ޔޫރޯ 2024 ގެ ކޮލިފައިން ގްރޫޕް އޭގައި ރޭ ކުޅުނު މެޗުގައި ސްކޮޓްލަންޑް އަތުން ސްޕެއިން މުހިންމު މޮޅެއް ހޯދައިފިއެވެ.
އަމިއްލަ ޤައުމުގައި ކުޅުނު މެޗުން ސްޕެއިން މޮޅުވީ 2-0 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގައި ލަނޑެއް ފެނިފައެއް ނުވެއެވެ. މި މެޗުގެ ދެވަނަ ހާފުގައި އެންމެ ފުރަތަމަ ލަނޑެއް ޖެހީ ސްކޮޓްލަންޑުންނެވެ. އެގޮތުން މެޗުގެ 60 ވަނަ މިނެޓުގައި ސްކޮޓް މެކްޓޮމިނޭ ސްކޮޓްލަންޑަށް ލީޑު ނަގައިދިން ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) އިން ވަނީ އެ ލަނޑު އޮފްސައިޑް ކަމަށް ނިންމާފައެވެ.
އެއާއެކު މެޗުގެ 73 ވަނަ މިނެޓުގައި ސްޕެއިނުން ވަނީ ލީޑު ނަގާފައެވެ. ހެސޫސް ނަވާސް ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ އަލްވާރޯ މޮރާޓާއެވެ. އަދި މެޗު ނިމެން ހަތަރު މިނެޓަށް ވެފައި ވަނިކޮށް އޮއިޔަން ސަންސެޓް ވަނީ ސްޕެއިނަށް ލީޑު ފުޅާކޮށްދީފައެވެ.
މި މެޗުން ބަލިވުމާއެކު ގްރޫޕް އޭގެ އެއްވަނައިގައި އޮތޔް ސްކޮޓްލަންޑަށް ވަނީ އަންނަ އަހަރުގެ ޔޫރޯގެ ޖާގައެއް ހޯދުމަށް އިތުރު އިންތިޒާރެއް ކުރަން ޖެހިފައެވެ. އަދި މިއީ މި ފަހަރުގެ ކޮލިފައިންގައި ސްކޮޓްލަންޑް ބަލިވި ފުރަތަމަ މެޗެވެ. މިހާތަނަށް ކުޅުނު ހަ މެޗުން ލިބުނު 15 ޕޮއިންޓާއެކު ތާވަލުގެ އެއްވަނައިގައި ސްކޮޓްލަންޑް އޮތްއިރު، ދެވަނައިގައި ސްޕެއިން އޮތީ ފަސް މެޗުން ލިބުނު 12 ޕޮއިންޓާއެކުއެވެ.