ޗައިނާގެ ހަންގްޖޯގައި މިހާރު ކުރިއަށްދާ 19 ވަނަ އޭޝިއަން ގޭމްސްގެ އަންހެނުންގެ 800 މީޓަރު ދުވުމުގެ ޤައުމީ ރިކޯޑު ފަސޫހާ އަޙްމަދު އައުކޮށްފިއެވެ.
ފަސޫހާ މި ރިކޯޑު އައުކޮށްފައިވަނީ މިއަދު ކުރިއަށްދިޔަ އިވެންޓުގެ އެއްވަނަ ހީޓުގައި ދުވެ ދެ މިނެޓު 20.66 ސިކުންތުން ރޭސް ނިންމައިގެންނެވެ. ފަސޫހާ ދިޔައީ އޭނާ ވާދަކުރި ހީޓުގެ ފަސްވަނައަށެވެ. އެ ހީޓުގެ އެއްވަނަ ހޯދި އިންޑިއާގެ ޗަންދާ ރޭސް ނިންމާފައިވަނީ ދެ މިނެޓު 7.38 ސިކުންތުންނެވެ.
މިއީ އަންހެނުންގެ 800 މީޓަރު ދުވުމުގެ ޤައުމީ ރިކޯޑު ފަސޫހާ ޤާއިމުކުރި ތިންވަނަ ފަހަރެވެ. އެގޮތުން މި އަހަރުގެ މެއި މަހު ކުރިއަށްދިޔަ ޤައުމީ ޓީމުގެ ޓައިމް ޓްރަޔަލްސްގައި ވާދަކޮށް ފަސޫހާ އެންމެ ފުރަތަމަ ރިކޯޑު މުގުރާލީ 2 މިނެޓު 27.92 ސިކުންތުން ރޭސް ނިންމައިގެންނެވެ. މިއީ ފާއިތުވެދިޔަ 13 އަހަރު ވަންދެން މުގުރާނުލެވި އޮތް ރިކޯޑެކެވެ.
އެގޮތުން މީގެ ކުރިން މި ރިކޯޑު އޮތީ ޖަރުމަނުގެ ބާލިންގައި 2009 ވަނަ އަހަރު ކުރިއަށްދިޔަ ވޯލްޑް ޗެމްޕިއަންޝިޕުގައި ވާދަކުރި އައިޝަތު ރީޝާގެ އަތުގައެވެ. އެ ފަހަރު ރީޝާ ރިކޯޑު ހެދީ 2 މިނެޓު 28.00 ސިކުންތުން ރޭސް ނިންމައިގެންނެވެ.
އޭގެ ފަހުން ޖުލައި މަހުގެ ތެރޭގައި އަނެއްކާވެސް ހަމަ ޤައުމީ ޓީމުގެ ޓައިމް ޓްރަޔަލެއްގައި ދުވެ ފަސޫހާ ރިކޯޑު އައުކުރީ 2 މިނެޓު 21.83 ސިކުންތުން ރޭސް ނިންމައިގެންނެވެ. މި ވަގުތު ރާއްޖޭގައި އެންމެ ބާރަށް ކުރިއަރަމުން އަންނަ އުއްމީދީ ދުވުންތެރިންގެ ތެރޭގައި ފަސޫހާ ހިމެނެއެވެ.