ޗައިނާގެ ހަންގްޖޯގައި މިހާރު ކުރިއަށްދާ 19 ވަނަ އޭޝިއަން ގޭމްސްގައި ވާދަކުރަމުން އަންނަ ޝޫޓިން ޓީމުން 10 މީޓަރު އެއާ ރައިފަލް މިކްސް ޓީމުގެ ޤައުމީ ރިކޯޑު އައުކޮށްފިއެވެ.
މި ރިކޯޑު އައުކޮށްފައިވަނީ ސްޓާފް ސާޖަންޓް ޝަރަފިއްޔާ އަބްދުއްރަޙްމާނާއި ކޯޕްރަލް އިބްރާހީމް ޝިފާނެވެ. މިއަދު ކުރިއަށްދިޔަ ކޮލިފިކޭޝަނުގައި ވާދަކޮށް ޤައުމީ ރިކޯޑު އައުކޮށްފައިވަނީ 600.9 ގެ ސްކޯއެއް ހަދައިގެންނެވެ.
މީގެ ކުރިންވެސް 10 މީޓަރު އެއާ ރައިފަލް މިކްސް ޓީމުގެ ރިކޯޑު ހަދާފައިވަނީ ހަމަ މި ދެ އެތުލީޓުންނެވެ. އެއީ އިންޑޮނޭޝިއާގެ ޖަކާޓާގައި މި އަހަރު ކުރިއަށްދިޔަ އޭޝިއަން ރައިފަލް ޕިސްޓަލް ކަޕުގައި ވާދަކޮށްގެން 592.3 ގެ ސްކޯއެއް ހަދައިގެންނެވެ.
އޭގެ ކުރިން މި ރިކޯޑު އޮތީ 2019 ވަނަ އަހަރު ނޭޕާލުގައި އޮތް ސައުތު އޭޝިއަން ގޭމްސްގައި 575 ގެ ސްކޯ އެއް ހެދި ލާންސް ކޯޕްރަލް އާސިފާ ޖައުފަރާއި ފަސްޓް ސާޖަންޓް އަބްދުﷲ މުޙައްމަދުގެ އަތުގައެވެ.
މި ފަހަރުގެ އޭޝިއަން ގޭމްސްގައި މިހާތަނަށް ވަނީ ޝޫޓިންގެ ދެ ރިކޯޑެއް ހަދާފައެވެ. އެއީ 10 މީޓަރު އެއާ ރައިފަލް މިކްސް ޓީމުގެ ޤައުމީ ރިކޯޑުގެ އިތުރުން 10 މީޓަރު އެއާ ރައިފަލްގެ އަންހެން ޤައުމީ ރިކޯޑެވެ. އެ ރިކޯޑު ޝަރަފިއްޔާ އައުކޮށްފައިވަނީ 605.9 ގެ ސްކޯއެއް ހަދައިގެންނެވެ.