ޔަހޫދީ ފައުޖުން އެމެރިކާގެ އެހީތެރިކަމާ އެކު ޣައްޒާގެ މުސްލިމުންނާ ދެކޮޅަށް ހިންގަމުންދާ ގަތުލުއާންމުގައި އަލް-ޝިފާ ހޮސްޕިޓަލުގެ އެމްބިޔުލާންސްތަކަށް ހަމަލަދިނުމުން އެ ކަމާ މެދު ކަންބޮޑުވުން ފާޅުކުރައްވައި، އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ޔަހޫދީންގެ އަމަލުތައް ކުށްވެރި ކުރައްވައިފިއެވެ. އެމްބިޔުލާންސްތަކަށް ދިން ހަމަލަތައް ގުތެރޭޝް ސިފަ ކުރައްވާފައި ވަނީ ބިރުވެރިކަމެއްގެ ގޮތުގައެވެ.
ގުތެރޭޝް މި ހަމަލަތައް ކުއްވެރި ކުރަށްވާފައި މި ވަނީ، އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާންތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 9,227 އަށް އުފުލިފައެވެ. އޭގެ ތެރޭގައި ކުށެއް ނެތް 3,760 ކުޑަކުދިންނާއި 2,326 އަންހެނުންގެ އިތުރުން އުމުރުން ދުވަސްވީ އެތަކެއް ސަތޭކަ ބަޔަކު ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 32,000 އަށް އުފުލިފައެވެ. ޔަހޫދީންގެ މި ގަތުލުއާންމު ހިންގަމުން ދަނީ އެމެރިކާގެ އެއްބާރުލުމާއި އެހީތެރިކަމާ އެކުގައެވެ.
"އަލް-ޝިފާ ހޮސްޕިޓަލް ކައިރީގައި އޮތް އެމްބިޔުލާންސްތަކަށް އަމާޒުކޮށް ޔަހޫދީ ފައުޖުން ހަމަލަ ދިނުމުން އަހަރެން ބިރުން ފިއްކަނޑައިގެން ގޮސްފި. މަގުމަތީގައި ޝަހީދުވެފައިވާ މީހުންގެ މަންޒަރުތަކަކީ ބިރުވެރި މަންޒަރުތަކެއް،" ގުތެރޭޝް ވިދާޅުވިއެވެ. ޔަހޫދީންގެ އުދުވާންތައް ވަގުތުން ހުއްޓައިލުމަށް ވެސް އޭނާ ގޮވައިލެއްވިއެވެ.
ފަލަސްޠީނުގެ ރެޑް ކްރެސެންޓުން ބުނީ ޔަހޫދީންގެ ހަމަލަތައް އަމާޒު ކޮށްފައި ވަނީ އެ ޖަމުޢިއްޔާގެ އެމްބިޔުލާންސްތަކަށް ކަމުގައެވެ. މި ހަމަލާގައި ޝަހީދު ކޮށްލާފައިވާ މީހުންގެ ޢަދަދު 13 އަށް އަރާ ކަމަށާއި، އިތުރު 60 އެއްހާ މީހުން ޒަޚަމު ކޮށްލާފައިވާ ކަމުގައި ވެސް އެ ޖަމާޢަތުން ބުނެއެވެ. ޔަހޫދީން އެމްބިޔުލާންސްތަކަށް މިސައިލް ހަމަލަތައް ދީފައި ވަނީ ފަލަސްޠީނުގެ ކުށެއް ނެތް ޢާންމުންގެ ގިނަ ޢަދަދެއްގެ ބަޔަކު އެ ސަރަޙައްދުގައި ހަރަކާތްތެރިވަމުން ދިޔަ ވަގުތެއްގައެވެ.
ޒަޔަނިސްޓު އިސްރާޢީލުގެ އަސްކަރިއްޔާއިން ވަނީ އަލް-ޝިފާ ހޮސްޕިޓަލް ކައިރީގައި އޮތް އެމްބިޔުލާންސަކަށް މިސައިލް ހަމަލަތަކެއް ދިފައިވާ ކަމަށް އެއްބަސްވެފައެވެ. ޔަހޫދީ ފައުޖުން ބުނީ، އެމްބިޔުލާންސްތަކަށް ހަމަލަ ދީފައި ވަނީ، އެއިން އުޅަނދެއްގައި ހުރި ޙަމާސް ޖަމާޢަތުގެ މެންބަރެއް ޝަހީދު ކޮށްލުމުގެ ބޭނުމުގައި ކަމުގައެވެ.
"ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް އުދުވާން ހިންގަމުންދާތާ މަހެއް ފާއިތުވި ވަނީ. ފަލަސްޠީނުގެ ކުށެއް ނެތް އަންހެނުންނާއި ކުޑަކުދިންނަށް އެހީ ފޯރުކޮށްދިނުމަށް ވަނީ ހުރަސް އަޅާފައި. ޔަހޫދީން ދަނީ އެ މީހުން ގަތުލު ކުރަމުން. އެ މީހުންގެ ގެދޮރަށް ބޮން އަޅައި ސުންނާފަތި ކުރަމުން،" ގުތެރޭޝް ވިދާޅުވިއެވެ. ޙަމާސް ޖަމާޢަތުން އޮކްޓޫބަރު 7 ވަނަ ދުވަހު ޔަހޫދީންނަށް އަމާޒުކޮށް ދިން ހަމަލަ ވެސް އޭނާ ފާހަގަ ކުރެއްވިއެވެ.
ޔަހޫދީންގެ ލާއިންސާނީ ގަތުލުއާންމު ވަގުތުން ހުއްޓައިލަން ޖެހޭ ކަމަށް ވިދާޅުވެ ގުތެރޭޝް ވިދާޅުވީ ޣައްޒާއިން ފެނާއި، ކާބޯތަކެއްޗާއި، ބޭސްފަރުވާއަށް ބޭނުންވާ ސާމާނު ހުސްވަމުންދާ ކަމުގައެވެ. އަދި، ހޮސްޕިޓަލްތަކާއި ފެން އުފައްދާ ޕްލާންޓުތައް ހިންގުމަށް ބޭނުންވާ ތެޔޮ ހުސްވަމުންދާ ކަމުގައެވެ. މިހާރު ވެސް ޣައްޒާގައި ހިންގާ 16 ވަރަކަށް ހޮސްޕިޓަލް ވަނީ ކަރަންޓުގެ ޚިދުމަތް ދެވޭނެ ގޮތެއް ނެތިގެން ބަންދު ކުރަން ޖެހިފައެވެ. ބައެއް ހޮސްޕިޓަލްތައް ބަންދު ކޮށްފައި ވަނީ ޔަހޫދީންގެ ހަމަލަތަކުގައި އެ ތަންތަން ސުންނާފަތި ކޮށްލުމާ ގުޅިގެންނެވެ.
ޔަހުދީންގެ ރަޙުމު ކުޑަ ހަމަލަތަކުގައި ޣައްޒާގެ މުސްލިމުންގެ ގެދޮރު ވެސް ސުންނާފަތި ކޮށްލާފައިވާއިރު، އެތަކެއް ސަތޭކަ ހާސް ބަޔަކު ވަނީ ގެދޮރު ނެތިކޮށްލާފައެވެ. އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެނީ އ.ދގެ ހިޔާތަކާއި ހޮސްޕިޓަލްތަކުގައެވެ. އަލް-ޝިފާ ހޮސްޕިޓަލަކީ ވެސް ގެދޮރު ނެތް އެތަކެއް ސަތޭކަ ބަޔަކަށް ބޯހިޔާވަހިކަމާއި ރައްކާތެރިކަން ފޯރުކޮށްދެމުންދާ ހޮސްޕިޓަލެކެވެ. އ.ދއިން ޣައްޒާގައި ހިންގާ ހިޔާތައް ވެސް މިހާރު އޮތީ ފުރިފައެވެ.
"ޣައްޒާގައި މި ވަގުތު ރައްކާތެރި އެންމެ ތަނެއް ވެސް ނެތް. ނޭވާލާ ނިޒާމުގެ ބަލިތައް ދަނީ އިތުރުވަމުން. ނަރުދަމާ ނިޒާމު އޮތީ ހަލާކުވެފައި. ޣައްޒާގައި ބަލިމަޑުކަމެއް ދަނީ ޢާންމުވަމުން. މި ކަމުގެ ނުރައްކާ އެންމެ ބޮޑަށް ކުރިމަތިވެފައި ވަނީ ކުށެއް ނެތް ކުޑަކުދިންނަށް،" ގުތެރޭޝް ވިދާޅުވިއެވެ.
ޔަހޫދީ ފައުޖުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް މި އޮޕަރޭޝަން ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.