އިނގިރޭސި ޕްރިމިއާ ލީގުގައި ރޭ ޝެފީލްޑް ޔުނައިޓެޑް ބަލިކޮށް، ތާވަލުގެ ކުރިއަށް ޗެލްސީ ޖެހިލައިފިއެވެ.
އަމިއްލަ ދަނޑުގައި ކުޅުނު މެޗުން ޗެލްސީ މޮޅުވީ 2-0 ގެ ނަތީޖާއަކުންނެވެ. މި މެޗުގެ ކުރިން ލީގުގައި ޗެލްސީން އެންމެ ފަހުން ކުޅުނު ފަސް މެޗުގެ ތެރެއިިން ތިން މެޗުން އެ ޓީމު ބަލިވެފައިވާއިރު، އެ ޓީމު މޮޅުވެފައި ވަނީ އަމިއްލަ ދަނޑުގައި ބްރައިޓަންއާ ދެކޮޅަށް ކުޅުނު މެޗުން އެކަންޏެވެ.
ރޭ ކުޅުނު މެޗުގައި ޗެލްސީން ގިނަ ވަގުތު ބޯޅަ ހިފަހައްޓައިގެން ކުޅުނުއިރު، އެ ޓީމުން ވަނީ މި މެޗުގައި ގިނަ ހަމަލާތަކެއް އުފައްދާފައެވެ. އެކަމަކު މެޗުގެ ފުރަތަމަ ހާފުގައި ދެ ޓީމުން ކުރެ ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ.
މި މެޗުގައި ޗެލްސީން ލީޑު ނަގާފައިވަނީ ދެވަނަ ހާފު ފަށައިގެން ނުވަވަނަ މިނެޓުގައެވެ. ރަހީމް ސްޓާލިން ތަނަވަސްކޮށްދިން ފުރުސަތެއްގައި މި ލަނޑު ކާމިޔާބުކޮށްދިނީ މިޑްފީލްޑަރު ކޯލް ޕާމާއެވެ. މިއީ މި ސީޒަނުގައި ލީގުގައި ކުޅުނު 14 މެޗުގައި ޕާމާ ކާމިޔާބުކުރި ހަވަނަ ލަނޑެވެ. މި މެޗުގައި ޗެލްސީން ލީޑު ފުޅާކުރީ މެޗުގެ 62 ވަނަ މިނެޓުގައެވެ. ޕާމާގެ އެހީއާއެކު މި ލަނޑު ކާމިޔާބުކޮށްދިނީ ފޯވާޑް ނިކޮލަސް ޖެކްސަންއެވެ.
މިއީ މިދިޔަ އަހަރުގެ އޮކްޓޯބަރު މަހުގެ ފަހުން ޕްރިމިއާ ލީގުގައި ޗެލްސީ ޖެހިޖެހިގެން ދެ މެޗުން މޮޅުވި ފުރަތަަމަ ފަހަރެވެ. މި މެޗުން ލިބުނު ތިން ޕޮއިންޓާއެކު ލީގުގައި މިހާތަނަށް ކުޅުނު 17 މެޗުން ލިބުނު 22 ޕޮއިންޓާއެކު، ޗެލްސީ ވަނީ ތާވަލުގެ 10 ވަނައަށް ކުރިއަށް ޖެހިލާފައެވެ. އަދި މި މެޗުން ބަލިވި ޝެފީލްޑުން ލީގުގައި ކުޅުނު 17 މެޗުން ލިބުނު އަށް ޕޮއިންޓާއެކު އެ ޓީމު މި ވަގުތު އޮތީ ތާވަލުގެ ފުލުގައެވެ.