ޗައިނާގެ ހަންގްޖޯގައި މިހާރު ކުރިއަށްދާ 19 ވަނަ އޭޝިއަން ގޭމްސްގައި ރާއްޖޭގެ ފެތުންތެރިން ޤައުމީ ގިނަ ރިކޯޑުތަކެއް ހަދައިފިއެވެ.
އެގޮތުން އައު ހަތް ރިކޯޑެއް ހެދިއިރު، ލޯންގް ކޯސް އަންހެނުންގެ 100 މީޓަރު ބަޓަފްލައި އިވެންޓުގެ ޤައުމީ ރިކޯޑު މިރާލް އައިން ލަތީފް ވަނީ މުގުރާލާފައެވެ. މި ރިކޯޑު މިރާލް މުގުރާލީ އެއް މިނެޓު 13.99 ސިކުންތުން އިވެންޓް ފުރިހަމަކޮށްގެންނެވެ. އެންމެ ފަހުން މި ރިކޯޑު އޮތީ ޙަނާން ޙުސައިން ޙަލީމުގެ އަތުގައެވެ. އެއީ ނިމިދިޔަ އިންޑިއަން އޯޝަން އައިލަންޑް ގޭމްސް (އައިއޯއައިޖީ) ގައި އެއް މިނެޓު 16.45 ސިކުންތުން ރޭސް ފުރިހަމަކޮށްގެންނެވެ.
މި ފަހަރުގެ ގޭމްސްގައި ރާއްޖޭގެ މުޙައްމަދު ރިޙާން ޝިހާމް ވަނީ ފިރިހެނުންގެ ލޯންްގް ކޯސް 100 މީޓަރު ބަޓަފްލައި އިވެންޓް، އެއް މިނެޓު 2.41 ސިކުންތުން ނިންމައި ޤައުމީ ރިކޯޑެއް ހަދާފައެވެ. މި ރިކޯޑު މީގެ ކުރިން އޮތީ މުޙައްމަދު އާން ޙުސައިންގެ އަތުގައެވެ. އެއީ މިދިޔަ އަހަރު ބޭއްވި ކޮމަންވެލްތު ގޭމްސްގައި އެއް މިނެޓު 3.35 ސިކުންތުން އިވެންޓް ފުރިހަމަކޮށްގެންނެވެ.
މީގެ އިތުރުން ރިޙާން ވަނީ ފިރިހެނުންގެ ލޯންްގް ކޯސް 200 މީޓަރު ބަޓަފްލައި އިވެންޓުގެ ޤައުމީ ރިކޯޑުވެސް އައުކޮށްފައެވެ. އެއީ ދެ މިނެޓު 28.17 ސިކުންތުން އިވެންޓް ފުރިހަމަކޮށްގެންނެވެ. މީގެ ކުރިން ރިޙާން މި ރިކޯޑު ހެދީ މި އަހަރު ބޭއްވި ވޯލްޑް އެކުއަޓިކްސް ޗެމްޕިއަންޝިޕްސްގައި ދެ މިނެޓު 32.93 ސިކުންތުން އިވެންޓް ފުރިހަމަކޮށްގެންނެވެ.
އޭޝިއަން ގޭމްސްގައި ދެން ޤައުމީ ރިކޯޑެއް އައުކޮށްފައިވަނީ އިމްޢާން ޢަލީއެވެ. އެއީ ފިރިހެނުންގެ ލޯންގް ކޯސް 200 މީޓަރު ބެކްސްޓްރޯކް އިވެންޓް ދެ މިނެޓު 22.88 ސިކުންތުން ފުރިހަމަކޮށްގެންނެވެ. މި ރިކޯޑު މީގެ ކުރިން އިމްޢާން ހެދީ މި އަހަރު ބޭއްވި ވޯލްޑް އެކުއަޓިކްސް ޗެމްޕިއަންޝިޕްސްގައި ދެ މިނެޓު 26.43 ސިކުންތުން އިވެންޓް ފުރިހަމަކޮށްގެންނެވެ.
