މަސްވެރިކަމުގެ ސިނާޢަތަށް ޒުވާނުން ނެރުމަށް ޚާއްޞަ މަސައްކަތްތަކެއް ކުރާނަން: ޝިޔާމް

ރާއްޖޭގެ މަސްވެރިކަމުގެ ސިނާއަތް ހީނަރުވީ، ޒުވާނުން އެދާއިރާއަށް ވަނުން މަދުވުމުގެ ސަބަބުންކަމަށާއި، އެހެންކަމުން ޒުވަނުން މިދާއިރާއަށް ނެރުމަށް ޚާއްޞަ އިސްކަމެއް ދެއްވާނެކަމަށް މަސްވެރިކަމާއި، ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. އެމަނިކުފާނު މިފަދައިން ވިދާޅުވީ މަސްވެރިންގެ ދުވަހާއި ގުޅިގެން ކ. މަނިޔަފުށީގައި ހުންނަ މެރިން ރިސާޗް ފެސިލިޓީގައި، ސްކޫލް ދަރިވަރުންނަށް ޚާއްޞަކޮށްގެން ކުރިއަށްގެންދިޔަ "އޯޝަން އެކްސްޕްލޯރރސް" ހަރަކާތް ބައްލަވާލެއްވުމަށް އެރަށަށް ކުރެއްވި ޒިޔާރަތުގައި ދެއްކެވި ވާހަކަފުޅުގައެވެ.

ސްކޫލް ދަރިވަރުންނާއި މުޚާޠަބުކުރައްވާ ވާހަކަފުޅު ދައްކަވަމުން މަސްވެރިކަމާއި، ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ، ރާއްޖޭގެ އިޤްތިސާދުގެ ބޮޑު ބައެއް މަސްވެރިކަމުގެ ސިނާއަތްވެސް ހިއްސާކުރާކަމަށެވެ. މިހާރު މަސްވެރިކަމުގެ ސިނާއަތުގައި ހަރަކާތްތެރިވާ ޒުވާނުން މަދުކަމަށާއި، މި ސިނާޢަތް ކުރިއަރުވައި ތަރައްޤީކުރުމަށް މަސްވެރިކަމުގެ ދާއިރާގައި މަސައްކަތްކުރާ ޒުވާނުންގެ އަދަދު އިތުރުކުރަންޖެހޭކަަމަށް ވަޒީރު ވިދާޅުވިއެވެ. އަދި މި ސިނާއަތުގެ ކުރިއެރުމަށް ޒުވާނުން އަހުލުވެރިކުރުމުގެ މުހިންމުކަން ވަޒީރު ފާހަގަކުރެއްވިއެވެ.

43 ވަނަ މަސްވެރިންގެ ދުވަހުގެ ޕްރޮގްރާމްތަކުގެ ތެރެއިން ކ. މަނިޔަފުށީގައި ސްކޫލްތަކުގެ ދަރިވަރުންނަށް އަމާޒުކޮށްގެން ހިންގާ "އޯޝަން އެކްސްޕްލޯރަރސް" އިވެންޓް ބައްލަވާލުމައް މިނިސްޓަރ ޝިޔާމް މަނިޔަފުއްޓައް ވަޑައިގަތުން#MasveringeDhuvas pic.twitter.com/beyKsJqdDz

— Ministry of Fisheries and Ocean Resources (@MFORmv) December 9, 2023

"ޒުވާން ބޭފުޅުން މި އިންޑަސްޓްރީގައި ހަރަކާތްތެރިވާލެއް މަދުވާތަން ފެނޭ. ދެން އަޅުގަނޑުމެން ގަބޫލުކުރަނީ އަޅުގަނޑުމެންވެސް ޕޮލިސީ ލެވެލްގައި އެފޯޓެއް ލައިގެން އިރާދަކުރެއްވިއްޔާ މި ސިނާއަތުގައި ޒުވާން ކޮންމެ ބޭފުޅަކަށް ކޮންޓްރިބިއުޓް ކުރެވޭނެ." މަސްވެރިކަމާއި، ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވިއެވެ.

