ޔަހޫދީންގެ އަސްކަރީ ޑްރޯނެއް ވައްޓައިލާފައިވާނެ ކަމުގައި ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތެއް ކަމުގައިވާ ޙިޒްބުاللهއިން ހާމަކޮށްފިއެވެ. އެ ޖަމާޢަތުން ބުނީ، ޔަހޫދީންގެ އަސްކަރީ ޑްރޯނެއް ވައްޓައިލާފައި ވަނީ ލުބުނާނުގެ ދެކުނުގެ ސަރަޙައްދަށް ވަނުމުން ކަމުގައެވެ. އެ ޑްރޯން ވައްޓައިލާފައި ވަނީ 'ސަރފެސް-ޓު-އެއަރ' މިސައިލެއް ބޭނުން ކޮށްގެންނެއެވެ.
ޔަހޫދީންގެ އަސްކަރީ ޑްރޯނެއް ވައްޓައިލާފައި މި ވަނީ އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ގަތުލުއާންމާ ގުޅިގެންނެވެ. އެ އުދުވާންތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 9,061 އަށް އުފުލިފައެވެ. އޭގެ ތެރޭގައި ކުށެއް ނެތް 3,760 ކުޑަކުދިންނާއި 2,326 އަންހެނުންގެ އިތުރުން އުމުރުން ދުވަސްވީ އެތަކެއް ސަތޭކަ ބަޔަކު ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 32,000 އަށް އުފުލިފައެވެ. ޔަހޫދީންގެ މި ގަތުލުއާންމު ހިންގަމުން ދަނީ އެމެރިކާގެ އެއްބާރުލުމާއި އެހީތެރިކަމާ އެކުގައެވެ.
މިއީ، ޔަހޫދީންގެ އަސްކަރީ ޑްރޯނަކަށް ހަމަލަދީ ވައްޓައިލާފައިވާނެ ކަމުގައި ޙިޒްބުاللهއިން ބުނި ދެވަނަ ފަހަރެވެ. ލުބުނާނުގެ ދެކުނުގެ ސަރަޙައްދެއްގައި ހަރަކާތްތެރިވަމުން ދިޔަ ޔަހޫދީންގެ އަސްކަރީ ޑްރޯނެއް ވައްޓައިލާފައިވާނެ ކަމުގައި ޙިޒްބުاللهއިން ކުރިން ވެސް ބުނެފައިވެއެވެ.
ޔަހޫދީންގެ އަސްކަރީ ޑްރޯންތަކަށް އަމާޒުކޮށް ޙިޒްބުاللهގެ މުޖާހިދުން މިސައިލް ހަމަލަތަކެއް ދިނުމާ ގުޅިގެން ޔަހޫދީ ފައުޖުން ވަނީ އެ ކަމުގެ ރައްދުގައި އެ ޖަމާޢަތުގެ އަމާޒުތަކަށް ހަމަލަދޭން ފަށާފައެވެ. ޔަހޫދީ ފައުޖުން ބުނީ މިސައިލް ހަމަލަތަކުގެ ފަހަތުގައިވާ ފަރާތްތަކަށް ވަރުގަދަ ހަމަލަތަކެއް އަމާޒު ކޮށްފައިވާނެ ކަމުގައެވެ. ނަމަވެސް، އެއީ ކޮން ބަޔެއް ކަން ޔަހޫދީ ފައުޖުން ހާމަކޮށްފައެއް ނުވެއެވެ. އަދި، ޑްރޯން ވައްޓައިލާފައި ނުވާނެ ކަން ހާމަކޮށްދޭނެ އެއްވެސް ހެއްކެއް ޔަހޫދީ ފައުޖުން ވެސް ހާމަކޮށްފައެއް ނުވެއެވެ.
ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ. ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.