ޒަޔަނިސްޓު އިސްރާޢީލާ ދެކޮޅަށް ޙިޒްބުالله ޖަމާޢަތުން ދެމުންދާ ހަމަލަތައް ހުއްޓައިނުލައިފި ނަމަ، ލުބުނާން ސުންނާފަތި ކޮށްލަން ޖެހިދާނެ ކަމަށް ބުނެ ޔަހޫދީންގެ ޖައްބާރު ބޮޑުވަޒީރު ބެންޖަމިން ނަތަންޔާހޫ އަނެއްކާ ވެސް އިންޒާރު ދީފިއެވެ. އީރާނުން ވާގިވެރިވާ ޙިޒްބުاللهއަކީ ލުބުނާނުގައި ހަރަކާތްތެރިވާ ޖަމާޢަތެކެވެ. އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން އުދުވާންތައް ފެށުމުން ޙިޒްބުاللهއިން ވެސް ވަނީ ޒަޔަނިސްޓު އިސްރާޢީލުގެ ރަށްތަކަށް ހަމަލަދޭން ފަށާފައެވެ.
ޙިޒްބުاللهއަށް އިންޒާރު ދެމުން ނަތަންޔާހޫ ބުނީ ލުބުނާނާއި އިސްރާޢީލް ގުޅޭ ސަރަޙައްދީ ރޮނގުގެ ސަލާމަތަށް ނުރައްކާވަމުންދާ ނަމަ، ލުބުނާނަށް ވަރުގަދަ ހަމަލަތަކެއްދީ، އެ ޤައުމު ސުންނާފަތި ކޮށްލަން ޔަހޫދީ ފައުޖުން ފަސް ނުޖެހޭނެ ކަމުގައެވެ. މީގެ ކުރިން ވެސް، ބެއިރޫތު ސުންނާފަތި ކޮށްލާނެ ކަމަށް ބުނެ އޭނާ މި ފަދަ އިންޒާރުތައް ދީފައިވެއެވެ.
އިސްރާޢީލުގެ އުތުރުގައި ލުބުނާނާ ގުޅޭ ސަރަޙައްދީ ރޮނގު ކައިރިއަށް ނަތަންޔާހޫ ވަނީ ޔަހޫދީންގެ ބޮޑު ފައުޖަކާ އެކު ބަރުހަތިޔާރު ޖަމާކޮށްފައެވެ. އަދި، މިހާރު ވެސް ޔަހޫދީ ފައުޖުން ދަނީ ޙިޒްބުاللهގެ އަމާޒުތަކަށް ކަމަށް ބުނެ ލުބުނާނަށް ވަރުގަދަ ހަމަލަތަކެއް ދެމުންނެވެ. މިއީ، ޒަޔަނިސްޓު އިސްރާޢީލުގެ ރައްޔިތުންގެ ދިފާޢުގައި ދެމުންދާ ހަމަލަތަކެއް ކަމުގައި ނަތަންޔާހޫ ބުނެއެވެ.
އޮކްޓޫބަރު 8 ވަނަ ދުވަހުން ފެށިގެން ޙިޒްބުاللهއިން ދަނީ ޔަހޫދީންގެ އަމާޒުތަކަށް ވަރުގަދަ ހަމަލަތަކެއް އަމާޒު ކުރަމުންނެވެ. އަދި، ޔަހޫދީން ވެސް ދަނީ ރައްދުގައި ލުބުނާނަށް ހަމަލަ ދެމުންނެވެ. މި ހަމަލަތަކުގައި ޙިޒްބުالله ޖަމާޢަތުގެ 70 އަށްވުރެ ގިނަ މީހުން ވަނީ ޝަހީދު ކޮށްލާފައެވެ. އަދި، ޢާންމުންގެ ގިނަ ޢަދަދެއްގެ ބަޔަކު ވެސް ވަނީ ޝަހީދު ކޮށްލާފައެވެ.
"ހުރިހާ ވަގުތެއްގައި [އިސްރާޢީލުގެ] ފައުޖުން އެ ދަނީ އުތުރުގައި ހަރަކާތްތެރިވަމުން. އެއީ، ޙިޒްބުاللهއާ ދެކޮޅަށް ހިންގަމުންދާ އޮޕަރޭޝަނެއް. މި ދަނީ ޓެރެރިސްޓުންގެ ސެލްތައް ނައްތައިލަމުން. އެ މީހުން ސަރަޙައްދީ ރޮނގާ ދުރަށް ޖައްސަމުން. އެ މީހުންގެ ހަތިޔާރުތައް ނައްތައިލަމުން. [އިސްރާޢީލުގެ] އުތުރާއި ދެކުނުގައި ކުރަމުން މިދާ ހަނގުރާމައިގައި ކާމިޔާބީ ހޯދޭނެ،" ނަތަންޔާހޫ ބުންޏެވެ.
ޙިޒްބުاللهއަކީ 1982 ވަނަ އަހަރު އީރާނުގެ ރިވޮލޫޝަނަރީ ގާޑްސް އަޑީގައި އޮވެގެން އުފައްދާފައިވާ ހަތިޔާރު އެޅި ޖަމާޢަތެކެވެ. އީރާނުން މިހާރު ވެސް ދަނީ އެ ޖަމާޢަތަށް ވާގިވެރިވެދެމުންނެވެ. އެ ޖަމާޢަތް އުފެއްދުމުގެ މައިގަނޑު މަޤުޞަދަކީ ޒަޔަނިސްޓު އިސްރާޢީލާއި، ޔަހޫދީންނަށް ވާގިވެރިވާ އެމެރިކާއާ ދެކޮޅަށް ހަނގުރާމަ ކުރުމެވެ.