ވަޒީރު ވިދާޅުވީ މަސްވެރިކަމުގެ ސިނާޢަތް ބޭރު މީހުންގެ އަތްމައްޗަށް ގޮސްފައިވާކަމަށެވެ. އެހެންކަމުން މަސްވެރިކަމުގެ ސިނާޢަތަށް ދިވެހި ޒުވާނުން ތަމްރީންވެ އެ ދާއިރާއިން ކުރިއަށް ދިއުމުގެ ޝައުގުވެރިކަން ގެންގުޅުމަށް މެރިން ރިސާޗް ފެސިލިޓީއަށް ޒިޔާރަތްކުރި ސުކޫލުތަކުގެ ދަރިވަރުންގެ ކިބައިން ވަޒީރު އެދިވަޑައިގެންނެވިއެވެ.

43 ވަނަ މަސްވެރިންގެ ދުވަހުގެ ޕްރޮގްރާމްތަކުގެ ތެރެއިން ކ. މަނިޔަފުށީގައި ސްކޫލްތަކުގެ ދަރިވަރުންނަށް އަމާޒުކޮށްގެން ހިންގާ "އޯޝަން އެކްސްޕްލޯރަރސް" އިވެންޓްގެ ތެރެއިން#MasveringeDhuvas2023 pic.twitter.com/LJJUeNNmny

— Ministry of Fisheries and Ocean Resources (@MFORmv) December 9, 2023

ދަރިވަރުންނަށް މަސްވެރިކަމުގެ ސިނާޢަތާއި ބެހޭ މައުލޫމާތު ދިނުމުގެ ގޮތުން "އޯޝަން އެކްސްޕްލޯރރސް"ގެ ނަމުގައި ކުރިއަށްގެންދިޔަ ހަރަކާތުގެ ތެރެއިން ރާއްޖޭގައި މެރިކަލްޗަރ ސިނާއަތެއް ތަޢާރަފްކޮށް ތަރައްގީކުރުމަށްޓަކައި މަނިޔަފުށީގައި ކުރަމުންދާ ތަފާތު މަސައްކަތްތައް ދަރިވަރުންނާއި ހިއްސާކުރިއެވެ. މީގެ އިތުރުން މަސްވެރިކަމާއި ފަރުތަކުގެ ދިރާސާތަކަށް ދަރިވަރުން އަހުލުވެރިކުރުމުގެ ގޮތުން އެކުދިން ޝައުގުވެރިވާފަދަ ޢަމަލީ ހަރަކާތްތަކުގެ ޒަރީއާއިން ދަރިވަރުންނަށް މައުލޫމާތު ފޯރުކޮށްދިނެވެ. އޭގެ ތެރޭގައި ކަނޑުގެ ތަފާތު ދިރުންތަކުގެ ނަން ހޯދުން ފަދަ ކުޅިވަރު ހަރަކާތްތައް ކުރިއަށް ގެންދިޔައެވެ.

މި ހަރަކާތުގައި އެކި ސުކޫލުތަކުގެ ގުރޭޑް 8، 9 އަދި 10ގެ މެރިން ސައިންސް ކިޔަވަމުންދާ ދަރިވަރުން ބައިވެރިވެފައިވެއެވެ. އެގޮތުން އިމާދުއްދީން ސުކޫލާއި، ޖަމާލުއްދީން ސުކޫލް، ތާޖުއްދީން ސްކޫލް އަދި ޣާޒީ ސުކޫލުން ޖުމުލަ 45 ދަރިވަރުން ބައިވެރިވެފައިވެއެވެ.

މިއަހަރުގެ މަސްވެރިންގެ ދުވަހާއި ގުޅިގެން މަސްވެރިކަމުގެ ދާއިރާއިންނާއި، ކަނޑުތަކުގެ މާހައުލީ ނިޒާމުތަކުގެ ދާއިރާއިން މިހާރު ކުރަމުންދާ ދިރާސީ މަސައްކަތްތަކަށް ސުކޫލުތަކުގެ މެރިން ސައިންސް ކިޔަވާ ދަރިވަރުންނަށް ވަނީ ދައްކާލާފައެވެ. ދަރިވަރުންނަށް މަސްވެރިކަމާއި ކަނޑުގެ ދިރުންތަކާއި ގުޅޭ މުހިންމު މައުލޫމާތު ލިބޭނެ ފަދައިން ހަރަކާތް ކުރިއަށް ގެންގޮސްފައިވަނީ މި ދާއިރާއަށް ދަރިވަރުން އަހުލުވެރިކުރުވައި، އެކުދިންގެ ހިތްތަކުގައި މަސްވެރިކަމުގެ ސިނާޢަތަށް ޝައުގުވެރިކަން އުފެއްދުމުގެ މަޤްސަދުގައެވެ.