ދެވަނަ ޑިވިޝަން ފުޓްބޯޅަ މުބާރާތް މި މަހުގެ 19 ވަނަ ދުވަހު ފަށަން ނިންމާފައިވާ ކަމަށް ނިއު ރޭޑިއަންޓް ސްޕޯޓްސް ކުލަބުގެ ޗެއާމަން އަޙްމަދު ވާސިފް ވިދާޅުވެއްޖެއެވެ.
ޖުމްލަ 15 ޓީމާއެކު ދެވަނަ ޑިވިޝަން އެންމެ ފުރަތަމަ ބާއްވަން ތާވަލުކުރީ މިދިޔަ ނޮވެމްބަރު މަހުގެ 20 ވަނަ ދުވަހެވެ. އެއަށްފަހު އޭގެ ފަސް ދުވަސް ފަހުން މުބާރާތް ފަށާނެކަމަށް ވާހަކަ ދެކެވުނު ނަމަވެސް، އެފްއޭއެމުން ފަހުން ވަނީ މި މަހުގެ 10 ވަނަ ދުވަހު މުބާރާތް ފަށާނެކަން ހާމަކޮށްފައެވެ. ނަމަވެސް އެ ތާރީޚުގައިވެސް މުބާރާތް ފެށިފައި ނުވާއިރު، މިހާތަނަށް އައިރުވެސް މުބާރާތް ފަށާނެ ތާރީޚެއް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ހާމަކޮށްފައެއް ނުވެއެވެ.
އެއާއެކު ދެވަނަ ޑިވިޝަން ކުރިއަށްގެންދިޔުމަށް ކުރިމަތިވެފައިވާ ދަތިތަކާ ގުޅޭގޮތުން ކުޅިވަރާ ބެހޭ ވަޒީރު ޢަބްދުﷲ ރާފިޢު އާއެކު މެޖޯރިޓީ ކުލަބުތަކުން ވަނީ މި ހަފުތާގެ ތެރޭގައި މަޝްވަރާކޮށްފައެވެ.
ސޯޝަލް މީޑިއާގައި ހިއްސާކުރި ޕޯސްޓެއްގައި ދެވަނަ ޑިވިޝަނުގައި ވާދަކުރާ ނިއު ރޭޑިއަންޓުގެ ޗެއާމަން ވާސިފް ވިދާޅުވީ އެ މުބާރާތް ބޭއްވުމަށް ހިނގާ ޚަރަދު ކުޅިވަރާ ބެހޭ ވުޒާރާއިން އެފްއޭއެމަށް ފޯރުކޮށްދީފައިވާ ކަމަށް މައުލޫމާތު ލިބިފައިވާ ކަމަށެވެ. އަދި މި މަހުގެ 19 ވަނަ ދުވަހު މުބާރާތް ފެށުމަށް ދެ ފަރާތުން އެއްބަސްވެފައިވާ ކަމަށްވެސް ވަނީ ވިދާޅުވެފައެވެ.
މީގެ އިތުރުން ސްޓެލްކޯއާ ގުޅިގެން ގައުމީ ފުޓްބޯޅަ ދަނޑުގެ ލައިޓުތައް ރަނގަޅުކޮށް، ހަވީރާއި ރޭނގަޑު މެޗުތައް ކުޅުމަށް މަސައްކަތްކުރަމުންދާ ކަމަށްވެސް ވާސިފް ވަނީ ވިދާޅުވެފައެވެ. ވާސިފް މިހެން ވިދާޅުވިއިރު، ގައުމީ ފުޓްބޯޅަ ދަނޑުގެ ލައިޓިން ސިސްޓަމަށް ދިމާވެފައިވާ މައްސަލައަށް ހައްލެއް ނުލިބޭތީ، އެމްޑަބްލިއުއެސްސީ ދިވެހި ޕްރިމިއާ ލީގުގެ ބާކީ ދެ މެޗު ކުޅޭ ވަގުތު ވަނީ ހަވީރަށް ބަދަލުކޮށްފައެވެ.
