އޭޝިއަން ގޭމްސް: ސިންގަލްސްގެ ދެވަނަ ބުރުގެ ޖާގައެއް ޝައްފާނަށް

ޗައިނާގެ ހަންގްޖޯގައި މިހާރު ކުރިއަށްދާ 19 ވަނަ އޭޝިއަން ގޭމްސްގެ ޓޭބަލް ޓެނިސް ފިރިހެން ސިންގަލްސްގެ ދެވަނަ ބުރުން ރާއްޖޭގެ މުޙައްމަދު ޝައްފާން އިސްމާޢީލް ޖާގަ ހޯދައިފިއެވެ.

މިއަދު ހެނދުނު ކުޅުނު ފުރަތަމަ ބުރުގެ މެޗުން ޝައްފާން މޮޅުވީ ނޭޕާލުގެ ރުބިން މަހާރްޖަން އަތުން 4-1 ސެޓުންނެވެ. މިއީ މި ފަހަރުގެ އޭޝިއަން ގޭމްސްގެ ޓީޓީ އިވެންޓުގައި ރާއްޖެއަށް ލިބުނު ފުރަތަމަ މޮޅެވެ.

މި މެޗުގެ ފުރަތަމަ ސެޓުގައި ޝައްފާން ވަނީ މޮޅު ކުޅުމެއް ދައްކައި 11-6 އިން ސެޓު ކާމިޔާބުކޮށްފައެވެ. އެކަމަކު ދެވަނަ ސެޓު ރުބިން ގެންދިޔައީ ފަސޭހަކަމާއެކު 11-3 އިންނެވެ. ނަމަވެސް ޖެހިގެން އައި ތިން ސެޓުގައި ޝައްފާނުގެ ފަރާތުން މޮޅު ކުޅުމެއް ފެނިގެންދިޔައިރު، މި ސެޓުތައް އޭނާ ކާމިޔާބުކޮށްފައިވަނީ 11-8، 11-6 އަދި 11-8 އިންނެވެ.

މީގެ އިތުރުން ޓީޓީގެ ފިރިހެން ސިންގަލްސްގެ ފުރަތަމަ ބުރުގައި މޫސާ މުންސިފް އަޙްމަދުވެސް ވަނީ ވާދަކޮށްފައެވެ. އެކަމަކު އެ މެޗުން މުންސިފް ބަލިވީ ބަޙްރެއިނުގެ އަލްޔާސް އަޙްމަދު މުޙައްމަދު ޖާސިމް އަލް ޔަސީއާ ވާދަކޮށް 4-1 ސެޓުންނެވެ.

ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ސެޓު 11-6 އިން އަލް ޔަސީ ގެންދިޔަ ނަމަވެސް، މުންސިފް ވަނީ ދެވަނަ ސެޓު 11-4 އިން ކާމިޔާބުކޮށްފައެވެ. އެކަމަކު ޖެހިގެން އައި ތިން ސެޓު އަލް ޔަސީ ގެންގޮސްފައިވަނީ 15-13، 13-11 އަދި 11-7 އިންނެވެ.

ޓީޓީގެ އަންހެން ސިންގަލްސް ބަޔަށް ބަލާލާއިރު، ފުރަތަމަ ބުރުގައި ރާއްޖޭގެ އައިޝަތު ރަފާ ނާޒިމް ވަނީ މަކާއުގެ ޗީ ހުން ޗެއޮންގް އަތުން 1-4 ސެޓުން ބަލިވެފައެވެ.

މި މެޗުގެ ފުރަތަމަ ސެޓު 5-11 އިން ޗެއޮންގް ކާމިޔާބުކުރި ނަމަވެސް، ރަފާ ވަނީ ދެވަނަ ސެޓު 11-8 އިން ގެންގޮސްފައެވެ. ނަމަވެސް ޗެއޮންގް ވަނީ ޖެހިގެން އައި ތިން ސެޓު 9-11، 4-11 އަދި 9-11 އިން ކާމިޔާބުކޮށް މެޗުން މޮޅުވެފައެވެ.