ޔުއެފާ ޗެމްޕިއަންސް ލީގުގެ ގުރޫޕް އެފްގައި ރޭ ޕީއެސްޖީއާ އެއްވަރުކޮށް، އެއްވަނަ ޓީމުގެ ގޮތުގައި ދެވަނަ ބުރުގެ ޖާގައެއް ބޮރޫޝިއާ ޑޯޓްމުންޑުން ހޯދައިފިއެވެ.
ޑޯޓްމުންޑުގެ ދަނޑުގައި ކުޅުނު މި މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.
މި މެޗުގެ ފުރަތަަމަ ހާފުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި ހާފުގައި ދެ ޓީމަށްވެސް ވަނީ ލަނޑު ޖަހާނެ ރަނގަޅު ފުރުސަތުތަކެއް ލިބިގެން ގޮސްފައެވެ. އެކަމަކު މި ހާފުގައި ދެ ޓީމުންކުރެ އެއްވެސް ޓީމަކަށް ލަނޑެއް ކާމިޔާބު ކުރެވިފައެއް ނުވެއެވެ.
މި މެޗުގެ ދެވަނަ ހާފުގައި އެންމެ ފުރަތަމަ ލަނޑު ޖަހައި ލީޑު ނެގީ ޑޯޓްމުންޑުންނެވެ. މި ހާފު ފަށައިގެން ހަވަނަ މިނެޓުގައި ނިކްލަސް ފުލްކްރޫގް ތަނަވަސްކޮށްދިން ފުރުސަތެއްގައި މި ލަނޑު ޖަހައިދިނީ ކަރީމް އެޑެޔޭމީއެވެ. އެކަމަކު އޭގެ ފަސް މިނެޓު ފަހުން ޕީއެސްޖީން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ވޮރެން ޒައީރް އެމެރީއެވެ. އަދި މެޗުގެ 76 ވަނަ މިނެޓުގައި ޕީއެސްޖީގެ ފޯވާޑް ކީލިއަން އެމްބާޕޭ ލަނޑެއް ކާމިޔާބުކުރި ނަމަވެސް، ވީއޭއާރް ބެލުމަށްފަހު ރެފުރީ ނިންމީ އެއީ އޮފްސައިޑް ލަނޑެއް ކަމަށެވެ.
މި މެޗުން ލިބުނު ޕޮއިންޓަކާއެކު ކުޅުނު ހަ މެޗުން 11 ޕޮއިންޓް ހަމަކޮށް، ގުރޫޕްގެ އެއްވަނަ ޓީމުގެ ގޮތުގައި ޑޯޓްމުންޑް ދެވަނަ ބުރުގެ ޖާގައެއް ހޯދިއިރު، ކުޅުނު ހަ މެޗުން އަށް ޕޮއިންޓް ހަމަކޮށް ގުރޫޕްގެ ދެވަނަ ޓީމުގެ ގޮތުގައި ދެވަނަ ބުރުގެ ޖާގަ ލިބުނީ ޕީއެސްޖީއަށެވެ.