ޗައިނާގެ ހަންގްޖޯގައި މިހާރު ކުރިއަށްދާ 19 ވަނަ އޭޝިއަން ގޭމްސްގެ އަންހެނުންގެ 200 މީޓަރު ދުވުމުގެ ޤައުމީ ޔޫތު ރިކޯޑު އަހްނާ ނިޒާރު އައުކޮށްފިއެވެ.
އަހްނާ މި ރިކޯޑު އައުކޮށްފައިވަނީ މިއަދު ކުރިއަށްދިޔަ އިވެންޓުގެ ތިންވަނަ ހީޓުގައި ދުވެ 25.66 ސިކުންތުން ރޭސް ނިންމައިގެންނެވެ. އަހްނާ ދިޔައީ އޭނާ ވާދަކުރި ހީޓުގެ ހަވަނައަށެވެ. އެ ހީޓުގެ އެއްވަނަ ހޯދި، ސިންގަޕޫރުގެ ވެރޯނިކާ ޕެރެއިރާ ރޭސް ނިންމާފައިވަނީ 23.14 ސިކުންތުންނެވެ.
މީގެ ކުރިންވެސް އަންހެނުންގެ 200 މީޓަރު ދުވުމުގެ ޤައުމީ ޔޫތު ރިކޯޑު އޮތީ އަހްނާގެ އަތުގައެވެ. އެއީ މި އަހަރުގެ ޖުލައި މަހު ތައިލެންޑުގެ ބެންކޮކުގައި އޮތް އޭޝިއަން އެތުލެޓިކްސް ޗެމްޕިއަންޝިޕުގެ އިވެންޓުގައި 25.73 ސިކުންތުން ރޭސް ފުރިހަމަކޮށްގެންނެވެ.
ރާއްޖޭގެ އެންމެ އުއްމީދީ ދުވުންތެރިންގެ ތެރޭގައި ހިމެނޭ އަހްނާ ވަނީ އިންޓަރ ސްކޫލް މުބާރާތާއި ޤައުމީ މުބާރާތުގެ އިތުރުން އެސޯސިއޭޝަނުގެ ބޮޑެތި މުބާރާތްތަކާއި، ބައިނަލްއަޤުވާމީ މުބާރާތްތަކުގައި ވާދަކޮށް ޤައުމީ ރިކޯޑު އައުކޮށްފައެވެ. އަދި އަހްނާއަކީ މިހާރު އެންމެ ކުރިއަރަމުން އަންނަ ދުވުންތެރިންގެ ތެރޭގައި ހިމެނޭ އެއް ދުވުންތެރިއެކެވެ.
މީގެ އިތުރުން މި ފަހަރުގެ އޭޝިއަން ގޭމްސްގެ އަންހެނުންގެ 200 މީޓަރު އިވެންޓުގެ ދެވަނަ ހީޓުގައި ދުވި އައިޝަތު ހިމްނާ ހަސަން ރޭސް ފުރިހަމަކޮށްފައިވަނީ 25.59 ސިކުންތުންނެވެ. އަދި ފިރިހެނުންގެ 200 މީޓަރު އިވެންޓުގައި އިބްރާހިމް ނާހިލް ނިޒާރާއި އަޙްމަދު ނަޖުދާން އަބްދުﷲ ވެސް ވަނީ ދުވެފައެވެ. ފުރަތަމަ ހީޓުގައި ވާދަކޮށް ނާހިލް ރޭސް ނިންމީ 22.98 ސިކުންތުންނެވެ. އަދި ދެވަނަ ހީޓުގައި ވާދަކޮށް ނަޖުދާން ރޭސް ނިންމީ 23.27 ސިކުންތުންނެވެ.