ސައުތު އޭޝިއަން ގޭމްސްގައި ވާދަކުރާ ރާއްޖޭގެ ބާސްކެޓްބޯޅަ ޓީމުތަކުގެ އަމާޒަކީ އެންމެ ފަހުން އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ހޯދި ކާމިޔާބީއަށްވުރެ ބޮޑު ކާމިޔާބެއް ހޯދުން ކަމަށް މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އިން ބުނެފިއެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަވަމުން އެ އެސޯސިއޭޝަނުގެ ސްކްރެޓަރީ ޖެނެރަލް ވިސާމް ރަޝީދު ވިދާޅުވީ އަންނަ ޖެނުއަރީ މަހުގެ އަށްވަނަ ދުވަހު ފެށުމަށް ހަމަޖެހިފައިވާ ގައުމީ ލީގަށް މި ވަގުތު ގައުމީ ޓީމުގެ ފަރިތަކުރުންތައް މެދުކަނޑާލާފަވާ ކަމަށެވެ. އަދި ފެބްރުއަރީ އަށެއްގައި ލީގު ނިމުމާއެކު ގައުމީ ޓީމުން ސައުތު އޭޝިއަން ގޭމްސްއަށް ތައްޔާރުވުމަށް މަސައްކަތް ފަށާނެ ކަމަށްވެސް ވިދާޅުވިއެވެ.
ވިސާމް ވިދާޅުވީ އެންމެ ފަހުން 2019 ވަނަ އަހަރު އޮތް ސައުތު އޭޝިއަން ގޭމްސްގައި ބާސްކެޓުގެ އަންހެން ޓީމުން ލޯ މެޑަލް ހޯދުމާއެކު، މި ފަހަރުގެ މުބާރާތުންވެސް ބޭނުންވަނީ އެ ކާމިޔާބީ ހިފެހެއްޓުން ކަމަށެވެ. އަދި އެއީ ދިފާއުކުރަން ޖެހޭ މެޑެއްޔެއް ކަމަށް އިޝަރާތްކުރައްވާ ވިސާމް ވިދާޅުވީ އެއަށް ވަރަށް ބޮޑަށް އަމާޒުހިފާނެ ކަމަށެވެ.
ވިސާމް ވިދާޅުވީ އެންމެ ފަހުގެ ގޭމްސްގައި ފިރިހެން ޓީމަށް ފަހު ވަގުތު ނާކާމިޔާބީއާ ކުރިމަތިލާން ޖެހުނު ނަމަވެސް، އަމާޒަކަށް ވާނީ މި ފަހަރުގެ ގޭމްސްގައި ކާމިޔާބެއް ހޯދުން ކަމަށެވެ. މި ފަހަރުގެ އައިއޯއައިޖީގައި ބާސްކެޓުގެ ތުރީ އޮން ތުރީގައި ލިބުނު ތާރީޚީ ކާމިޔާބީގެ ވާހަކަ ފާހަގަކުރައްވަމުން ވިސާމް ވިދާޅުވީ އެ ކާމިޔާބީތަކަކީ ބާސްކެޓުން ދަމަހައްޓަން ޖެހޭނެ ކާމިޔާބީތަކެއް ކަމަށެވެ.
އަދި މިހާރު ރާއްޖޭގައި އޮތް ޓީމުން ތުރީ އޮން ތުުރީގައި ސަރަހައްދުގެ އެއްވަނަ ހޯދުމުގެ ފެންވަރު އެބަހުރި ކަމަށާއި، އެހެންކަމުން އެސޯސިއޭޝަނުން ތުރީ އޮން ތުުރީއަށް ތަންކޮޅެއް ބޮޑަށް ސަމާލުކަންދޭނެ ކަމަށްވެސް ވިސާމް ވިދާޅުވިއެވެ.
"މި ދަންނަވަނީ ފައިވް އޮން ފައިވްއަށް ފޯކަސް ނުކުރާނެ ވާހަކައެއް ނޫން. އެހެންނަމެވެސް ތަންކޮޅެއް ބޮޑަށް ތުރީ އޮން ތުުރީއަށް ފޯކަސް ކޮށްގެން ލެވެލް އަޕްކުރުމަކީ ހަމަ ޓާގެޓެއް.ވިސާމް ރަޝީދު - އެމްބީއޭގެ ސްކެރެޓަރީ ޖެނެރަލް
މި އަހަރު މަޑަގަސްކަރައިގައި ކުރިއަށްދިޔަ އައިއޯއައިޖީގައި ރާއްޖޭގެ ބާސްކެޓްބޯޅަ ތުރީ އޮން ތުރީ ދެ ޓީމުންވެސް ވަނީ ލޯ މެޑަލް ހޯދާފައެވެ. މިއީ އައިއޯއައިޖީގައި ތުރީ އޮން ތުރީ ބާސްކެޓްބޯޅަ ޓީމުން ވާދަކުރި ފުރަތަމަ ފަހަރެވެ. އެހެންކަމުން، މިއީ ރާއްޖޭގެ ބާސްކެޓްބޯޅަ އަށް ތާރީހީ ކާމިޔާބެކެވެ.