ދިވެހި ފުޓްބޯޅައިގައި ހާލަތު އެންމެނަށްވެސް އެނގޭ ކަމަށާއި، އެ ހާލަތު ބަދަލުކުރުމަކީ ވަރަށް ޗެލެންޖިން މަސައްކަތެއް ކަމަށް ކުލަބު އީގަލްސްގެ ކޯޗު މުޙައްމަދު ޝިޔާޒް (މޯހަން) ބުނެފިއެވެ.
އެމްޑަބްލިއުއެސްސީ ދިވެހި ޕްރިމިއާ ލީގުގައި އަންގާރަ ދުވަހުގެ ހަވީރު ލީގުގެ ފަހު މެޗުގައި އީގަލްސް ވަނީ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އަތުން 1-0 ގެ ނަތީޖާއަކުން ބަލިވެފައެވެ. މިއީ މި ސީޒަނުގެ ލީގުގައި އީގަލްސް ބަލިވި ހަމައެކަނި މެޗެވެ. އެއާއެކު އީގަލްސްއިން ލީގު ނިންމާލީ ތާވަލުގެ ދެވަނައިގައި އޮވެގެންނެވެ.
އެ މެޗަށްފަހު މީޑިއާތަކަށް ދިން އިންޓަވިއުއެއްގައި މޯހަން ބުނީ ނުވަދިހައިގެ ފަހުކޮޅާއި ދެހާހުގެ ކުރީކޮޅު ދިވެހި ފުޓްބޯޅަ އޮތް ހަމައަށް ގެންދިޔުމަށް ކުރަންހުރި މަސައްކަތް ދެގުނަވެފައިވާ ކަމަށެވެ. އަދި ފުޓްބޯޅައިގައި ހާލަތު އެންމެނަށްވެސް އެނގޭ ކަމަށާއި، އެ ހާލަތު ބަދަލުކުރުމަށް ކުރަން ހުރި މަސައްކަތަކީ ޗެލެންޖިން މަސައްކަތްތަކެއް ކަމަށްވެސް ބުންޏެވެ.
މޯހަން ބުނީ ހަމައެކަނި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ބަދަލުތަކެއް ގެނެސްގެން އެ ހާލަތުން އަރައިގަންނަން އުނދަގޫވާނެ ކަމަށެވެ. އޭގެ ބަދަލުގައި ފުޅާކޮށް ވިސްނައިގެން ބަދަލުތަކެއް އަންނަން ޖެހޭ ކަމަށްވެސް ވަނީ ބުނެފަ އެވެ.
މޯހަން މިހެން ބުނިއިރު، މާލީ މައްސަލަތަކާ ގުޅިގެން ދެވަނަ ބުރަށްފަހު ލީގު ވަނީ ނިންމާލާފައެވެ. މި އަހަރުގެ ދިވެހި ޕްރިމިއާ ލީގު ނިންމާލިއިރު ކުލަބު ވެލެންސިއާ އާއި ކުލަބު ގްރީން ސްޓްރީޓްސް ވަނީ މާލީ ދަތިކަމާ ގުޅިގެން ދެވަނަ ބުރުގެ ވަކި ހިސާބަކުން ލީގުން ވަކިވެފައެވެ.