ބާސްކެޓްބޯޅައަކީ ހަމައެކަނި މާލެއަށް ޚާއްސަ ކުޅިވަރެއް ނޫން ކަމަށާއި، އަތޮޅުތެރޭގެ ބައިވެރިވުން ފުޅާކުރުމުގެ ވިސްނުން ގެންގުޅުއްވާ ކަމަށް މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) ގެ ސްކެރެޓަރީ ޖެނެރަލް ވިސާމް ރަޝީދު ވިދާޅުވެއްޖެއެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަވަމުން ވިސާމް ވިދާޅުވީ ބާސްކެޓަކީ ހަމައެކަނި މާލޭގެ ކުލަބުތައް ވާދަކުރާ މުބާރާތަކަށް ވެގެން ނުދިޔުން އެއީ އަމާޒެއް ކަމަށެވެ. އަދި ހަމައެކަނި މާލޭގައި ބަންދުވެފައި އޮންނަ ކުޅިވަރެއްގެ ގޮތުގައި ބާސްކެޓް އޮތުން އެއީ އެންމެ ރަނގަޅު ގޮތް ނޫން ކަމަށްވެސް ވިދާޅުވިއެވެ.
ވިސާމް ވިދާޅުވީ ބާސެކެޓުގެ މުބާރާތްތައް ވަރަށް ބޮޑު މުބާރާތެއްގެ ގޮތުގައި ބާއްވަން ބޭނުންވާ ކަމަށާއި، އެގޮތުން ބޮޑު ލީގެއް ގޮތަށް މުބާރާތް ބައްޓަންކުރަންވެސް ބޭނުންވާ ކަމަށެވެ. އެހެން ނަމަވެސް މި ހުރިހާ ކަމަކަށް އޮތް އެންމެ ބޮޑު ގޮންޖެހުމަކީ ވަސީލަތްތަކުގެ ދަތިކަންކަން ކަމަށް ވިދާޅުވިއެވެ.
ވިސާމް ވިދާޅުވީ މުބާރާތުގެ ފެންވަރު ރަނގަޅުވެގެންދާނީ ޓީމުތަކަށް ގިނަ މެޗުތަކަށް ލިބިގެން ކަމަށާއި، ބާސެކްޓުގެ ގިނަ މެޗުތަކެއް ކުލަބަތަކަށް ކުޅެލަން ލިބުމަކީ ކުޅިވަރު ތަރައްގީވެގެން ދިޔުމަށް އިތުރު ބާރަކަށް ވެގެންދާނެ ކަމެއް ކަމަށެވެ. އަދި އަތޮޅުތެރޭގައި ބާސްކެޓުގެ ހަރާކާތްތައް ކުރައަށްދަނީ އެންމެ ބޭނުންވާ ސްޕީޑުގައި ނޫންކަން ވަނީ ފާހަގަކުރައްވާފައެވެ. އެގޮތުން ރާއްޖޭގައި މަސައްކަތުގެ މާހައުލާއި ވަޒީފާގެ ކަންތައްތައް ރޭވިފައި އޮންނަ ގޮތުން، އަތޮޅުތެރެއިން 12 ނުވަތަ 15 ކުޅުންތެރިން އެއް ޓީމެއްގައި އެގޮތަށް މުބާރާތެއްގައި ވާދަކުރަން އަންނަ ދަތި ކަމަށްވެސް ވިދާޅުވިއެވެ.
ވިސާމް ވިދާޅުވީ އަތޮޅުތެރޭގައި ހަރަކާތްތަށް މަދު ނަމަވެސް، ބާސެކަޓަށް ހުންނަ ލޯތްބެއްގެ ސަބަބުން ބައެއް ސަރަހައްދުތަކުގައި ޚާއްސަ ކުލަބުތަކެއް ހެދި، މަދު ނަމަވެސް ހަރަކާތްތައް ހިންގަމުންދާ ކަމަށެވެ. އަދި އަތޮޅުތެރޭގައި ޒޯންތަކުގެ މެދުގައި ވާދަކޮށް މާލެ އައިސް ކުޅެވޭނެ ގޮތްތަކާ މެދު ވިސްނަމުންދާ ކަމަށްވެސް ވިދާޅުވިއެވެ. އެގޮތުން މި ފަހަރުގެ އިންޓަ ސުކޫލް މުބާރާތުގައި އަތޮޅުތެރެއިން ސުކޫލެއް ވާދަކުރިކަން ފާހަގަކުރައްވަމުން ވިސާމް ވިދާޅުވީ އެއީ ކުރިއަށް އޮތްތަނުގައި ފެނިގެންދާނެ ބަދަލެއް ކަމަށެވެ.
"އަތޮޅުތެރޭގެ ޓީމުތައް މާލެ ގެނެވޭނެ ގޮތްތަކެއް ހޯދަން ޖެހޭ. އެއީ އަޅުގަނޑުމެން ކުރަން ޖެހޭ ކަމެއް. އެކަން ކޮށްގެން އަޅުގަނޑުމެންނަށް މިހާރު މާލޭގައި ބަންދަވުފައި އިންނަ ކުޅިވަރަކަށްވުން އެއީ ރަނގަޅު ކަމެއް ނޫން. މުޅި ރާއްޖެއިން އަތްފުނާ އެޅިގެން އެންމެ ޓޮޕް ޕްލެޔާސް ގައުމީ ޓީމަށް އައުން އޭއީ ބޭނުންވާ ގޮތަކީ.ވިސާމް ރަޝީދު - އެމްބީއޭގެ ސްކެރެޓަރީ ޖެނެރަލް
ބާސްކެޓްބޯޅައިގެ ގިނަ އެކަޑެމީތަކަކުން ޒުވާން ކުޅުންތެރިންނަށް ގިނަ ފުރުސަތުތަކެއް ހުޅުވައިދީ ތަމްރީންތައް ދެމުން އަންނައިރު، އެކަޑެމީތަކުގައި ތިބި ކޯޗުންނަކީވެސް ރާއްޖޭގެ އެންމެ މަތީ ފަންތީގައި މަސައްކަތް ކުރަމުން އަންނަ ކޯޗުންނެވެ.