މިހާރު ކުރިއަށްދާ އައިސީސީ ކްރިކެޓް ވޯލްޑް ކަޕުގައި އިއްޔެ ކުޅުނު މެޗުގައި ބަންގްލަދޭޝް ބަލިކޮށް، މުބާރާތް ބާއްވާ ޤައުމު ކަމަށްވާ އިންޑިއާއިން މޮޅުވުމުގެ ސިލްސިލާ ދަމަހައްޓައިފިއެވެ.
މަހަރާޝްޓްރާ ކްރިކެޓް އެސޯސިއޭޝަން ސްޓޭޑިއަމުގައި ކުޅުނު މި މެޗުން އިންޑިއާ މޮޅުވީ ހަތް ވިކެޓުންނެވެ.
އިއްޔެ ކުޅުނު މެޗުގެ ގުރު ދިމާވުމުން ބަންގްލަދޭޝް އެންމެ ފުރަތަމަ ކުޅެން އަރައި 50 އޯވަރު ހަމަވިއިރު އަށް ކުޅުންތެރިން ނުބައިވެގެން ހެދުނީ 256 ލަނޑެވެ. އެ ޓީމުން އެންމެ ރަނގަޅަށް ކުޅުނީ 82 ބޯޅައިން 66 ލަނޑު ހެދި ލިޓޮން ދާސް އާއި 43 ބޯޅައިން 51 ލަނޑު އެއްކުރި ތަންޒިދު ހަސަންއެވެ. މި އިނިންގްސްގައި އިންޑިއާގެ ޖަސްޕްރީތު ބުމްރާ އާއި، މުޙައްމަދު ސިރާޖު އަދި ރަވިންދުރަ ޖަޑޭޖާ ވަނީ ކޮންމެ އުކުންތެރިއަކު 10 އޯވަރަށް ދެ ވިކެޓް ނަގާފައެވެ.
ޖަވާބުގައި އިންޑިއާ ކުޅެން އަރައި އެ ޓީމުން ވަނީ 41.3 ވަނަ އޯވަރުގައި ތިން ކުޅުންތެރިން ނުބައިވެގެން 261 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅުނީ 97 ބޯޅައިން 103 ލަނޑު ހެދި ވިރާޓް ކޯލީއެވެ. މިއީ އެއް ދުވަހުގެ ބައިނަލްޤުވާމީ ކްރިކެޓް މެޗުތަކުގައި އިންޑިއާގެ ކުރީގެ ކެޕްޓަން ކޯލީ ހެދި 48 ވަނަ ސެންޗަރީއެވެ.
މި މޮޅާއެކު 10 ޤައުމު ވާދަކުރާ މި މުބާރާތުގައި މިހާތަނަށް ކުޅުނު ހަތަރު މެޗުންވެސް އިންޑިއާ ވަނީ މޮޅުވެފައެވެ. އެއާއެކު އެ ޓީމު އޮތީ ތާވަލުގެ ދެވަނައިގައި އަށް ޕޮއިންޓާއެކުއެވެ. ތާވަލުގެ އެއްވަނައިގައި އޮތް ނިއު ޒީލަންޑުންވެސް ވަނީ މިހާތަނަށް ކުޅުނު ހަތަރު މެޗު ކާމިޔާބުކޮށް އަށް ޕޮއިންޓް ހަމަކޮށްފައެވެ. އަދި ބަންގްލަދޭޝް އޮތީ ތާވަލުގެ ހަތްވަނައިގައި ހަތަރު މެޗުން ދެ ޕޮއިންޓާއެކުއެވެ.