އެމެރިކާ ނުވަތަ އެމެރިކާގެ އެކުވެރި ޤައުމަކަށް އަމާޒުކޮށް އުތުރު ކޮރެޔާއިން ނިއުކްލިޔަރ ޙަމަލައެއް ދީފި ނަމަ، އުތުރު ކޮރެޔާ ނައްތައިލާނެ ކަމަށް ބުނެ، އެމެރިކާއިން އެ ޤައުމަށް ވަރުގަދަ އިންޒާރެއް ދީފިއެވެ. އެމެރިކާއިން އުތުރު ކޮރެޔާއަށް އިންޒާރު ދީފައި ވަނީ، އެމެރިކާއާއި ދެކުނު ކޮރެޔާގެ އަސްކަރިއްޔާއިން ނެރުނު ގުޅިފައިވާ ބަޔާނެއްގައެވެ.
އުތުރު ކޮރެޔާގެ ނިއުކްލިޔަރ ޕުރޮގުރާމުގެ ސަބަބުން އެ ސަރަޙައްދުގެ ސަލާމަތާއި ހަމަޖެހުމަށް އޮތް ނުރައްކަލާ ގުޅޭ ގޮތުން މަޝްވަރާ ކުރުމަށް އެމެރިކާއާއި ދެކުނު ކޮރެޔާއިން ދާދި ފަހުން ވަނީ ނިއުކްލިޔަރ ކޮންސަލްޓޭޓިވް ގްރޫޕް، އެންސީޖީގެ ބައްދަލުވުމެއް ވޮޝިންޓަނުގައި ބާއްވާފައެވެ. މިއީ، ދެ ޤައުމުގެ ދެމެދުގައި މި ފަދަ ބައްދަލުވުމެއް ބާއްވާފައިވާ ދެވަނަ ފަހަރެވެ.
މި ބައްދަލުވުމުގައި މަޝްވަރާތައް އަމާޒު ކޮށްފައި ވަނީ، އުތުރު ކޮރެޔާއިން ދީފާނެ ނިއުކްލިޔަރ ޙަމަލައެއް ހުއްޓުވުމަށެވެ. މީގެ އިތުރުން، އުތުރު ކޮރެޔާއިން ނިއުކްލިޔަރ ޙަމަލައެއް ދީފި ނަމަ އަމަލު ކުރާނެ ގޮތަކާ މެދު އެމެރިކާއާއި ދެކުނު ކޮރެޔާއިން މަޝްވަރާ ކޮށްފައިވާ ކަމުގައި ރިޕޯޓުތައް ބުނެއެވެ. ބައިނަލްއަޤުވާމީ މުޖުތަމަޢާ ދެކޮޅަށް އުތުރު ކޮރެޔާއިން ދަނީ އެ ޤައުމުގެ ނިއުކްލިޔަރ އަދި މިސައިލް ޕުރޮގުރާމު ކުރިއަރުވައި، ފައްކާ ކުރަމުންނެވެ. އެމެރިކާއާއި، ދެކުނު ކޮރެޔާގެ އިތުރުން ޖަޕާނާ ހަމައަށް ވާސިލުވެވޭނެ ބެލިސްޓިކް މިސައިލްތައް ވެސް އެ ޤައުމުން ވަނީ އުފައްދައި، ޓެސްޓު ކޮށްފައެވެ.
މި ބައްދަލުވުމަށް ފަހު ނެރުނު ބަޔާނުގައި ބުނެފައި ވަނީ، އުތުރު ކޮރެޔާއިން ދެކުނު ކޮރެޔާއަށް އަމާޒުކޮށް ނިއުކްލިޔަރ ޙަމަލައެއް ދީފި ނަމަ އެމެރިކާއިން ވަގުތުން ބާރުގަދަ ފިޔަވަޅުތަކެއް އަޅާނެ ކަމުގައެވެ. އަދި، އުތުރު ކޮރެޔާގެ ޒައީމް ކިމް ޖޮންގް އުންގެ ޒަޢާމަތަށް ވަގުތުން ނިމުމެއް ގެންނާނެ ކަމަށް ބުނެ، އެމެރިކާއިން ވަނީ އުތުރު ކޮރެޔާއަށް ވަރުގަދަ އިންޒާރެއް ދީފައެވެ.
އެމެރިކާގެ އިންޒާރުތައް އައިސްފައި މި ވަނީ، އުތުރު ކޮރެޔާއިން އިންޓަރ-ކޮންޓިނެންޓަލް ބެލިސްޓިކް މިސައިލް، އައިސީބީއެމްގެ އަޖުމަ ބެލުމަށް ތައްޔާރުވަމުންދާ ކަމުގެ އަޑުތައް ގަދަވަމުންދާ ދަނޑިވަޅެއްގައެވެ. އައިސީބީއެމަކީ އެހެން ބައްރެއްގައި އޮންނަ ޤައުމަކަށް ޙަމަލަދޭން ބޭނުން ކުރެވޭނެ ދުރު ރާސްތާ މިސައިލެކެވެ. އަދި، ނިއުކްލިޔަރ ބޮން އުފުލުމުގެ ގާބިލު ކަން ލިބިފައިވާ މިސައިލެކެވެ.
ދެކުނު ކޮރެޔާގެ ޤައުމީ ސަލާމަތާ ބެހޭ މުޝީރުގެ ނައިބު ކިމް ޓެއި-ޝްޔޯ ވިދާޅުވީ އުތުރު ކޮރެޔާއިން މި މަހުގެ ތެރޭގައި އައި.ސީ.ބީ.އެމެއްގެ އަޖުމަ ބެލުމަށް ތައްޔާރުވަމުންދާ ކަމުގައެވެ. އެން.ސީ.ޖީގެ ތިންވަނަ ބައްދަލުވުން އަންނަ އަހަރު ދެކުނު ކޮރެޔާގައި ބާއްވާނެ ކަން ވެސް އެ ޤައުމުން ވަނީ ޢިޢުލާނު ކޮށްފައެވެ.