ޢަދާލަތު ޕާޓީން މަޖިލީހުގެ 5 ދާއިރާއަކަށް ކުރިމަތިލުމަށް މަޝްވަރާފަށައިފި

ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި އަދާލަތު ޕާޓީން 5 ދާއިރާއަކަށް ކުރިމަތިލުމާއި މެދު މަޝްވަރާކޮށްފިއެވެ.

އަދާލަތު ޕާޓީގެ ތަރުޖަމާނު ޢަލީ ނަޒީރު ވިދާޅުވީ، ރޭ ބޭއްވި އަދާލަތު ޕާޓީގެ އިދާރީ މަޖިލީހުގެ ބައްދަލުވުމުގައި އަންނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ 5 ދާއިރާއަކަށް އެޕާޓީން ވާދަކުރުމާއި ގުޅޭގޮތުން މަޝްވަރާކުރެއްވިކަމަށެވެ. އަދި މިކަމުގައި ގޮތެއް ނިންމުމުގެ ކުރިން ޕާޓީގެ ގޮފިތަކާއި ދާއިރާތަކާއި އިތުރަށް މަޝްވަރާކުރުމަށްވެސް މިބައްދަލުކުރެއްވުމުގައި ނިންމާފައިވާކަމަށް ޢަލީ ނަޒީރު ވިދާޅުވިއެވެ.

ރޭ ބޭއްވުނު ޢަދާލަތު ޕާޓީގެ އިދާރީ މަޖިލީހުގެ ބައްދަލުވުމުގައި 2024 ވަނަ އަހަރު ބޭއްވޭ ރައްޔިތުންގެ މަޖިލީހުގެ އިންތިޚާބުގައި 5 ދާއިރާއަކަށް ވާދަކުރުމާމެދު މަޝްވަރާ ކުރެވުނު. މިކަމާމެދު ގޮތެއް ނިންމުމުގެކުރިން ގޮފިތަކާއި ދާއިރާތަކާ އިތުރަށް މަޝްވަރާކުރުމަށް ވެސް އެއްބަސްވެވުނު.

— Ali Nazeer (@alynazeer) October 12, 2023

ހިނގަމުންދާ 19ވަނަ ރައްޔިތުންގެ މަޖިލީހަށްވެސް އަދާލަތު ޕާޓިން ވާދަކުރިއެވެ. ނަމަވެސް އެއްވެސް ގޮނޑިއެއް އެޕާޓީއަށް ކާމިޔާބުކުރެވިފައެއް ނުވެއެވެ. އެންމެ ފަހުން އަދާލަތު ޕާޓީން މަޖިލީހުގައި ތަމްސީލްކޮށްފައިވަނީ، 18 ވަނަ ރައްޔިތުންގެ މަޖިލީހުގައެވެ. އެއީ މަކުނުދޫ ދާއިރާ އެކަންޏެވެ.

ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިޚާބު އަންނަ އަހަރުގެ އޭޕްރީލް ހިސާބުގައި ބޭއްވުމަށް އިލެކްޝަންސް ކޮމިޝަނުން އަންނަނީ މަސައްކަތްކުރައްވަމުންނެވެ. ހިނގަމުންދާ މަޖިލީހުގައި 87 ދާއިރާ އޮވެއެވެ. ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި 93 ދާއިރާއަށް މެމްބަރުން އިންތިޚާބުކުރުމަށްވަނީ ކަނޑައަޅާފައެވެ.