މި މަހުގެ 19 ވަނަ ދުވަހު ދެވަނަ ޑިވިޝަން ފަށާނެ ކަމަށް ވާސިފް ވިދާޅުވި ނަމަވެސް، އެފްއޭއެމުގެ އެކްޓިން ޖެނެރަލް ސެކްރެޓަރީ މުޙައްމަދު ޖައުޝަން ޝަރީފާ ސުވާލުކުރެއްވުމުން ވިދާޅުވީ އެފަދަ މައުލޫމާތެއް އެފްއޭއެމަށް ލިބިފައިނުވާ ކަމަށެވެ.
ދެވަނަ ޑިވިޝަން ފުޓްބޯޅަ މުބާރާތަކީ ގިނަ ޓީމުތަކަކުން ދުރާލާ ތައްޔާރުވަމުން އަންނަ އެއް މުބާރާތެވެ. އަދި މިހާރު ދިވެހި ފުޓްބޯޅައިގައި ޓީމުތަކުން ކުރާ ޚަރަދުތަކަށް ބަލާއިރު އެންމެ އަގުބޮޑު މުބާރާތެވެ. ތިންވަނަ ފަހަރަށް މި މުބާރާތް ފަސްކުރަން އެފްއޭއެމުން ނިންމާފައިވާއިރު، ގިނަ ކުލަބުތަކަކުން ވަނީ ބޮޑު ޚަރަދުތަކެއްވެސް ކޮށްފައެވެ. އަދި ގިނަ ބިދޭސީ ކުޅުންތެރިންތަކެއްވެސް ވަނީ ގެނެސްފައެވެ.
އެގޮތުން މި އަހަރުގެ މުބާރާތަށް އެންމެ ބޮޑު ތައްޔާރުވި ދެ ޓީމު ކަމަށްވާ ނިއު ރޭޑިއަންޓާއި ވިކްޓަރީ ސްޕޯޓްސް ކުލަބުން ވަނީ ބިދޭސީ ކުޅުންތެރިންނާއި، ފުރަތަމަ ޑިވިޝަނުގެ ވަރުގަދަ ކުޅުންތެރިންނާއެކު ވަރުގަދަ ސްކޮޑުތަކެއް އެކުލަވާލާފައެވެ.
އެ ކުލަބުތަކުގެ އިތުރުން ތިންވަނަ ޑިވިޝަނުގެ ތަށި ހޯދައިގެން ދެވަނަ ޑިވިޝަނަށް އެރި ބިސްބުރު ސްޕޯޓްސް ކުލަބާއި، މަސްއޮޑި ސްޕޯޓްސް ކުލަބުންވެސް އަންނަނީ ދެވަނަ ޑިވިޝަނަށް ދުރާލާ ތައްޔާރުވަމުންނެވެ. މުބާރާތް ލަސްކުރުމާއެކު ދެވަނަ ޑިވިޝަނުގައި ވާދަކުރާ ގިނަ ކުލަބުތަކަށް ބޮޑު ގެއްލުމެއް ލިބޭނެ ކަމަށް އެ ކުލަބުތަކުން ވަނީ މީގެ ކުރިންވެސް ބުނެފައެވެ.
ދެވަނަ ޑިވިޝަން ބޭއްވުމަށް އެފްއޭއެމަށް ދަތިތަކެއް ކުރިމަތިވެފައިވާއިރު، އެ މުބާރާތް ހިންގުމަށް އުޖޫރައެއް ނެގުމެއްނެތި ކުރިއަށްދާން ތައްޔާރުކަމަށް، ބުރު ސްޕޯޓްސް ކުލަބާއި އަންހެން ގައުމީ ފުޓްބޯޅަ ޓީމުގެ ކޯޗު މުޙައްމަދު ނިޒާމް (ނިޒާމްބެ) ވަނީ މީގެ ކުރިން ހާމަކޮށްފައެވެ.