ޒަޔަނިސްޓު އިސްރާޢީލުން ޣައްޒާގެ މުސްލިމުން ފަނާކޮށްލަން ކުރަމުންދާ ހަނގުރާމައިގައި ބައިވެރިވެ، ޔަހޫދީންނަށް އެހީތެރިކަން ފޯރުކޮށްދޭން 106 ބިލިޔަން އެމެރިކާ ޑޮލަރު ހޯދަން ވައިޓް ހައުސްއިން ކޮންގްރެސްއަށް ހުށަހަޅައިފިއެވެ. ޔަހޫދީ އިސްރާޢީލުގެ އިތުރުން ޔޫކްރެއިނަށް އަސްކަރީ އެހީ ފޯރުކޮށްދޭން ވެސް އެ ފައިސާ ބޭނުން ކުރާނެ ކަމުގައި ވައިޓް ހައުސްއިން ބުނެއެވެ.
106 ބިލިޔަން އެމެރިކާ ޑޮލަރު ހޯދަން ރައީސް ޖޯ ބައިޑަން ޤާނޫނު ހަދާ މަޖިލިސް – ކޮންގްރެސްގެ ރުހުން ހޯދަން ހުށަހަޅާފައި މި ވަނީ، ޔަހޫދީ އިސްރާޢީލަށް ދާދި ފަހުން ކުރެއްވި ދަތުރުފުޅަކަށް ފަހުއެވެ. ތެލް އަވީވަށް ކުރެއްވި ދަތުރުފުޅުގައި ބައިޑަން ވަނީ، ޒަޔަނިސްޓު އިސްރާޢީލުގެ ހިމާޔަތާއި ރައްކާތެރިކަން ކަށަވަރު ކޮށްދިނުމުގައި އެމެރިކާއިން ދެމިއޮންނާނެ ކަމުގެ ޔަގީންކަން އަރުވާފައެވެ.
އޮކްޓޫބަރު 19 ވަނަ ދުވަހު ވެސް އެމެރިކާއިން ވަނީ ޒަޔަނިސްޓު އިސްރާޢީލަށް އަސްކަރީ އެހީގެ ޕެކޭޖެއް ފޮނުވާފައެވެ. އެމެރިކާއިން ފޮނުވާފައިވާ އަސްކަރީ ސާމާނުގެ ތެރޭގައި ގިނަ ޢަދަދެއްގެ އަސްކަރީ އުޅަނދުފަހަރު ހިމެނެއެވެ. ޔަހޫދީ ޖައްބާރު އަސްކަރިއްޔާގެ ސިފައިން އެ ސާމާނު ބޭނުން ކުރާނީ ފަލަސްޠީނުގެ ކުށެއް ނެތް މުސްލިމުންނާ ދެކޮޅަށް ހިންގަމުންދާ ލާއިންސާނީ ގަތުލުއާންމުގައެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ އިސްރާޢީލުން ޣައްޒާގައި ހިންގަމުންދާ ލާއިންސާނީ ޖަރީމާތަކުގައި ޝަހީދު ކޮށްލާފައިވާ މުސްލިމުންގެ ޢަދަދު މިހާރު ވަނީ 4,137 އަށް އަރާފައެވެ. އޭގެ ތެރެއިން ތިންބައިކުޅަ އެއްބަޔަކީ ކުޑަކުދިންނެވެ. ޔަހޫދީ އިސްރާޢީލުން ޣައްޒާއަށް ބޮންއަޅަން ފަށާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުން އިސްރާޢީލާ ދެކޮޅަށް ހަނގުރާމަ އިޢުލާނުކޮށް، 'އޮޕަރޭޝަން އަޤްޞާ ފްލަޑް'ގެ ނަމުގައި އަސްކަރީ ކެމްޕޭނެއް ފެށުމާ ގުޅިގެން ބަދަލު ހިފުމުގެ ގޮތުންނެވެ.
އެމެރިކާއިން 2024 ވަނަ އަހަރަށް ކަނޑައަޅާފައިވާ ދިފާޢީ ބަޖެޓުގެ ތެރެއިން 14.3 ބިލިޔަން އެމެރިކާ ޑޮލަރު ޒަޔަނިސްޓު އިސްރާޢީލަށް އަސްކަރީ އެހީތެރިކަން ފޯރުކޮށްދޭން ޚަރަދު ކުރާނެއެވެ. އޭގެ ތެރެއިން ގިނަ ފައިސާ ޚަރަދު ކުރަން ހަމަޖެހިފައި ވަނީ، ފަލަސްޠީނުގެ މުސްލިމުންގެ ގެދޮރާއި، ހޮސްޕިޓަލްތަކާއި ޞިއްޙީ މަރުކަޒުތަކަށް ހަމަލަދޭން ބޭނުންކުރާ މިސައިލްތަކާއި ބޮންތައް ގަތުމަށެވެ. އަދި، ޔަހޫދީ އިސްރާޢީލުގެ ވައިގެ ދިފާޢީ ނިޒާމަށް ބޭނުންވާ ސާމާނު ފޯރުކޮށްދިނުމަށެވެ.
ޔަހޫދީ އިސްރާޢީލަށް އިންސާނީ އެހީތެރިކަން ފޯރުކޮށްދޭން 9 ބިލިޔަން އެމެރިކާ ޑޮލަރު ހޯދަން ވެސް ބައިޑަން ވަނީ ހުށަހަޅުއްވާފައެވެ. އޭގެ ތެރެއިން ކުޑަ މިންވަރެއް ޔަހޫދީންގެ އަޅުވެތި ކަމުގައި ދަށުގައި ޣައްޒާގައި ދިރިއުޅޭ މުސްލިމުންނަށް ވެސް ފޯރުކޮށްދޭނެ ކަމަށް އޭނާ ވަނީ ވިދާޅުވެފައެވެ. ޒަޔަނިސްޓު އިސްރާޢީލަށް ބިލިޔަނުން އަސްކަރީ އެހީތެރިކަން ފޯރުކޮށްދޭން ބައިޑަން މަސައްކަތް ކުރައްވަމުން ގެންދަވާއިރު، ޔަހޫދީ ޖައްބާރު އަސްކަރިއްޔާއިން ވަނީ ޙަމާސް ޖަމާޢަތް ނެތިކޮށްލާނެ ކަމަށް ބުނެފައެވެ.
ކޮންގްރެސްއިން ރުހުން ހޯދަން ހުށަހަޅާފައިވާ 106 ބިލިޔަން ޑޮލަރުގެ ތެރެއިން 61 ބިލިޔަން ޑޮލަރު ޚާއްޞަ ކޮށްފައި ވަނީ ޔޫކްރެއިނަށް އަސްކަރީ އެހީ ފޯރުކޮށްދޭން ކަމުގައި ވައިޓް ހައުސްއިން ބުނެއެވެ.
ޙަމާސް ޖަމާޢަތުން ޔަހޫދީ އިސްރާޢީލާ ދެކޮޅަށް އަސްކަރީ ކެމްޕޭނެއް ފަށާފައި ވަނީ، ބައިތުލްމަޤްދިސްގައި އޮންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދް އަލް-އަޤްޞާގެ ހުރުމަތް ކެނޑުން އިތުރު ކުރުމާއި، ފަލަސްޠީނުގެ މުސްލިމުންނާ ދެކޮޅަށް ޔަހޫދީ އިސްރާޢީލުން ހިންގަމުންދާ ލާއިންސާނީ ޖަރީމާތަކަށް ކެތް ނުކުރެވިގެންނެވެ.