މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) ގެ ތިންވަނަ ދައުރުގެ ރައީސަކަށް ހުސައިން ނިޒާމް (ނިޒޯ) ހޮވައި، އައު ހިންގާ ކޮމިޓީ އިންތިޚާބުކޮށްފިއެވެ.
އެމްބީބީއޭގެ އައު ހިންގާ ކޮމިޓީ ހޮވުމަށް ބޭއްވި ޖަލްސާގައި ރައީސަކަށް ނިޒާމް ހޮވިއިރު، ނައިބު ރައީސަކީ އަލީ އަބްދުﷲ އެވެ. ހަޒާންދާރަކަށް ހަސަން ޒަކީ ހޮވިއިރު، މި ފަހަރުވެސް ޖެނެރަލް ސެކެޓްރީއަކަށް ހޮވާފައިވަނީ ހަސަން ރަޝީދު (ރަޝް) އެވެ. ބޮޑީބޯޑިން ގައުމީ ޓީމުގެ މެނޭޖަރެއްގެ ގޮތުގައިވެސް މިދިޔަ ދެ އަހަރު މަސައްކަތްކުރީ ނިޒާމެވެ.
ބޮޑީބޯޑިންގެ އައު ރައީސް ނިޒާމަކީ މޫދު ކުޅިވަރުތައް ކުރިއެރުވުމުގައި ގިނަ މަސައްކަތްތަކެއް ކޮށްދީފައިވާ ބޭފުޅެކެވެ. ވަކިން ޚާއްސަކޮށް ސާފިން އަދި ބޮޑީބޯޑިންގެ ހަރަކާތްތަކުގައި އޭނާގެ ޚިދުމަތް ފާހަގަކޮށްލެވެއެވެ. އައު ހިންގާ ކޮމިޓީގެ ބެލުމުގެ ދަށުން ކުރިއަށްދާ ފުރަތަމަ މުބާރާތަކީ މިއަދު ފެށި ގައުމީ ބަނޑުފިލާ ޗެލެންޖެވެ.
މި މުބާާރާތް ކުރިއަށްދާނީ މިއަދުން ފެށިގެން އަންނަ ހުކުރު ދުވަހުގެ ނިޔަލަށެވެ. އެމްބީބީއޭގެ ރައީސަކަށް މިދިޔަ ދެ ދައުރުގައިވެސް ހުރީ އަބްދުﷲ އަރީފް (ފުކު) އެވެ.