ޓެކާސް ގްރޭޓާ މާލެ ކަޕުގެ ފައިނަލް މެޗުގައި ބީޖީ ސްޕޯޓްސް ކުލަބު ބަލިކޮށް، މުބާރާތުގެ ޗެމްޕިއަންކަން ގާފަރު ފުޓްސަލް ޓީމުން ހޯދައިފިއެވެ.
ހުޅުމާލޭ ރެހެންދި ފުޓްސަލް ދަނޑުގައި ރޭ ކުޅުނު މެޗު ގާފަރުން ކާމިޔާބުކޮށްފައިވަނީ 3-1 ގެ ނަތީޖާއަކުންނެވެ.
މި މެޗުގައި ގާފަރުގެ ލަނޑުތައް ޖަހައިދިނީ ސާމިން މުޙައްމަދު ނަސީރާއި، އިބްރާހިމް ރިމާހެވެ. އަދި އެ ޓީމުގެ އަނެއް ލަނޑަކީ ބީޖީ ކުޅުންތެރިއެއް އަތުން ބައިކޮޅަށް ވަން ލަނޑެކެވެ. މި މެޗުގައި ބީޖީން ކާމިޔާބުކުރި ހަމައެކަނި ލަނޑު އެ ޓީމަށް ޖަހައިދިނީ ހައްފާފް ސިދުގީއެވެ.
މި މުބާރާތުގެ ގުރޫޕް ސްޓޭޖުގައިވެސް މި ދެ ޓީމު ހިމެނުނީ އެއް ގުރޫޕެއްގައެވެ. އެގޮތުން ގުރޫޕް ސްޓޭޖުގައި މި ދެ ޓީމު ބައްދަލުކުރި މެޗު ނިމުނީ 3-3 ގެ ނަތީޖާއަކުން ދެ ޓީމު އެއްވަރުވެގެންނެވެ.
ފައިނަލް މެޗުގެ މޮޅު ކުޅުންތެރިޔާގެ މަގާމާއި މުބާރާތުގެ މޮޅު ކުޅުންތެރިޔަކަށް ވެސް ހޮވުނީ ގާފަރުގެ އަލީ މާއިސް (މައްޓު) އެވެ. މުބާރާތުގައި އެންމެ ގިނަ ލަނޑު ޖެހި ކުޅުންތެރިއަކަށް ހޮވުނީ 10 ލަނޑު ހަމަކުރި ފަސްގަނޑު ސްޕޯޓްސްގެ ތޮލާލް ނަސީރެވެ.
މީގެ އިތުރުން މި މުބާރާތުގެ އެންމެ މޮޅު ފަސް ކުޅުންތެރިންނަށް ހޮވުނީ ގާފަރުގެ ސާމިން އާއި ރިމާހުގެ އިތުރުން، ބީޖީގެ މުޙައްމަދު ޔަފާއު އާއި ފަސްގަނޑު ސްޕޯޓްސްގެ ތޮލާލް އަދި ޖޭޖޭ ސްޕޯޓްސްގެ އަލީ ޝިޔާހެވެ. އެންމެ މޮޅު ގޯލްކީޕަރަކަށް ގާފަރުގެ ފައްޔާޒް ފަޔާޒް (ފައިއްޓެ) ހޮވުނުއިރު، އެންމެ މޮޅު ކޯޗަކަށް ހޮވުނީ ގާފަރުގެ އަޙްމަދު ނިޝާނެވެ.