ނެގެޓިވް ގިނަ ކަންކަމާއެކުވެސް ޕޮޒިޓިވް ކަންކަން ދިވެހި ފުޓްބޯޅައިގައި އެބަހުރި ކަމަށް މާޒިޔާ ސްޕޯޓްސް އެންޑް ރެކްރިއޭޝަނުގެ ކޯޗު ބޮސްނިއާގެ މިލޮމީރް ސެސްލިޖާ (މިލޯ) ބުނެފިއެވެ.
މިލޯގެ އިރުޝާދުގެ ދަށުން މާޒިޔާއިން ވަނީ މެޗަކުން ބަލިނުވެ މި އަހަރުގެ ދިވެހި ޕްރިމިއާ ލީގު ކާމިޔާބުކޮށްފައެވެ. މާޒިޔާއިން ލީގު ޗެމްޕިއަންކަން ކަށަވަރުކުރީ ގައުމީ ފުޓްބޯޅަ ދަނޑުގައި އަންގާރަ ދުވަހު ކުޅުނު ލީގުގެ ފަހު މެޗުގައި 1-0 ގެ ނަތީޖާއަކުން ކުލަބު އީގަލްސް ބަލިކޮށްގެންނެވެ. މިއީ މާޒިޔާއިން ލީގު ޗެމްޕިއަންކަން ހޯދި ފަސްވަނަ ފަހަރެވެ. އަދި އެ ޓީމުން މި ވަނީ ޖެހިޖެހިގެން ހަތަރުވަނަ ފަހަރަށް ލީގު ކާމިޔާބުކޮށްފައެވެ.
މިލޯގެ އިރުޝާދުގެ ދަށުން މާޒިޔާއިން ލީގު ކާމިޔާބުކުރިއިރު، އޭނާ އެ ޓީމާ ހަވާލުވެފައިވަނީ މި ސީޒަނުގެ މެދުތެރެއިންނެވެ. އެގޮތުން މި ސީޒަން މާޒިޔާއިން ފެށީ ބަލްގޭރިއާގެ ކޯޗު އިވާން ވެންކޯފް އާއެކުގައެވެ. އޭނާއާއެކު މާޒިޔާއިން ވަނީ މި ފަހަރުގެ ޗެރިޓީ ޝީލްޑާއި، ޕްރެޒިޑެންޓްސް ކަޕް އުފުލާލާފައެވެ.
އީގަލްސްއާ ދެކޮޅަށް ކުޅުނު މެޗަށްފަހު މީޑިއާތަކަށް ދިން އިންޓަވިއުއެއްގައި މިލޯ ބުނީ އޭނާއަށް ކުރެވުނު ތަޖުރިބާގެ އަލީގައި ނެގަޓިވް ގިނަ ކަންކަމާއެކުވެސް ދިވެހި ފުޓްބޯޅައިގައި ޕޮޒިޓިވް ކަންކަން ދިވެހި ހުރުކަން އޭނާއަށް ފާހަގަކުރެވިފައިވާ ކަމަށެވެ. އެގޮތުން ރާއްޖޭގައި ތިބީ ސަރަހައްދީ ފެންވަރަށް ބަލާއިރު ހުނަރުހުރި މޮޅެތި ކުޅުންތެރިން ކަމަށްވެސް ވަނީ ބުނެފައެވެ.
މި ފަހަރުގެ ލީގުގައި އެންމެ ފުރަތަމަ ތިން ބުރެއް ކުޅުމަށް ނިންމި ނަމަވެސް، މާލީ މައްސަލަތަކާ ގުޅިގެން ދެވަނަ ބުރަށްފަހު ލީގު ވަނީ ނިންމާލާފައެވެ. ޗެމްޕިއަންކަން ހޯދި މާޒިޔާއަށް ލީގުގައި ކުޅުނު 14 މެޗުން 40 ޕޮއިންޓް ލިބުނުއިރު، ދެވަނައިގައި ނިންމި އީގަލްސްއަށް 14 މެޗުން ލިބުނީ 35 ޕޮއިންޓެވެ.