ސްޕެނިޝް ލީގުގައި ރޭ ފަހު ވަގުތު ޑިޕޯޓިވޯ އަލަވޭސް ބަލިކޮށް ތާވަލުގެ އެއްވަނައަށް ރެއާލް މެޑްރިޑް ޖެހިލައިފިއެވެ.
ރަށުން ބޭރުގައި ކުޅުނު މެޗުން ރެއާލް މޮޅުވީ 1-0 ގެ ނަތީޖާއަކުންނެވެ.
މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، ދެވަނަ ހާފުގެ ކުރީކޮޅު ރެއާލުގެ ނަޗޯއަށް ވަނީ ސީދާ ރަތް ކާޑެއް ދައްކާފައެވެ. އޭނާއަށް ރަތް ކާޑެއް ދެއްކީ އަަލަވޭސްގެ ސާމޫ އޮމޮރޮއްދީނަށް ކުރި ނުރައްކާތެރި ފައުލަކާ ގުޅިގެންނެވެ.
އެއާއެކު މެޗުގެ ދެވަނަ ހާފުގެ ބޮޑުބައި ރެއާލުން ކުޅުންތެރިއަކު މަދުކޮށް ކުޅުނު ނަމަވެސް، މެޗުގެ އިތުރު ވަގުތުގެ ތެރޭގައި އެ ޓީމުން ވަނީ ލީޑު ނަގާފައެވެ. ޓޯނީ ކްރޫސް ނަަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ލޫކަސް ވަޒްކޭޒެވެ.
ރޭގެ މެޗުތަކާއެކު ސްޕެނިޝް ލީގުގެ ކުޅުން މި އަހަރަށް މެދުކަނޑާލިއިރު، ރެއާލް އެއްވަނައަށް ޖެހިލީ ކުރިން އެ މަގާމުގައި އޮތް ޖިރޯނާއަށް ރޭ ކުޅުނު މެޗުން މޮޅުނުވެވުމުންނެވެ. ރެއާލް ބެޓިސް ދަނޑުގައި ރޭ ޖިރޯނާ ވަނީ 1-1 ގެ ނަތީޖާއަކުން އެއްވަރުވެފައެވެ.
އެއާއެކު ތާވަލުގެ އެއްވަނައިގައި އޮތް ރެއާލާއި ދެވަނައިގައި އޮތް ޖިރޯނާއަށް ކުޅުނު 18 މެޗުން 45 ޕޮއިންޓް ލިބިފައިވާއިރު، ރެއާލަށް ކުރި ލިބެނީ ލަނޑުގެ ތަފާތުންނެވެ.