ފާއިތުވި ދެތިން ދުވަހުގެ ތެރޭގައި ޔަހޫދީ ފައުޖުތަކަށް ލިބުނު ނާކާމިޔާބީއާއި ލަދުވެތިކަމުން އަރައި ގަތުމަށް މީގެ ކުރިން ނުދޭވަރުގެ ވަރުގަދަ ވައިގެ ޙަމަލާތަކެއް ފަލަސްޠީނުގެ ޣައްޒާގެ ނިކަމެތި ޢާއްމު ރައްޔިތުންނާ ދެކޮޅަށް ދީފިއެވެ.
ފާއިތުވި 24 ގަޑިއިރުގެ ތެރޭގައި ގައްޒާގައި ޔަހޫދީ ފައުޖުތަކުން ހިންގި ގަތުލުއާންމުތަކުގައި 400އަށްވުރެ ގިނަ މީހުންވަނީ ޝަހީދުވެފައެވެ. އޭގެ ތެރޭގައި ގިނައީ މުސްކުޅިންނާއި އަންހެނުންނާއި ކުޑަކުދިންނެވެ. ޣައްޒާގައި ވެރިކަންކުރާ ޙަމާސް ޖަމާޢަތާ ކުރިމަތިލުމުގެ ބަދަލުގައި ފަލަސްޠީން ރައްޔިތުންގެ ނަޞްލު ނައްތާލުމުގެ ޙަރަކާތްތަކަށް ޔަހޫދީ ފައުޖުތަކުން ޚާއްޞަ އިސްކަމެއް ދެއެވެ. އެ ގޮތުން ހަސްފަތާލުތަކާއި ޞިއްޙީ ޚިދުމަތް ފޯރުކޮށްދޭ މަރުކަޒުތަކަށް ހުއްޓުމެއް ނެތި ޔަހޫދީ ފައުޖުތަކުން ދަނީ ޙަމަލާ ދެމުންނެވެ. އެ ޙަމަލާތަކުގެ ސަބަބުން ޣައްޒާގެ 10 ހަސްފަތާލެއްވަނީ ބޭނުންނުކުރެވޭ ވަރަށް ހަލާކުވެފައެވެ. އަދި ބާކީ ހުރި ހަސްފަތާލުތަކަށްވެސް ޙަމަލާ ދޭނެކަމުގެ އިންޒާރު ޔަހޫދީ ފައުޖުތަކުންވަނީ ދީފައެވެ. އެއާއެކު ޣައްޒާގެ ޞިއްޙީ ޚިދުމަތުގެ ނިޒާމު ހުއްޓުމަކަށް އައިސް އިތުރު ބައެއްގެ ފުރާނަ ގެއްލުމުގެ ބިރުވެރިކަންވަނީ ބޮޑުވެފައެވެ. ޣައްޒާއަށް ޔަހޫދީން ދެމުންދާ ޙަމަލާތަކުގައި ގާތްގަނޑަކަށް 5،000 މީހުން ޝަހީދުވެ 16،000 މީހުންވަނީ ޒަޚަމުވެފައެވެ.
ޣައްޒާއަށް ދެމުންދާ ޙަމަލާތައް އިތުރަށް ވަރުގަދަކޮށްފައިވަނީ ފާއިތުވި ދުވަސްތަކުގައި ޔަހޫދީ ފައުޖުތަކަށް ބޮޑެތި ގެއްލުންތަކެއް ލިބިފައިވަނިކޮށެވެ. އެ ގޮތުން ޣައްޒާއަށް ވަނުމަށް މަސައްކަތްކުރި ޔަހޫދީ ސިފައިންގެ ބަޔަކަށް ޙަމާސުންވަނީ ވަރުގަދަ ޙަމަލާތަކެއް ދީފައެވެ. އެ ޙަމަލާތަކުގައި ޔަހޫދީންގެ ސިފައިންގެ މީހަކު މަރުވެ، އިތުރު ބަޔަކު ޒަޚަމުވެ، އަސްކަރީ ދެ ބުލްޑޯޒަރަކާއި ޓޭންކަރެއްވަނީ ބޭނުންނުކުރެވޭ ވަރަށް ހަލާކުވެފައެވެ. އޭގެ އިތުރުން ޔަހޫދީންގެ ސަރަޙައްދުތަކަށް ޙަމާސުން ދެމުންދާ ރޮކެޓު ޙަމަލާތަކެއްވެސް ހުއްޓުވިފައެއް ނުވެއެވެ.
ލުބުނާނުގައި ޙަރަކާތްތެރިވާ ޙިޒްބުﷲ ޖަމާޢަތުންވެސް ދަނީ ހުއްޓުމެއް ނެތި ޔަހޫދީ ފައުޖުތަކާ ދެކޮޅަށް ވަރުގަދަ ޙަމަލާތަކެއް ދެމުންނެވެ. އެ ގޮތުން ފާއިތުވި ދެތިން ދުވަހުގެ ތެރޭގައި ޙިޒްބުﷲގެ ޙަމަލާތަކުގައި ޔަހޫދީންގެ 40 ސިފައިން މަރުވެ 12 ޓޭންކަރުވަނީ ބޭނުންނުކުރެވޭ ވަރަށް ހަލާކުވެފައެވެ. އޭގެ އިތުރުން ޔަހޫދީންގެ ޖާސޫސީ އަދި އަސްކަރީ މަޤާމުތަކަށްވެސް ޙިޒްބުﷲން ވަނީ މިސައިލް ޙަމަލާތަކެއް ދީފައެވެ. ޙިޒްބުﷲގެ ޙަމަލާތަކުން ސަލާމަތްވުމަށް ލުބުނާނުގެ ސަރަޙައްދީ ރޮނގު ކައިރީގައި އޮންނަ 39 އަވަށެއްގައި ދިރިއުޅޭ 50،000އަށްވުރެ ގިނަ މީހުންވަނީ ރައްކާތެރި ހިސާބުތަކަށް ގެންގޮސްފައެވެ. ޙަމާސާއި ޙިޒްބުﷲގެ ޙަމަލާތަކުގައި ޔަހޫދީންގެ 2،000އަށްވުރެ މީހުން މަރުވެ 200،000 މީހުންގެ ގެދޮރުވަނީ ގެއްލިފައެވެ. އޭގެ އިތުރުން ޙަމާސުންވަނީ ޔަހޫދީންގެ 200އަށްވުރެ ގިނަ މީހުން އަސީރުންގެ ގޮތުގައި ހައްޔަރުކޮށް ޣައްޒާގައި ބަންދުކޮށްފައެވެ.