އެމް.ޓީ.ޑީ.ސީގެ ޑިރެކްޓަރުންގެ ބޯޑުގައި ޢާންމު ޙިއްޞާދާރުން ތަމްސީލު ކުރެއްވުމަށްޓަކައި ކަނޑައެޅިފައިވާ ފަސް ޑިރެކްޓަރުންގެ މަޤާމަށް ކުރިމަތިލެއްވުމުގެ ފުރުޞަތު ހުޅުވާލައިފިއެވެ.
މިކަމާ ގުޅޭގޮތުން އެމްޓީޑީސީން ކޮށްފައިވާ އިޢުލާނެއްގައިވަނީ މިއަހަރުން ފެށިގެން އަންނަ އަހަރަށް އެމްޓީޑީސީގެ ޑިރެކްޓަރުންގެ ބޯޑުގައި ޢާންމު ޙިއްޞާދާރުން ތަމްސީލް ކުރެއްވުމަށްޓަކައި ކަނޑައެޅިފައިވާ ފަސް ޑިރެކްޓަރުންގެ މަޤާމަށް ކުރިމަތިލެއްވުމުގެ ފުރުޞަތު ހުޅުވާލާފައިވާ ކަމަށާއި މަޤާމަށް އެދި ކުރިމަތިލާ ފަރާތުގެ ކިބައިގައި ހުންނަން ޖެހޭ ޝަރުތުތަކުގެ ތެރޭގައި އެމްޓީޑީސީގެ ފަންސާސް ޙިއްޞާ އޮތް ޙިއްސާދާރެއްކަމުގައި ވުމާއި ތަޢުލީމީ އަދި ވިޔަފާރީ ނުވަތަ ފަތުރުވެރިކަމުގެ ދާއިރާއިން މަދުވެގެން 5 އަހަރުގެ ތަޖުރިބާއާއި ޤާބިލްކަން ހުރި ފަރާތެއް ކަމުގައިވުން ހިމެނެއެވެ.
ޑިރެކްޓަރުކަމަށް ކުރިމަތިލައްވާފައިވާ ފަރާތްތަކުގެ ތެރެއިން ޑިރެކްޓަރުކަމަށް އެންމެ އެކަށީގެންވާ ފަރާތްތައް ކޯޕަރޭޓް ގަވަރނަންސް ކޯޑާއި އެއްގޮތްވާގޮތުގެ މަތީން އެމްޓީޑީސީގެ ނޮމިނޭޝަން އެންޑް ރެމިއުނަރޭޝަން ކޮމެޓީން ހޮވުމަށްފަހު، އެފަރާތްތަކުގެ މަޢުލޫމާތު އެކުންފުނީގެ މިއަހަރުގެ އަހަރީ ޢާއްމު ޖަލްސާ ބޭއްވުމުގެ ކުރިން ޙިއްޞާދާރުންގެ މަޢުލޫމާތަށްޓަކައި ޢާންމުކޮށް އިޢުލާންކުރެވޭނެ ކަމަށާއި އެފަރާތްތަކުގެ ނަން އަހަރީ ޢާއްމު ޖަލްސާއަށް ހުށަހަޅައި އޭގެތެރެއިން ޙިއްޞާދާރުންނަށް ފެނިވަޑައިގަންނަވާ ފަސް ބޭފުޅުން، ޑިރެކްޓަރުންގެ ގޮތުގައި ހޮއްވެވުމަށްޓަކައި، ޙިއްޞާދާރުން ވޯޓްލުމުގެ ފުރުޞަތު ހުޅުވާލެވޭނެ ކަމަށްވެސް އެމްޓީޑީސީއިން މަޢުލޫމާތުދެއެވެ.
އެމްޓީޑީސީގެ ޑިރެކްޓަރުންގެ ބޯޑުގައި ޢާންމު ޙިއްޞާދާރުން ތަމްސީލްކުރެއްވުމަށްޓަކައި ކަނޑައެޅިފައިވާ ފަސް ޑިރެކްޓަރުންގެ މަޤާމަށް ކުރިމަތިލެއްވުމުގެ ފުރުޞަތު މިމަހުގެ ސައްބީހުގެ ނިޔަލަށް ވަނީ ހުޅުލާފައެވެ.