ސީ ސްޕޯޓްސް ޤައުމީ ޖޫނިއަރ ސާފިން ޗެމްޕިއަންޝިޕް 2023 ގެ 14 އަހަރާއި 16 އަހަރުން ދަށުގެ އުމުރުފުރާގެ ޗެމްޕިއަންކަން އުމުރުން 12 އަހަރުގެ ޔަސީން އަޙްމަދު ނާޝިދު ހޯދައިފިއެވެ.
މިއަދު ކުރިއަށްދިޔަ 14 އަހަރުން ދަށުގެ ފައިނަލް ހީޓުން ޔަސީން މޮޅުވީ ޔޫސުފް ކަޔާން ހަމްދާން ޒަކީއާ ވާދަކޮށް، 12.75 ގެ ސްކޯރއެއް ހޯދައިގެންނެވެ. ޔަސީން ވަނީ އޭނާގެ ފުރަތަމަ ރާޅަށް 5.50 އަދި ތިންވަނަ ރާޅަށް 7.25 ގެ ސްކޯރއެއް ހޯދާފައެވެ.
އަދި މިއަދު މެންދުރުފަހު ކުރިއަށްދިޔަ 16 އަހަރުން ދަށުގެ ފައިނަލް ހީޓުގައި، މިދިޔަ އަހަރުވެސް މި އުމުރުފުރާގެ ޗެމްޕިއަން ހޯދި ޔަސީން ވަނީ 7.25 ގެ ރާޅަކާއި، ފަސް ޕޮއިންޓުގެ ރާޅަކާއެކު ޖުމްލަ 12.25 ގެ ސްކޯރއެއް ހޯދާފައެވެ. މި ފައިނަލުގައި ޔަސީން އާ ވާދަކުރި ސައްޔިދު ސަލާހުއްދީނަށް ލިބުނީ ޖުމްލަ 9.75 ގެ ސްކޯރއެކެވެ.
މީގެ އިތުރުން މި އަހަރުގެ މުބާރާތުގެ 18 އަހަރުން ދަށުގެ ޗެމްޕިއަންކަން ހޯދީ ސައްޔިދެވެ. މި އުމުރުފުރާގެ ޗެމްޕިއަންކަން އޭނާ ހޯދީ ފައިނަލް ހީޓުގައި 10.50 ޕޮއިންޓް ސްކޯރ އަކާއެކު މުޙައްމަދު ޒަޔާން ފަހަތަށް ޖައްސާލުމަށްފަހުއެވެ. ޒަޔާނަށް މި ހީޓުގައި ލިބުނީ 9.25 ގެ ސްކޯރއެކެވެ.
މި އަހަރުގެ ޤައުމީ ޖޫނިއަރ ސަރފިން ޗެމްޕިއަންޝިޕުގައި ފުރަތަމަ ފަހަރަށް "މަރުޙަބާ ކަޕް" ގެ ނަމުގައި ބޭއްވި ޓީމު އިވެންޓުގެ އެއްވަނަ ހޯދީ ޓީމު ސައްޔިދެވެ. ޓީމު އިވެންޓުގައި ޖުމްލަ ހަތަރު ޓީމު ވާދަކުރިއިރު، ޓީމު ސައްޔިދުގެ އިތުރުން ދެން ހިމެނުނީ ޓީމް ޔަސީން އާއި، ޓީމް ޝާނިފް އަދި ޓީމް ކައިއެވެ. ކޮންމެ ޓީމެއްގައިވެސް ތިން ރާޅާއެޅުންތެރިން ވަނީ ވާދަކޮށްފައެވެ.
އެއްވަނަ ހޯދި ޓީމު ސައްޔިދުގައި ހިމެނުނު ރާޅާއެޅުންތެރިންނަކީ ސައްޔިދުގެ އިތުރުން ނޫޙް މުޙައްމަދު އަދި ރާއިން ހާޝިމެވެ. އެ ޓީމުން ޗެމްޕިއަންކަން ހޯދީ ފައިނަލް ހީޓުގައި ޖުމްލަ 18 ޕޮއިންޓުގެ ސްކޯރއެއް ހޯދައިގެންނެވެ.