މާލީ ދަތިތަކާއި އިދާރީ މައްސަލަތައް ކުރިމަތިވެފައިވާ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މި އަހަރުގެ އެފްއޭ ކަޕް ފުޓްބޯޅަ މުބާރާތް ނުބާއްވަން ނިންމައިފިއެވެ.
އެފްއޭއެމުގެ ޖެނެރަލް ސެކްރެޓަރީ މުޙައްމަދު ޖައުޝަން ޝަރީފް ވަނީ މި އަހަރުގެ އެފްއޭ ކަޕް ނުބާއްވާނެކަން ހާމަކުރައްވާފައެވެ. ޖައުޝަން ވިދާޅުވީ އަންނަ ޖެނުއަރީ މަހު 31 ވަނަ ދުވަހު ބާއްވަން އިއުލާނުކޮށްފައިވާ އެފްއޭއެމުގެ އިންތިޚާބުގެ ކުރިން ދެން އޮންނާނެ ހަމައެކަނި މުބާރާތަކީ ދެވަނަ ޑިވިޝަން ފުޓްބޯޅަ މުބާރާތް ކަމަށެވެ.
މި އަހަރުގެ އެފްއޭ ކަޕް ނުބާއްވަން އެފްއޭއެމުން ނިންމިއިރު، އެންމެ ފަހުން އެފްއޭ ކަޕް ބޭއްވީ މިދިޔަ އަހަރެވެ. އެކަމަކު މިދިޔަ އަހަރު އެފްއޭއެމުން އެފްއޭ ކަޕް ބާއްވާފައިވަނީ 2017 ވަނަ އަހަރުގެ ފަހުން ފުރަތަމަ ފަހަރަށެވެ.
މާލީ ދަތިތަކާހުރެ އެފްއޭއެމަށް ވަނީ މި އަހަރުގެ ތިންވަނަ ޑިވިޝަންވެސް ބޭއްވޭ ގޮތް ނުވެފައެވެ. އަދި އަންނަ އަހަރު މުޅި ރާއްޖެއަށް ހުޅުވާލައިގެން ފަށަން ނިންމި ދިވެހި ޕްރެމިއާ ލީގުގެ ކޮލިފިކޭޝަންވެސް ވަނީ ހުއްޓާލާފައެވެ. އެފްއޭ ކަޕް ނުބޭއްވުމުން މި އަހަރުގެ ސީޒަނުގައި ކުޅެފައިވަނީ ފުރަތަމަ ޑިވިޝަން ކުލަބުތަކުގެ ދެ މުބާރާތެވެ. އެއީ ދިވެހި ޕްރިމިއާ ލީގުގެ އިތުރުން ސީޒަނުގެ ފުރަތަމަ މުބާރާތް ކަމަށްވާ ޕްރެޒިޑެންޓްސް ކަޕެވެ.