އެމްޓީސީސީ އެމްއެންޔޫއެސްޔޫ ފުޓްސަލް ފިއެސްޓާ 2023 ގެ އަންހެން އަދި ފިރިހެން ޑިވިޝަނުގެ ޗެމްޕިއަންކަން އެމްއެންޔޫ ބިޒްނަސް ސްކޫލުން ހޯދައިފިއެވެ.
ހުކުރުދުވަހުގެ ރޭ މުބާރާތުގެ އަންހެން އަދި ފިރިހެން ޑިވިޝަނުގެ ފައިނަލު މެޗު ކުޅެ އިނާމު ދިނުމުގެ ރަސްމިއްޔާތު ބާއްވާފައިވާއިރު ފައިނަލު މެޗުތަކާއި އިނާމުދިނުމުގެ ރަސްމިއްޔާތު ޝަރަފުވެރިކޮށްދެއްވީ ދިވެހިރާއްޖޭގެ ނައިބު ރައީސް ފައިޞަލް ނަސީމެވެ.
މުބާރާތުގެ އަންހެން ޑިވިޝަނުގެ އެންމެ މޮޅު ކުޅުންތެރިޔަކަށް ފިރުޝާނާ އަދި ފިރިހެން ޑިވިޝަނުގެ އެންމެ މޮޅު ކުޅުންތެރިޔަކަށް ހޮވުނީ ރިއުޝާނެވެ. މުބާރާތުގެ ފިރިހެން ޑިވިޝަނުގެ ރަނަރަޕް ޓީމަކީ މޯލްޑިވްސް ޕޮލިޓެކްނިކެވެ. އަންހެން ޑިވިޝަނުގެ ރަނަރަޕަކީ ކްލިކް ކޮލެޖެވެ.
މުބާރާތުގެ ފިރިހެން ޑިވިޝަނުގެ އެންމެ މޮޅު ކުޅުންތެރިއަކީ އެމްއެންޔޫ ބިޒްނަސް ސްކޫލުގެ އަޙްމަދު ރިއުޝާނެވެ. މި ޑިވިޝަނުގެ ގަދަ ފަސް ކުޅުންތެރިންގެ ތެރޭގައި ހިމެނެނީ ރިއުޝާންގެ އިތުރުން އެޓީމުގެ މުޙައްމަދު އަނާން، ޙައްމަދު ނާބިތު ޙުސައިން އަދި އެ ޓީމުގެ ގޯލްކީޕަރު އަނޫފް އަޙްމަދުގެ އިތުރުން މޯލްޑިވްސް ޕޮލިޓެކްނިކްގެ ޙުސައިން މައިޝަން އެވެ.
މުބާރާތުގެ އަންހެން ޑިވިޝަނުގެ އެންމެ މޮޅު ކުޅުންތެރިއަކީ އެމް.އެން.ޔޫ ބިޒްނަސް ސްކޫލުގެ ފިރުޝާނާ ނަޞީރެވެ. ގަދަ ފަސް ކުޅުންތެރިންގެ ތެރޭގައި ހިމެނެނީ ފިރުޝާނާގެ އިތުރުން އެ ޓީމުގެ ގޯލްކީޕަރު އާޔާ އަޙްމަދު އަބޫބަކުރާއި ކްލިކް ކޮލެޖުގެ މަރިޔަން ފޯސީތޭ ރޮވީނާއާއި ޝީނީޒް މުޙައްމަދު އަދި މަރިޔަމް މިރުފަތެވެ.
ފިރިހެން ޑިވިޝަނުގެ އެންމެ އުއްމީދީ ކުޅުންތެރިއަކީ މޯލްޑިވްސް ޕޮލިޓެކްނިކްގެ އަޙްމަދު ސުދައިސް ޢަލީއެވެ. އަންހެން ޑިވިޝަނުގެ އެންމެ އުއްމީދީ ކުޅުންތެރިޔަކީ ސެންޓަރ ފޯ ފައުންޑޭޝަން ސްޓަޑީޒްގެ ފާޠިމަތު ނިހާމާއެވެ.
މި މުބާރާތަކީ މަތީ ތަޢުލީމު ދާއިރާގައި ބޭއްވިގެންދާ އެންމެ ބޮޑު ކުޅިވަރު މުބާރާތެވެ.