ގެ ނަތިޖާއަކުން އެއްވަރުވެގެންނެވެ.
މި މެޗުން ވިލާ އެއްވަރުވުމާއެކު އަމިއްލަ ދަނޑުގައި އެ ޓީމުން ދަމަހައްޓަމުން އައި މޮޅުވުމުގެ ރިކޯޑަށް ވަނީ ނިމުން އައިސްފައެވެ. އެގޮތުން ރޭގެ މެޗުގެ ކުރިން އަމިއްލަ ދަނޑުގައި ކުޅުނު 15 މެޗުންވެސް ވިލާ ވަނީ މޮޅުވެފައެވެ.
ރޭގެ މެޗު އެއްކޮށް ކަހަލަ ގޮތަކަށް ވިލާއިން ޑޮމިނޭޓުކޮށްގެން ކުޅުނުއިރު، ޝެފީލްޑުން ކުޅެފައިވަނީ ޑިފެންސަށް އިސްކަން ދީގެންނެވެ. މި މެޗުގެ ފުރަތަމަ ހާފުގައި ލަނޑެއް ފެނިފައި ނުވާއިރު، ދެވަނަ ހާފު ފަށައިގެން 14 ވަނަ މިނެޓުގައި ވިލާގެ ލެއޯން ބެއިލީ ވަނީ ލަނޑެއް ޖަހާފައެވެ. އެކަމަކު އެ ލަނޑު ޖެހުމުގެ ކުރިން ޝެފީލްޑުގެ ގޯލްކީޕަރަށް ވިލާގެ ޖޭކަބް ރަމްސޭ ފައުލުކުރުމާ ގުޅިގެން، ވީއޭއާރް ބެލުމަށްފަހު އެ ލަނޑު ބަލައިގެންފައެއް ނުވެއެވެ.
އެއާއެކު މެޗު ނިމެން ތިން މިނެޓަށް ވެފައި ވަނިކޮށް ޝެފީލްޑުން ވަނީ ލީޑު ނަގާފައެވެ. ގުސްޓާވޯ ހެމާ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ވިލާގެ ކުރީގެ ފޯވާޑް ކަމޭރޮން އާޗާއެވެ. އެކަމަކު މެޗުގެ އިތުރު ވަގުތުގެ ހަތްވަނަ މިނެޓުގައި ވިލާއިން ވަނީ ނަތީޖާ އެއްވަރުކޮށްފައެވެ. ޑަގްލަސް ލުއިޒް ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ބަދަލަކަށް ކުޅެން އެރި ނިކޯލޯ ޒަނިއޯލޯއެވެ.
މި ނަތީޖާއާއެކު ތާވަލުގެ އެއްވަނައަށް އަރަން ލިބުނު ފުރުސަތު ވިލާއިން ނަގާލިިއިރު، އެ ޓީމު އޮތީ ތާވަލުގެ ދެވަނައިގައި ކުޅުނު 18 މެޗުން ލިބުނު 39 ޕޮއިންޓާއެކުއެވެ. ހަމަ އެ އަދަދަށް ޕޮއިންޓް ހަމަކޮށްގެން ތާވަލުގެ އެއްވަނައިގައި އޮތީ ވިލާއަށް ވުރެ އެއް މެޗު މަދުން ކުޅެފައިވާ އާސެނަލެވެ. އަދި ތިންވަނައިގައި އޮތް ލިވަޕޫލަށް 17 މެޗުން ވަނޫ 38 ޕޮއިންޓް ލިބިފައެވެ.