ޗައިނާގެ ހަންގްޖޯގައި މިހާރު ކުރިއަށްދާ 19 ވަނަ އޭޝިއަން ގޭމްސްގެ ޕްރިލިމިނަރީ ގުރޫޕް ސްޓޭޖުގެ ފަހު މެޗުގައި ނޭޕާލް އަތުން ބަލިވެ ރާއްޖޭގެ ކްރިކެޓް ޓީމު ކަޓައިފިއެވެ.
މިއަދު ކުޅުނު މެޗުގައި ނޭޕާލާއި ވާދަކޮށް ރާއްޖެ ބަލިވީ 138 ލަނޑުންނެވެ. ފުރަތަމަ މެޗުގައި މޮންގޯލިއާ އަތުން ތާރީޚީ މޮޅެއް ހޯދި ނަމަވެސް، ނޭޕާލް ވަނީ ގްރޫޕް އޭގެ އެއްވަނަ ހޯދާފައެވެ. އެއީ މޮންގޯލިއާ އާއި ރާއްޖެ އަތުން ހޯދި މޮޅާއެކުއެވެ. އެއާއެކު އެ ޓީމު ވަނީ ނޮކައުޓް ބުރަށް ދަތުރުކޮށްފައެވެ.
މިއަދުގެ މެޗުގެ ޓޮސް ދިމާވެގެން ނޭޕާލް އެންމެ ފުރަތަމަ ކުޅެން އަރައި 20 އޯވަރު ހަމަވިއިރު ހަތް ކުޅުންތެރިން ނުބައިވެގެން ވަނީ 212 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ 27 ބޯޅައިން 52 ލަނޑު ހެދި ކެޕްޓަން ރޯހިތު ކުމާރް ޕޯޑެލްއެވެ. މި އިނިންގްސްގައި ރާއްޖޭގެ އިސްމާޢީލް ނަޒްވާން ވަނީ ތިން ވިކެޓް ނަގާފައެވެ.
ޖަވާބުގައި ރާއްޖެ ކުޅެން އަރައި 19.4 އޯވަރު ތެރޭގައި ހުރިހާ ކުޅުންތެރިން ނުބައިވެގެން ހެދުނީ 74 ލަނޑެވެ. ރާއްޖެއިން އެންމެ ރަނގަޅަށް ކުޅުނީ 34 ބޯޅައިން 36 ލަނޑު ހެދި މުއާވިޔަތު އަބްދުލް ޣަނީއެވެ.