މިހާރު މާލޭގައި އައުޓްޑޯ ކުޅިވަރުތަކަށް ޚާއްސަކުރެވިފައިވާ މާފަންނު ކުޅިވަރު އެކުވެނި ސަރަހައްދު، ޒަމާނީ ފެންވަރަށް ބަދަލުކުރުމުގެ ވިސްނުން ގެންގުޅުއްވާ ކަމަށް ކުޅިވަރާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ސަރުކާރުގެ ކުޅިވަރު ސިޔާސަތުގެ މައުލޫމާތު ހިއްސާކުރައްވަމުން ވަޒީރު ވިދާޅުވީ މާލެ ސަރަހައްދުގައި ބިމު ދަތިކަން އިންތިހާއަށް ބޮޑު ކަމަށެވެ. އެހެންކަމުން އެ ވުޒާރާގެ ވިސްނުމަކީ މިހާރު ކުޅިވަރު އެކުވެނީގެ ބިމުގެ ބޭނުން ތަންކޮޅެއް ބޮޑަށް ކުރެވި، ގިނަ ދަނޑުތަކެއް އެޅި، ގިނަ ކުޅިވަރުތަކަކަށް ޚާއްސަ ކުރެވިގެންދާނެ ތަނަކަށް ރީ-ޑިޒައިންކޮށް ބަދަލުކުރުން ކަމަށްވެސް ވިދާޅުވިއެވެ. އަދި ވިދާޅުވީ އަލުން އެހެން ކޮންސެޕްޓަކަށް ކުޅިވަރު އެކުވެނި ބަދަލުކުރެއްވުމަކީ ވުޒާރާގެ ވިސްނުމެއް ކަމަށެވެ.
"މިހާރު ހުރި ގޮތަށްވުރެން އެއްވުރެން ރަނގަޅަށް، ބިމުގެ ބޭނުން ކުރެވި ގިނަ ބަޔަކަށް ނުވަތަ ގިނަ ދަނޑުތަކެއް އެކުލެވޭ ގޮތަށް، ގިނަ ކުޅިވަރު އެކުލެވޭ ގޮތަށް އެތަން ރީ-ޑިޒައިންކޮށް، އަލުން އެތަން ފަރުމާކުރުމުގެ ވިސްނުން އެބަހުރި.ޢަބްދުﷲ ރާފިޢު - ކުޅިވަރާ ބެހޭ ވަޒީރު
ހަފުތާ 14 ގައި މިހާރު ހިމެނޭ ކަންކަމުގެ މަސަކަތް ބާރަށް ކުރިއަށްދާތީ، މި ކޮންސެޕްޓް އެކުލަވާލަނީ ތަންކޮޅެއް ފަހުން ކަމަށް ވަޒީރު ވިދާޅުވިއެވެ.
ހަފުތާ 14 ގެ މަގުޗާޓުގައި ކުޅިވަރަށް ޚާއްސަ ކޮންޕްލެކްސްގެ މަސައްކަތްވެސް ހުރިކަން ފާހަގަކުރައްވައި ވަޒީރު ވިދާޅުވީ ސަކާރުގެ ކުޅިވަރުގެ ސިޔާސަތުގައި ހުރީ ވަރަށް ބޮޑެތި މަޝްރޫއުތަކެއް ކަމަށާއި، ފުރަތަމަ ވިސްނުމަކީ ހަފުތާ 14 ހިމެނޭ ކަންތައްތައް ރޭވިފައިވާ ތާވަލާ އެއްގޮތަށް ނިންމުން ކަމަށެވެ.