ފަލަސްޠީނުގެ ޣައްޒާގެ މުސްލިމުންނަށް އިންސާނީ އެހީތެރިކަން ފޯރުކޮށްދިނުމުގެ މަގުފަހިކޮށްދިނުމަށް ގޮވައިލާ އެކުވެރި ޢަރަބި އިމާރާތް (ޔޫއޭއީ)ން އދގެ ސަލާމަތީ މަޖިލީހަށް ހުށަހެޅުމަށް ތައްޔާރު ކޮށްފައިވާ ޤަރާރު ވީޓޯ ނުކުރާނެ ކަމުގެ އިޝާރާތެއް އެމެރިކާއިން ދީފިއެވެ. ޔަހޫދީންނާ ދެކޮޅަށް ޤަރާރެއް ހުށަހެޅުމަށް ޔޫއޭއީން މަސައްކަތް ކުރަމުންދާއިރު، ޤަރާރުގެ ދެލިކޮޕީގައި އޮތް އެއްޗަކާ މެދު އެމެރިކާއިން ހިތްހަމަނުޖެހުމުން މި ޤަރާރަށް ވޯޓަށް އެހުން އދގެ ސަލާމަތީ މަޖިލީހުން ވަނީ ހަތަރު ފަހަރެއްގެ މަތިން ފަސް ކޮށްފައެވެ.
ޔަހޫދީންނާ ދެކޮޅަށް ސަލާމަތީ މަޖިލީހަށް މީގެ ކުރިން ހުށަހަޅާފައިވާ ޤަރާރުތައް އެމެރިކާއިން ވަނީ ވީޓޯގެ ބާރު ބޭނުންކޮށް ފޭލު ކޮށްލާފައެވެ. އަދި، އެމެރިކާއިން މިހާރު ވެސް މަސައްކަތް ކުރަނީ، ޤަރާރުގައިވާ ލިޔުން ބަދަލު ކުރާށެވެ. އަދި، ޔަހޫދީންގެ ޢުދުވާންތައް ކުށްވެރި ކުރުމަށް ޤަރާރުގެ ދެލިކޮޕީގައި ލިޔެފައިވާތީ އެ ކަން ބަދަލު ކުރަން މަސައްކަތް ކުރަމުންނެވެ.
ޔޫއޭއީގެ ޤަރާރު ވީޓޯ ނުކުރާނެ ކަމުގެ އިޝާރާތެއް އެމެރިކާއިން ދީފައި ވަނީ، ޤަރާރުގައި ކުރިން ލިޔެފައިވާ ބައެއް ބަސްތައް ބަދަލު ކުރުމުންނެވެ. އަދި، ބައެއް ބައިތައް އުނި ކުރުމުންނެވެ. މި މައްސަލައިގައި ޔަހޫދީން ކުށްވެރިވާނެ ފަދަ އެއްވެސް ބަހެއް ބޭނުން ކުރުމަށް އެމެރިކާއިން ދެކޮޅެވެ. ޔަހޫދީންގެ ޢުދުވާން ހުއްޓައިލުމަށް ގޮވައިލުމަށް ވެސް އެމެރިކާއިން ދެކޮޅު ހަދައެވެ.
ޔޫއޭއީގެ ޤަރާރުގައި މިހާރު އޮތް ގޮތުން، ޣައްޒާއަށް އިންސާނީ އެހީގެ ސާމާނު އެތެރެ ކުރުމަށް ޔަހޫދީން ވެސް އަދި ޙަމާސުން ވެސް ހުރަސް އަަޅައިގެން ނުވާނެއެވެ. އަދި، ދެ ފަރާތުގެ ދެމެދުގައި ޙަމަލާ ބަދަލު ކުރުން ދާއިމަށް ހުއްޓައިލުމަށް މަސައްކަތް ކުރެވޭނެ މާޙައުލެއް ގާއިމު ކުރަން ޖެހޭނެއެވެ. އެ ޤަރާރުގައި، ޔަހޫދީންގެ ޢުދުވާންތައް ހުއްޓައިލަން ޖެހޭނެ ކަމަށް އޮތް ބައި އެމެރިކާގެ އެދުމުގެ މަތިން މިިހާރު ވަނީ އުނިކޮށްފައެވެ.
