އިސްރާއީލާއި ލުބުނާންގައި ހަރަކާތްތެރިވާ ހިޒްބުﷲ ޖަމާއަތާއި ދެމެދު ބަދަލުކުރާ ހަމަލާތަކުގެ ސަބަބުން ގާތްގަނޑަކަށް ދެ ލައްކައެއްހާ ޔަހޫދީންގެ ގެދޮރު ގެއްލިއްޖެއެވެ.
އިސްރާއީލާއި ލުބުނާން ގުޅޭ ބޯޑަރު ކައިރީ އުތުރުން 14 އަވަށަކުން 11،000 މީހުން ހުސްކުރަން އިސްރާއީލުން މިހާރު ވަނީ ފަށާފައެވެ. އިސްރާއީލާއި ހިޒްބުﷲ ޖަމާއަތާއި ދެމެދު ދޭ ހަމަލާތަކުގެ ސަބަބުން މިދިޔަ ހަފްތާވެސް ވަނީ ބޯޑަރު ކައިރިން 28 އަވަށެއް ހުސްކޮށްފައެވެ.
އިސްރާއީލް އަސްކަރީ ވުޒާރާގެ ނޭޝަނަލް އިމަރޖެންސީ މެނޭޖްމަންޓް އޮތޯރިޓީ، އެންއީއެމްއޭއާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި އަވަށްތަކުން ހުސްކުރާ އާންމުން ބައިތިއްބާނީ ދައުލަތުން ހަރަދުކުރާ ގެސްޓު ހައުސްތަކުގައެވެ.
އިސްރާއީލްގެ އަސްކަރީ ވުޒާރާއިން މައުލޫމާތު ދޭ ގޮތުގައި އެންއީއެމްއޭ އިން މިވަގުތު ދަނީ ބޯޑަރު ކައިރިން 25 ތަނަކުން މީހުން ހުސްކުރުމުގެ މަސައްކަތް ކުރަމުންނެވެ. މިއީ ޣައްޒާއާ ގާތްގަޑަކަށް 4 ކިލޯމީޓަރުގައި ކައިރި ސަރަހައްދުތަކުގައި ތިބި މީހުންނެވެ. އަދި ދެ ކިލޯމީޓަރު ކައިރިން އިތުރު 28 ސަރަހައްދަކުން މީހުން ހުސްކުރުމުގެ މަސައްކަތްވެސް އެންއެމްއީއޭން ކުރަމުން އަންނަ ކަމަށް އެ ވުޒާރާއިން ބުނެއެވެ. މީހުން ހުސްކުރަން އަންގާފައިނުވާ ސަރަހައްދުތަކުންވެސް ދުރު ސަރަހައްދުތަކަށް މީހުން ބަދަލުވާ ކަމަށް މިޑިއާތަކުން ބުނެއެވެ. މިއާއިއެކު އިސްރާއީލްގެ ހޮޓާތަކަށް ގިނަ ބަޔަކު ބަދަލުވުމުން ހޮޓާތައް ފުރިފައިވާ ކަމަށްވެސް އިސްރާއީލްގެ މިޑިއާތަކުން ވަނީ ރިޕޯޓުކޮށްފައެވެ. އަދި އިސްރާއީލްގައި މިވަގުތު މީހުން ބޭއްތިއްބުމަށް އެކަށީގެންވާ ގޮތެއްގައި ހުރީ 56000 ހޮޓާ ކަމަށް މައުލޫމާތު ލިބެއެވެ.
ޔަހޫދީ އިސްރާއީލާއި ފަލަސްތީނުގެ ރައްޔިތުންގެ ދިފާއުގައި ހަނގުރާމަ ކުރާ ހަމާސް ޖަމާއަތާއި ދެމެދު މި މަހުގެ 7 ވަނަ ދުވަހުން ފެށިގެން ހަމަލާތައް ދޭން ފެށުމުން، ހިޒްބުﷲ ޖަމާއަތާއި އިސްރާއީލުންވެސް އަންނަނީ ހަމަލާތައް ބަދަލުކުރަމުންނެވެ.
އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވަނީ ހަމާސް އާއި އިސްރާއީލުން ކުރާ ހަނގުރާމައިގެ ތެރެއަށް ހިޒްބުﷲ އިން ވަނުމަކީ އެމީހުން ހަދާ ބޮޑު ގޯހެއް ކަމަށް ވިދާޅުވެފައެވެ.
ހިޒްބުﷲ އިން ފަށަން އުޅެނީ އެއްވެސް ފައިދާއެއް ނެތް ގެއްލުން ބޮޑު ހަނގުރާމަ އެއް ކަމަށް އިސްރާއީލް އަސްކަރިއްޔާގެ ތަރުޖަމާނު ޖޮނަތަން ކޮންރިކަންވެސް ވަނީ އާދިއްތަ ދުވަހު ވިދާޅުވެފައެވެ.
ވޭތުވެދިޔަ 24 ގަޑިއިރުތެރޭގައި ހިޒްބުﷲގެ މަރުކަޒުތަކަށް މަތިންދާ ބޯޓުންނާއި މިސައިލުން ހަމަލާދީ އެ ޖަމާއަތުގެ ހަ މީހަކު އިސްރާއީލްގެ އަސްކަރިއްޔާއިން ވަނީ މަރާލާފައެވެ.
މި ހަމަނުޖެހުންތަކުގައި ހިޒްބުﷲގެ ޖުމްލަ 19 ހަނގުރާމަވެރިއަކު މަރުވެފައިވާކަމަށް އެ ޖަމާއަތުން ބުނިއިރު، އޭގެ ތެރޭގައި ހޮނިހިރު ދުވަހު މަރުވި 6 ހަނގުރާމަވެރިން ވެސް ހިމެނޭ ކަމަށް އެ ޖަމާއަތުން ބުނެއެވެ. މި ހަމަނުޖެހުންތަކުގައި އާންމުންނާއި ނޫސްވެރިން ވެސް މަރުވެފައިވެއެވެ.