މި ފަހަރުގެ ރިލޭ އިވެންޓުތަކަށް ބަލާލާއިރު، ފިރިހެނުންގެ ލޯންގް ކޯސް 4 ގުނަ 100 މީޓަރު ފްރީސްޓައިލް ރިލޭ، ތިން މިނެޓު 57.16 ސިކުންތުން ނިންމައި ޤައުމީ ރިކޯޑު ވަނީ އައުކޮށްފިއެވެ. މި ރިކޯޑު އައުކުރި ޓީމުގައި ހިމެނެނީ ރިޙާނާއި، މުބާލް ޢައްޒާމް އިބްރާޙީމާއި، އިމްޢާން އަދި އަޙްމަދު ނީޤް ނިޔާޒެވެ. މި ރެކޯރޑް އެންމެ ފަހުން އައުކޮށްފައިވަނީ ނިމިދިޔަ އައިއޯއައިޖީގައި ތިން މިނެޓު 58.33 ސިކުންތުން ރޭސް ނިންމައިގެންނެވެ. އެ ފަހަރު ޤައުމީ ރިކޯޑު އައުކުރި ޓީމުގައި ހިމެނުނީ ރިޙާނާއި، މުބާލް އާއި، އިމްޢާނުގެ އިތުރުން އާންއެވެ.
މީގެ އިތުރުން ލޯންގް ކޯސް އަންހެނުންގެ 4 ގުނަ 200 މީޓަރު ފްރީސްޓައިލް ރިލޭ އިވެންޓް، 10 މިނެޓު 50.31 ސިކުންތުން ނިންމައި ޤައުމީ ރިކޯޑު ވަނީ އައުކޮށްފިއެވެ. މި ރިކޯޑު އައުކުރި ޓީމުގައި ހިމެނެނީ ޙަނާނާއި، މިރާލާއި، ޙަމްނާ އަޙްމަދު އަދި ޢީން އައްބާސް ޝަރީފެވެ. މި ރިކޯޑު މީގެ ކުރިން ހަދާފައިވަނީ 2016 ވަނަ އަހަރު ބޭއްވި 12 ވަނަ ސައުތު އޭޝިއަން ގޭމްސްގައި 10 މިނެޓު 51.28 ސިކުންތުން ރޭސް ނިންމައިގެންނެވެ. އެ ފަހަރު މި އިވެންޓުގައި ފެތި ޓީމުގައި ހިމެނުނީ އާމިނަތު ޝަޖަން އާއި، އައިޝަތު ސާޖިނާ އާއި، އައިޝަތު ސައުސަން އަދި އަންމާޢު އަޙްމަދު ސަލީމެވެ.
ދެން މި ފަހަރުގެ އޭޝިއަން ގޭމްސްގައި ލޯންގް ކޯސް 4 ގުނަ 100 މީޓަރު މިކްސްޑް މެޑްލޭ ރިލޭ އިވެންޓުގެ ޤައުމީ ރިކޯޑުވެސް ވަނީ އައުކޮށްފިއެވެ. ހަތަރު މިނެޓު 48.51 ސިކުންތުން އިވެންޓް ނިންމި ޓީމުގައި ހިމެނެނީ މުބާލް އާއި، އިމްޢާނާއި، ހަމްނާ އަދި ޙަނާނެވެ. މި ރިކޯޑު މީގެ ކުރިން އައުކޮށްފައިވަނީ މި އަހަރު ބޭއްވި ވޯލްޑް އެކުއަޓިކްސް ޗެމްޕިއަންޝިޕްސްގައި ހަތަރު މިނެޓު 50.64 ސިކުންތުން އިވެންޓް ފުރިހަމަކޮށްގެންނެވެ. އެ ފަހަރުގެ ޓީމުގައި ހިމެނުނީ އިމްޢާނާއި، ހަމްނާގެ އިތުރުން ރިޙާން އާއި މިރާލެވެ.
މި ރިކޯޑުތަކާއެކު މި ފަހަރުގެ އޭޝިއަން ގޭމްސްގައި ދިވެހި ފެތުންތެރިން ވަނީ ޖުމްލަ 14 ޤައުމީ ރިކޯޑެއް އައުކޮށްފައެވެ.