"މިހާރު އޮތް ގޮތަށް ޤަރާރު ހުށަހަޅައިފި ނަމަ، އެމެރިކާއިން ޤަރާރާ އެއްކޮޅަށް ވޯޓު ދޭން އޮތީ ތައްޔާރަށް،" އދގައި ހުންނަވާ އެމެރިކާގެ ސަފީރު ލިންޑާ ތޮމަސް-ގްރީންފީލްޑް ވިދާޅުވިއެވެ. އަދި، ޤަރާރުގައި ބޭނުން ކޮށްފައިވާ ބައެއް ބަސްތައް އުނިކޮށް، ޔަހޫދީންގެ ޢުދުވާން ކުށްވެރި ކުރާ ކަމަށް ލިޔެފައިވާ ބައި އުނި ކުރަން އެމެރިކާއިން މަސައްކަތް ކޮށްފައިވާ ކަމަށް ކުރެވޭ ތުހުމަތުތައް އޭނާ ވަނީ ދޮގު ކުރައްވާފައެވެ.
މަސްރަޙު ދިރާސާކުރާ ފަރާތްތަކުން ބުނީ، ޔޫއޭއީގެ ޤަރާރާ މެދު ފަލަސްޠީނާއި ރަޝިޔާގެ ސަފީރުން ހިތްހަމަނުޖެހޭ ކަމުގައެވެ. އަދި، ޤަރާރު އަލުން އެކުލަވައިލަން އެ ބޭފުޅުން ބޭނުންވާ ކަމުގައެވެ. މިއީ، ޤަބޫލު ކުރެވޭނެ ބަދަލުތަކެއް ނޫން ކަމަށް ބައެއް ސަފީރުން ދެކެވަޑައިގަންނަވާ ކަމުގައި ވެސް މަސްރަޙު ދިރާސާ ކުރާ ފަރާތްތަކުން ބުނެއެވެ.
"ޣައްޒާގައި ދިރިއުޅޭ މުސްލިމުންގެ ހާލަތު ރަނގަޅު ކުރަން، ފަސޭހަ ކޮށްދޭން ހުށަހަޅާ ކޮންމެ ޤަރާރަކާ އެމެރިކާއިން ދެކޮޅު ހަދާނެ. އެމެރިކާގެ ތާޢީދު ލިބިގެން ފާސްކުރާ އެއްވެސް ޤަރާރަކުން ފަލަސްޠީނުގެ ރައްޔިތުންނަށް ކުރާނެ އެއްވެސް ފައިދާއެއް ނޯންނާނެ ކަން ޔަގީން،" މެދުއިރުމަތީގެ މަސްރަޙު ދިރާސާ ކުރައްވާ ބޭފުޅެއް ކަމުގައިވާ މުޢީން ރައްބާނީ ވިދާޅުވިއެވެ.
ޔޫއޭއީގެ ޤަރާރަށް އދގެ ސަލާމަތީ މަޖިލީހުގައި ވޯޓަށް އަހަން ތައްޔާރުވަމުންދާ ދަނޑިވަޅުގައި، ޣައްޒާގެ 2.3 މިލިޔަނެއްހާ މުސްލިމުންގެ އާބާދީ އޮތީ ހައިހޫނު ކަމުގެ ކާރިސާއެއްގެ ކުރިމަތީގައި ކަމުގައި އދގެ އިދާރާތަކުން ވަނީ ބުނެފައެވެ. އޮކްޓޫބަރު 7 ވަނަ ދުވަހު ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 20,057 އަށް އަރާފައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 52,000 އަށް އަރާއިރު، އެ މީހުންނަށް ފަރުވާ ދެވޭނެ ގޮތެއް ޣައްޒާގެ ހޮސްޕިޓަލްތަކުގައި ނެތެވެ.