ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުން ދިޔަ ލާއިންސާނީ އުދުވާންތައް މެދުކަނޑައިލުމާ ގުޅޭ ގޮތުން ޙަމާސް ޖަމާޢަތާ އެކު ކުރަމުންދިޔަ މަޝްވަރާތަކުން ޔަހޫދީން ވަކިވެއްޖެއެވެ. މި ކަން އިޢުލާނު ކޮށްފައި ވަނީ ޒަޔަނިސްޓު އިސްރާޢީލުގެ ޖާސޫސީ އިދާރާ - މޮސާދުންނެވެ.
ޤަޠަރުގައި ކުރިއަށްދިޔަ މަޝްވަރާތަކުގައި ބައިވެރިވި މޮސާދުގެ ޓީމުން އެނބުރި ޤައުމަށް ގޮސްފައިވާ ކަމުގައި ޔަހޫދީން ބުނެއެވެ. ޙަމާސްއާ އެކު ކުރަމުން ދިޔަ މަޝްވަރާތަކުގައި ޒަޔަނިސްޓު އިސްރާޢީލު ތަމްސީލު ކުރަމުން ގޮސްފައި ވަނީ މޮސާދުގެ އިސްވެރިޔާ ދަވީދް ބަރްނިޔާއެވެ. ޔަހޫދީންގެ ޖައްބާރު ބޮޑުވަޒީރު ބެންޖަމިން ނަތަންޔާހޫގެ އަމުރަށް ބަރްނިޔާއާއި އޭނާގެ ޓީމު މަޝްވަރާތައް މެދުކަނޑައިލުމަށް ފަހު އެނބުރި ޤައުމަށް ގޮސްފައިވާ ކަމުގައި އޭނާގެ އޮފީހުން ބުނެއެވެ.
ނަތަންޔާހޫގެ އޮފީހުން ބުނީ މަޝްވަރާތައް މެދުކަނޑައިލަން އޭނާ ނިންމާފައި ވަނީ ޙަމާސް ޖަމާޢަތުން އެއްބަސްވުމާ ޚިލާފުވުމުން ކަމުގައެވެ. އަދި، އެއްބަސްވުމުގައިވާ ގޮތަށް ރަހީނުންގެ ތެރޭގައި ހިމެނޭ ހުރިހާ ކުޑަކުދިންނާއި އަންހެނުން ޙަމާސްއިން މިނިވަން ކޮށްފައި ނުވާ ކަމުގައެވެ. ނަމަވެސް، ޔަހޫދީންނާ އެކު ހަދާފައިވާ އެއްބަސްވުމުގެ ދަށުން ޙަމާސްއިން ޔަހޫދީންގެ 84 އަންހެނުންނާއި ކުޑަކުދިން މިނިވަން ކޮށްފައިވާ ކަން ފާހަގަ ކޮށްލަން ޖެހެއެވެ. އަދި، ބޭރު ޤައުމުތަކުގެ 24 މީހަކު ވަނީ މިނިވަން ކޮށްފައެވެ.
ނޮވެންބަރު 24 ވަނަ ދުވަހު އަމަލު ކުރަން ފެށި އެއްބަސްވުން ޔަހޫދީން އުވައިލާ، ޣައްޒާއަށް އަލުން ބޮން އަޅަން ފަށާފައިވާއިރު، އޮކްޓޫބަރު 7 ވަނަ ދުވަހު ފެށި އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 15,207 އަށް އަރާފައެވެ. އޭގެ ތެރެއިން 70 އިންސައްތައަކީ މައުސޫމު ކުޑަކުދިންނާއި އަންހެނުންނެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 40,000 އަށް އަރާފައެވެ.
ނަމަވެސް، ޒަޚަމު ކޮށްލާފައިވާ މީހުންނަށް އެކަށީގެންވާ ޞިއްޙީ ފަރުވާ ފޯރުކޮށްދިނުމަށް ޣައްޒާގެ ހޮސްޕިޓަލްތައް ވަނީ ނުކުޅެދިފައެވެ. ޔަހޫދީން ވަނީ ޣައްޒާގައި ހުރި ޞިއްޙީ ފަރުވާ ފޯރުކޮށްދޭ 130 ޢިމާރާތަށް ގަސްދުގައި ބޮން އަޅާފައެވެ. އެ ހަމަލަތަކުގައި ލިބިފައިވާ ގެއްލުންތަކާ ގުޅިގެން 20 އަށްވުރެ ގިނަ ހޮސްޕިޓަލް ވަނީ ބަންދު ކޮށްފައެވެ.
މީގެ އިތުރުން، ޞިއްޙީ ޚިދުމަތްތެރިންގެ ތެރެއިން 130 އަށްވުރެ ގިނަ މީހުން ހައްޔަރު ކޮށްފައިވެއެވެ. އަދި، އެ މީހުންނަށް ބޮޑެތި އަނިޔާތަކެއް ދީފައިވާ ކަމަށާއި، ހައްޔަރު ކޮށްފައިވާ ޞިއްޙީ ޚިދުމަތްތެރިން ކާބޯތަކެތިން މަހުރޫމު ކޮށްފައިވާ ކަމުގައި މަސްރަޙު ދިރާސާކުރާ ފަރާތްތަކުން ހާމަ ކުރެއެވެ. ޔަހޫދީންގެ ހަމަލަތަކުގައި ޞިއްޙީ ޚިދުމަތްތެރިންގެ ތެރެއިން 280 އަށްވުރެ ގިނަ މީހުން ޝަހީދު ކޮށްލާފައިވާ ކަން ވެސް ފާހަގަ ކޮށްލަން ޖެހެއެވެ.
ޔަހޫދީންގެ ޙަމަލަތަކުގައި ޒަޚަމު ކޮށްލާފައިވާ މީހުންނަށް އެކަށީގެންވާ ޞިއްޙީ ފަރުވާ ނުލިބުމުގެ ސަބަބުން، ގިނަ ޢަދަދެއްގެ ބަޔަކު ޝަހީދުވާނެ ކަމަށް ޣައްޒާގެ އޮފިޝަލުން ވިދާޅުވެއެވެ. ފާއިތުވި 24 ވަރަކަށް ގަޑިއިރުގެ ތެރޭގައި ވެސް ޔަހޫދީން ވަނީ ޣައްޒާގެ 400 އަށްވުރެ ގިނަ ޢިމާރާތަށް ބޮން އަޅާފައެވެ. ޔަހޫދީންގެ މި އުދުވާންތައް ހިންގަމުން ދަނީ އެމެރިކާގެ އެހީތެރިކަމާ އެކު ކަން ފާހަގަ ކޮށްލަން ޖެހެއެވެ.