ޗައިނާގެ ހަންގްޖޯގައި މިހާރު ކުރިއަށްދާ 19 ވަނަ އޭޝިއަން ގޭމްސްގެ ޓޭބަލް ޓެނިސް މިކްސް ޑަބަލްސްގެ ފުރަތަމަ ބުރުން ރާއްޖޭގެ މުޙައްމަދު ޝައްފާން އިސްމާޢީލާއި ލައިސާ ފަތުހުﷲ އިސްމާޢީލްގެ ޕެއާ ކަޓައިފިއެވެ.
މިއަދު ކުޅުނު މިކްސް ޑަބަލްސްގެ މެޗުން ލައިސާ އާއި ޝައްފާނުގެ ޕެއާ ބަލިވީ އުތުރު ކޮރެއާގެ ހަމް ޔޫސޮންގް އާއި ކިމް ކުމްޔޮންގުގެ ޕެއާއާ ވާދަކޮށް ސީދާ ތިން ސެޓުންނެވެ. މި މެޗުގެ ސެޓުތައް އުތުރު ކޮރެއާގެ ޕެއާއިން ގެންގޮސްފައިވަނީ 11-1، 11-2 އަދި 11-7 އިންނެވެ.
އޭޝިއަން ގޭމްސްގެ ޓީޓީ އިވެންޓުގައި ރާއްޖޭގެ ހަ ކުޅުންތެރިއަކު ވާދަކުރަމުން އަންނައިރު، އޭގެ ތެރޭގައި ހިމެނޭ އަންހެން ކުޅުންތެރިންނަކީ ލައިސާގެ އިތުރުން އައިޝަތު ރަފާ ނާޒިމާއި ފާތިމަތު ޖުމާނާ ނިމާލެވެ. އަދި ފިރިހެން ކުޅުންތެރިންގެ ތެރޭގައި ހިމެނެނީ ޝައްފާނުގެ އިތުރުން މޫސާ މުންސިފް އަޙްމަދާއި އަޚްޔަރު އަޙްމަދު ޚާލިދެވެ.
މިކްސް ޑަބަލްސްގެ ފުރަތަމަ ބުރުން ލައިސާ އާއި ޝައްފާނުގެ ޕެއާ ކެޓިއިރު، މީގެ ކުރިން ޓީމު އިވެންޓުގައި ކުޅުނު ދެ މެޗުންވެސް ބަލިވެ އަންހެން އަދި ފިރިހެން ޓީޓީ ޓީމުވެސް ވަނީ އެ ބައިން ކަޓާފައެވެ.