ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާނާ ގުޅިގެން އިންޑޮނީޝިޔާ ހޮސްޕިޓަލުން ވެސް ޚިދުމަތްތައް މެދުކެނޑިއްޖެއެވެ. އޮކްޓޫބަރު 7 ވަނަ ދުވަހު ޔަހޫދީން ފެށި އުދުވާނުގައި ފަހަކަށް އައިސް ވަނީ ހޮސްޕިޓަލްތަކަށް ދޭ ހަމަލަތައް އިތުރު ކޮށްފައެވެ.
ޣައްޒާގައި ހުންނަ 35 ހޮސްޕިޓަލްގެ ތެރެއިން މިހާރު 25 ހޮސްޕިޓަލެއް ބަންދު ކުރަން ޖެހިފައިވާއިރު، އިންޑޮނީޝިޔާ ހޮސްޕިޓަލް ވެސް މި ވަނީ މި ލިސްޓަށް އިތުރު ކުރަން ޖެހިފައެވެ. ޣައްޒާގައި ހިންގާ ހޮސްޕިޓަލްތަކާއި ކުލިނިކުތަކަށް ކަރަންޓުގެ ޚިދުމަތް ފޯރުކޮށްދިނުމަށް ބޭނުންވާ ތެޔޮ މިހާރު ވަނީ ހުސްވެފައެވެ. އަދި، ޔަހޫދީ ފައުޖުން ދަނީ ބައެއް ހޮސްޕިޓަލްތަކަށް ބޮން އަޅަމުންނެވެ.
ޔަހޫދީ ފައުޖުން ވަނީ ޣައްޒާގައި ހުންނަ އެންމެ ބޮޑު ހޮސްޕިޓަލް ކަމުގައިވާ އަލް-ޝިފާ ހޮސްޕިޓަލަށް ވަދެ، އެ ތަނުގެ ތެރޭގައި ވެސް އުދުވާންތައް ހިންގާފައެވެ. ފަލަސްޠީނުގެ ޞިއްޙީ ޚިދުމަތްތެރިން ބުނީ ޣައްޒާގެ ހޮސްޕިޓަލްތަކުގައި މަސައްކަތް ކުރާ މީހުންގެ ފުރާނައަށް ނުރައްކާވަމުންދާ ކަމަށާއި، ޞިއްޙީ ޚިދުމަތްތައް ފޯރުކޮށްދިނުމަށް ހުރަސް އެޅިފައިވާ ކަމުގައެވެ. އަދި، ބޭސްފަރުވާއަށް ބޭނުންވާ ސާމާނު ހުސްވެ، ބަލި މީހުންނާއި ޒަޚަމު ކޮށްލާފައިވާ މީހުންނަށް ފަރުވާ ދެވޭނެ ގޮތެއް ނެތް ކަމުގައެވެ.
އިންސާނީ ހައްޤުތަކަށް ވަކާލާތުކުރާ ބައިނަލްއަޤުވާމީ ޖަމުޢިއްޔާއެއް ކަމުގައިވާ ހިޔުމަން ރައިޓް ވޮޗް (އެޗް.އާރް.ޑަބްލިޔު)ން ވަނީ މި އަމަލުތައް އެންމެ ހަރުކަށި އިބާރާތުން ކުށްވެރި ކޮށްފައެވެ. ހޮސްޕިޓަލްތަކާއި ކްލިނިކްތައް ފަދަ ޞިއްޙީ ޚިދުމަތްތައް ފޯރުކޮށްދޭ ތަންތަނަކީ އިންސާނިއްޔަތާ ބެހޭ ބައިނަލްއަޤުވާމީ ޤާނޫނުތަކުގެ ދަށުން ހިމާޔަތް ކޮށްފައިވާ ޢިމާރާތްތަކެއް ކަން އެ ޖަމުޢިއްޔާއިން ފާހަގަ ކުރެއެވެ.
"ހަނގުރާމައިގެ މައިދާނުގައި ވެސް ޑޮކްޓަރުންނާއި، ނަރުހުންނާއި، އެހެން ޞިއްޙީ ޚިދުމަތްތެރިންގެ އިތުރުން އެމްބިޔުލާންސް ފަދަ އުޅަނދު ފަހަރަށް މަސައްކަތް ކުރުމުގެ ފުރުޞަތު ފަހިކޮށްދޭން ޖެހޭނެ. އެ މީހުންނަށް ހުރަސް އަޅައިގެން ނުވާނެ. އެ މީހުންނަށް ހިމާޔަތާއި ރައްކާތެރިކަން ފޯރުކޮށްދޭން ޖެހޭނެ،" އެފް.އާރް.ޑަބްލިޔުގެ ޔޫ.އެން ޑިރެކްޓަރ ލުއީ ޝާރބޮނޯ ވިދާޅުވިއެވެ. ފާހަގަ ކޮށްލަން ޖެހޭ ކަމަކީ ޣައްޒާގައި ޔަހޫދީން ކުރަމުން އެ ދަނީ ހަނގުރާމައެއް ނޫން ކަމެވެ. އެއީ، މުސްލިމުންނާ ދެކޮޅަށް ހިންގަމުންދާ ގަތުލުއާންމެކެވެ.
ޣައްޒާގައި ވެރިކަން ކުރާ ޙަމާސް ޖަމާޢަތުގެ އިސް އޮފިޝަލެއް ކަމުގައިވާ އުސާމާ ޙަމްދާން ވިދާޅުވީ ޣައްޒާގެ ހޮސްޕިޓަލްތަކުގެ އިތުރުން ސަރުކާރު އޮފީސްތަކާއި ސްކޫލްތަކަށް ވެސް ޔަހޫދީ ފައުޖުން ބޮން އަޅަމުންދާ ކަމުގައެވެ. މި ގޮތުން، ޣައްޒާ ސަރުކާރުގެ 94 ޢިމާރާތާއި 253 ސްކޫލަކަށް ބޮން އަޅައި، އެ ޢިމާރާތްތައް ސުންނާފަތި ކޮށްލާފައިވާ ކަމުގައި އޭނާ ވިދާޅުވިއެވެ.
ޣައްޒާގައި ޝަހީދު ކޮށްލާފައިވާ މީހުންގެ ޢަދަދު 11,470 އަށްވުރެ މައްޗަށް އުފުލިފައިވާއިރު، އޭގެ ތެރޭގައި 4,500 އަށްވުރެ ގިނަ ޢަދަދެއްގެ ކުޑަކުދިންނާއި، 3,300 އަށްވުރެ ގިނަ އަންހެނުން ހިމެނެއެވެ. އަދި، ގިނަ ޢަދަދެއްގެ ޒުވާނުންނާއި އުމުރުން ދުވަސްވީ މީހުން ވެސް ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު މިހާރު ވަނީ 29,000 އަށް އަރާފައެވެ.